【賽前嗌交】利車大戰之假如你的男神是車迷… 精選

話說，小妹紅日都要返工，有無補假？無架，多封公司俾嘅利是囉。咁有時車迷得閒都會接小妹放工嘅，放工有咩講？今日嘅話，正常都會講下葉劉俾麒麟撞一週年快樂，但當男同女中間多左個足球，咁又唔同講法－緊係講下聽晚利物浦對車路士場波啦。

車迷：其實係咪高普落order叫文尼踢失12碼架呢？

小妹：文尼同國家隊榮辱與共！點會做埋啲咁嘅野呀…你地驚左我地文尼bb咋？

車迷：有咩好驚？文尼岩岩先上機返英國，岩岩落機又有時差又攰，就算俾你上到場，都發揮唔到一貫水準啦。再講，為左文尼一個就派架私人飛機去接佢，又話足球係團體運動，唔會話少左邊個就唔得咩？利物浦真係鐘意自打嘴巴。全世界都知架啦，利物浦無左文尼之後有幾耐無贏過波？
小妹：岩呀足球係團體運動，所以高普都話唔會因為文尼係度就代表會會終止三連敗。而文尼出唔出到都要睇下星期二朝早嘅訓練情況再決定，但係做人最緊要有信心，今場利物浦差唔多齊腳，加上費明奴又轉左時間上庭（醉駕），拉蘭奴都好得七七八八，仲有抖夠晒嘅馬迪普呢！係少左個肋傷嘅佳尼姐。但亞諾係上場對曼聯都做到野呀，唔洗擔心。

車迷：唔係下話，唔好打飛機啦，無左佳尼你地右邊，柏度呀摩西斯呀真係一個都爆開晒你地，真係無咩好驚。而我地呀夏薩特唔單只識入波，佢仲識帶住成隊波去穩坐榜首。講運球，佢可能唔夠美斯玩，講到要係佢腳下搶到個波，真係你唔犯規都做唔到囉！夏薩特真係好鬼好丁，佢簡直係可以扭轉成場波賽果嘅一個球員！

小妹：只要軒達臣可以cover返好個full back…
車迷：好啦我唔講夏薩特，咁仲有個迪亞高哥斯達呢？你地醒嘅就搵人睇實佢，你有一碼位就佢起到腳呢…哈哈！提埋你啦，韋禮安或者柏度係禁區附近都好危險架，一個唔小心玩殘最鐘意派膠嘅路夫雲同新仔就唔好啦。
小妹：講派膠邊夠你地卡希爾出名呀？我地馬迪普都出返黎啦！有佢係度，車仔要反擊應該有啲難度。我會覺得由佢睇住簡迪，等防中睇住哥斯達唔係俾佢有機會壓到咁前會好啲囉，我夠知柏度拉空會拉空令我地失位，但馬迪普佢同路夫雲都拍左咁耐，點都有啲默契，加上呢排脫膠嘅米奴列，真係唔好意思啦。
車迷：講你都唔化嘅，就算你地守到，都要入到波先拎到三分。我地個龍古圖爾斯係英超最強之一，加上三中堅 都有唔同角色，卡希爾偏防守同駁腳多，艾斯派古達有時會帶波上去助攻，佢企位同攔截都好好，絕對對防守有正面影響。大衛雷斯就負責長傳，佢同卡希爾係進攻死球都係重要角色，真係完美嘅防守呀！
小妹：講完啦嘛？都係果句啦，卡希爾又無速度又醫院波，三中堅敗筆咪係佢度囉！對組織型球隊高普最叻打防反迫搶，我地要快有小明文尼，要拉空拉蘭拿，要創造力有古天奴，要迫波有法明奴… 中場有偏攻嘅韋拿度姆，呀仲有，路夫蘭同埋馬迪普都識角球頂波，只要佢地集中啲唔好Hea，入波不是夢囉。

車迷：有信心係好嘅，但你隊利物浦咁…不如聽晚去食海鮮？

小妹：咁鐘意食你食埋我果份！我戒口唔食海鮮呀…喂家陣你有假放玩完成日就係度講風涼話，我返完成日工都好攰架，洗唔洗下下都疾住晒呀，威啦榜首，就算我地贏左你都仲7分距離。

係，事實上我地係蝕章。 小妹心入面係知道，今場唔單止要守到，仲要攻到。對住防又得攻又得嘅車路士，唔醒醒定定點得？要知道，利物浦就算真係齊腳都唔係最好狀態嘅時候，而對面車路士就一帆風順咁。干地一定睇中利物浦無晒士氣呢一點，唔會sit back反而會強攻。都好嘅，人地肯攻即係利物浦會有空位去反撃，唔似得之前對鐵桶陣咁樣。換句話講，要把握到人地派膠嘅機會入波，再減少自己_(數目字)嘅數量。能夠做到咁，小妹就收貨架啦，當然，如果可以劫富就更好啦。唔理下場對阿仙奴點點點啦，踢完一場再一場啦。