【突發!出事㗎嘛】費明奴醉駕俾警察拉咗 精選

今日紅日，難得約到車迷出黎。但因為車迷趕住返去睇波，所以今日睇咗場戲、食咗個港女high tea之後佢就走咗啦。 話說佢飲左杯champagne，即係香檳，所以唔揸車啦喎。岩嘅，係香港醉駕會俾政府告架！小妹都唔想無左個車迷陪我倒數架嘛…but anyway，小妹都識搭mtr嘅，即係地鐵，無車迷係身邊，咪上網睇下新聞。一睇sports news…小妹係地鐵真係_！咗一聲出黎。咩話？費明奴醉駕俾人拉咗！？

新聞話：

利物浦前鋒費明奴係平安夜不平安地朝早被警察捉到dd，即係醉駕。而家警方落案起訴呢名25歲嘅球員將會係2017年1月31日（英國時間）上court。如果罪成，佢將會被吊銷駕駛執照同埋罰錢。 留意返，利物浦會係2017年2月1日(香港時間)對車仔，外媒就話The Brazil international's court date clashes with Liverpool's Premier League encounter with current leaders Chelsea.計返時差，係喎真係撞到正一正。係咪沒有最壞只有更壞呢？利物浦方面就話一日法庭未有裁決都唔會回應，法律程序進行中係不宜表態，呢樣野相信香港人一定聽到耳熟能詳啦。
老老竇竇，對於費明奴－錢，其實唔係問題；無左個車牌，問題都不大。咁咩野先係問題呢？

就係利物浦聽日就會對史篤城。俾你係領隊，你仲俾唔俾佢上場？俾，咁之前對沙高嘅懲罰又變得唔公平（一個私自離隊落領隊面；一個出面闖禍落領隊面。分別係…你條仔當住你面咀第二條女同俾人捉到偷食同嘅分別），運動員係特別重視紀律呢方面嘅野；唔俾，利物浦仲出得咩人打前？大家都知道古天奴傷左文尼一月去踢非洲國家盃仲有史杜列治係玻璃腳…
小妹就認為出名嚴格德藉領隊高普就唔會出費明奴啦。第一，雖然一日法庭未有判決都唔代表佢有罪，但係出佢嘅話，高普點同其他球員交代？第二，費明奴自己有無心情踢先，受到傳媒嘅壓力同埋球迷嘅目光，要保護佢係咪收埋佢會好啲呢？但問題少女又黎啦，唔出費明奴，古天奴未好返…出史杜列治打邊頂替費明奴，拍住奧歷治同文尼都唔係無得諗。之不過解決到一場，咁一月非洲國家盃無埋文尼又點呢？…真係唔想諗啦，新仔唔該係呢排操fit啲（利申: 利物浦啲U20都唔差架）。

另外一樣野係聲譽，岩岩先被選為我最喜愛利物浦球員之一，今次俾人拉，外界會點呢？其實人係善忘，相信過多一排就會唔記得左呢件事。而醉駕總比玩女人呀婚外情呢啲新聞「正面」，佢只係年少無知，貪玩姐…平日就唔飲得，大時大節飲多杯…小妹明嘅，球迷應該都會理解到嘅，高普都明嘅。
參考返12月中都有曼城嘅yaya 醉架俾人捉左，因為佢認罪加上有恢意，個官判佢罪成罰左佢約 54000英鎊加停牌18星期再加要上駕駛改進課程，而唔少得嘅緊係又俾哥迪奧拿雪下咁啦（雖然佢一向都因為經理人鬧哥帥被雪開，岩岩先解凍），但對曼城影響唔大。小妹覺得應該要罰費明奴嘅，但係咪真係嚴重到要賣佢呢？咁又未必。而呢個時候最緊要係費明奴自己嘅心態－覺得俾人捉到唔抵定係真係知錯。如果知錯， 高普唔介意就剩係上庭果日有事姐…好似係。
唉，車迷呢個時候whatsapp小妹，話車仔贏左3：0般尼茅夫好開心喎…係啦係啦車迷開心啦，而家壓力係利物浦身上啦，唔贏就同榜首距離拉開，仲要俾曼城阿仙奴等追貼…