【聯賽盃】 修咸頓對利物浦之傷兵復出 精選

提提大家，今晚(即係聽日凌晨)0345會有聯賽盃四強修咸頓對利物浦。

古天奴終於都傷癒， 佢之前係上年11月26號對新特蘭果場被踢傷，抖左七個禮拜啦，估計有望係對修咸頓果場可以復出。不過呢，岩岩好返，個態點會去返未傷之前果個狀態呢？呢名24歲嘅球員其實都係都係跟返first squad四次操咋…

但係，係無左文尼（去左踢非洲國家盃）嘅情況下，高普當然希望古天奴越快操返fit就越好，但呢啲野真係唔迫得唔急得，身為領隊嘅高普當然明白，所以係對修咸頓果場，佢覺得擺古天奴係陣容入面係正確嘅做法，但出唔出佢就再算。但就算唔出佢，利物浦踢完修咸頓之後三日先再對曼聯，有的是時間嘛。不過當然，一切都係睇當時情況而定啦。古天奴係今季踢左13場，入左總共五個入波，加上五個助攻，數據上唔錯啦。而呢個咁好嘅數據亦令古天奴係轉會市場上成為各大球會目標之一，傳得最勁嘅就係有古天奴朋友尼馬係度嘅巴塞。高普表示…由於佢講左好多野，小妹用三隻字總括啦－「未驚過」！
今場如無意外，高普會押重注係史杜列治身上 。由於好似上面都提到啦，係古天奴唔係正選下，史毒好大機會正選上陣，同奧歷治和費明奴拍住上。（高普應該會繼續出費明奴，因為公還公私還私，費明奴公私分明，唔會俾屋企被爆竊同埋被捉到醉駕影響） 高普就話， 佢從來都無懷疑過史毒嘅質素同球場上嘅智慧，但咩野先叫有態？有態同岩踢場比賽係兩回事。但高普都見到佢嘅努力，仲話就算佢無入波都好，佢嘅出現都好重要，好期待見到佢keep到而家嘅體能同埋更多嘅進步。
呢位27歲英藉球員踢左6場正選6場後備 ，係英超入左兩球，但留意返，佢係聯賽盃兩場入左四球，掂呀！雖然都傳過韋斯咸對佢有興趣，不過今次高普擺明就唔會放人架啦， 高普依然相信史杜列治係岩踢利物浦，但首先…先解決左玻璃腳問題先！
再講拉蘭拿，呢位前修咸頓球員啦（其實前球員仲有路夫蘭同佳尼呢兩位後場球員）！高普就想佢踢對修咸頓果場多過對普利茅夫果場（簡稱 留力），再次倒戈，俾主隊球迷噓都係expect到會出現嘅事。高普亦都幫佢解話，要明白lalala係修咸頓成長，佢屋企人朋友都係果度，所以當地球迷都會期望佢留係修咸頓一段好長嘅時間，之不過佢選擇離開自己嘅成長地，選擇左去見下個世界，願意接受挑戰。但高普對lalala嘅抗壓能力有信心，相信呢啲事唔會影響到佢集中比賽。而左閘占士米拿亦有望係呢場復出，但隊長軒達臣就仲未出到住啦…龍門方面，估計都會用返卡里奧斯，貫切高普唔要「一龍獨大」，要輪住出龍門嘅承諾。

今場波應該幾緊湊，但個時間真係…唔緊要啦，都四強啦，較定鬧鐘啦！