【終於生性啦仔】 利物浦4：1史篤城 精選

高普係教利物浦未試過連續三場波不失球，今場雖然贏波，但都係打破唔到呢個宿命…住。
12分鐘，高治頭鎚，文尼解圍唔遠仲有少少撻，佳尼同文尼兩個誤會走甩左禾達斯，而加上米仔諗住出迎， 點知禾違斯頂波，米路列企錯位所以動作慢左，輸0：1。

利物浦右路有文尼同佳尼，仲要兩個都當打，所以感覺上今場利物浦係右邊嘅做波、攻勢係多啲；相比係左邊有唔係正宗左閘嘅占士米拿，同埋雖然係打左但都係偏向中間嘅費明奴，明嘅。而韋拿度姆今場表現真係麻麻，慢，錯失機會，攞波曳…奧歷治又走唔起，比較…呆。今日前場真係好似係拉蘭拿同文尼加占士米拿嘅舞台。

34分鐘，文尼傳俾拉蘭拿，拉蘭拿第一下唔入，個波撞到格連莊遜彈返去佢腳下再射，入左！雖然其實都係人地龍門無守近柱而失嘅呢球，但都真係要讚lalala反應快。祖亞倫今場好搏命，唔知係咪因為之前俾人話利物浦棄將而去表現自己。今場一個扭五個，亦有有威脅嘅射門；而佢亦都好勤力，中前場都見到佢。

44分鐘，占士米拿一個靚傳，由費明奴左邊拉個遠處，個波撞內柱好似波子機咁彈返入網。高普唔因為醉駕而罰佢無得踢呢個決定係岩架～利物浦反先2：1。而係上半場補時，占士米拿又一個傳中俾文尼禁區外直射，差一個波位到就入架啦！今場文尼表現得好好，所以小妹都好想佢入到波，佢咁努力又有腳法，只係差咁啲運。
52分鐘，米奴列同路夫躝嘅誤會…真係嚇到小妹心都離一離，米仔出到禁區頂個位想接波，但路夫蘭見佢唔到想頂返去龍門位，會出事架嘛，所以話出聲啦，溝通係一段關係入面好重要架。

59分鐘，軒達臣俾個直線，再由奧歷治傳中，文尼撞入！Oh sorry，睇返慢鏡原係人地own goal，俾恩保拿截左糊。咁即係…文尼都係未入到波呀呀呀呀呀呀。
係69分鐘，高普作出調動，換出奧歷治同拉蘭拿；換入史杜列治同安尼簡。就時遲那時快，一入黎嘅史杜列治被人當佢透明，對方後防回傳（係利物浦嘅角度即係助攻）個波龍門果陣，佢係無人mark無人跟嘅情況下輕鬆入左呢個波。呢個亦史毒今季第一個英超入波，小妹真係好安慰，見佢係國家隊入左咁多球而球會就一球都無，係心up嘅。
而高普亦都係78分鐘用摩蘭奴換出費明奴，睇怕高普都係為星期六對曼城果樣留下力啦，減低主力受傷嘅機會。
今場贏波係開心，特別係見到米仔米奴列嘅進步，雖然輸果球都關米仔事，但係佢嘅傳球成功率比起卡里奧斯高，今場有一樣野一定要提，佢好多次都好有信心出龍接實左個波！係接實左個波呀！你地明唔明見到佢接得實個波係幾感動，眼淺嘅小妹差啲喊左出黎。

而馬迪普亦好返，今場卡拉雲嘅表現就一定唔夠操fit左嘅馬迪普好，睇下隊長交波嘅選擇又好似唔多信任佢，咁下場應該出卡拉雲定馬迪普呢？呢啲野真係要睇臨場表現啦。小妹個人認為下場可以試下用史杜列治當替奧歷治，始終把握力同速度都幾好（雖然佢都有派膠嘅時間），而佢上場同今場個表現都唔差，可以一戰呀。
留意返大家都關注嘅費明奴，見到佢出場果陣高普都攬左佢幾耐，加上今場入左波，唔會雪佢啦（好似係）。
順帶一提呀，今場英格蘭領隊修夫基，莫椰子，謝拉特同埋哥迪奧拿（呢個新聞話有，小妹見唔到）都有黎睇喎。