【90後的世界】利物浦對列斯聯之新星掘起 精選

利物浦對列斯聯…贏2：0。

最值得恭喜既緊係Woodburn 木燒啦，呢個後生仔打破左奧雲當年既紀錄，以 17歲又45日之齡成為利物浦最年輕入波球員，呢個入波亦係佢既利物浦第一球，恭喜哂呀！而奧雲佬亦都有係自己twitter去送上祝賀呢～
拿拿拿，未紅先驕無論係娛樂圈定係足球圈都係大忌黎既，高普都擔心傳媒過份吹奏Woodburn對佢有負面影響。首先，高普認為果球波唔係真係咁難入到，個波都係龍門口，佢自己射都會入啦！不過公平啲啦對後生仔，韋拿姆度個波交俾佢都彈彈下, 都要壓得住個波先入既。而領隊既責任就係要幫助一個年輕既球員發展， 而係呢個時間佢最好唔好俾外界影響。但係講還講啦，高普係賽後亦都有讚Woodburn比起其他年輕球員進步得更快，對佢今場表現滿意。
講下呢個後生仔啦，當佢係青年軍果陣，因為佢娘親想個仔過啲「正常既生活」，即係明知個仔返學練波會遠啲，都想佢住係屋企，唔想佢住宿舍。（好彩人地呀娘個正常生活定義都只係想見多個仔幾面有返家庭樂姐，如果係香港話踢波？做好功課未呀，咁快做好？報多兩個補習班先！好啦返哂補習班學完七國語言就俾你踢五分鐘波啦！）基於呢個原因，加上利物浦睇中左呢個後生仔，所以球會就請左個司機，專門接送佢去練波同返屋企。

唔知係今場波之後，佢既正常生活會唔會有改變呢？

好啦，話明係後生仔世界，又點止得呀Woodburn一個搶focus呀？
係木燒入完波之前既幾分鐘，18歲既Alexander-Arnold 就出左球靚波俾Origi，Origi輕鬆一poke，入埋。外媒更加形容呢球係有咸爺既招牌－Beckham-esque cross。留意返，佢出之前係有睇過個場咩位有咩人，睇下如果咁樣出波會唔會有越位，呢個觸覺同淡定/冷靜係難得既，咁當然，Origi處理呢球波既手法都係抵讚既。

Alexander-Arnold其實係上一場對熱刺既聯賽盃都有出場，更被前隊長加歷查讚佢表現令人眼前一亮！加歷查係訪問入面讚揚Alexander-Arnold係Clyne既後備人選，佢更認為呢個後生仔就係點解高普今年剩係得一個正宗右閘既原因。

好啦，講完正經野又係時間講下花邊野。話說，七年前利物浦對列斯聯，Alexander-Arnold都在場架，不過，佢唔係看台上既觀眾，亦唔係球場上既球員，而係裝扮成吉祥物企係當時加歷查既身邊。呢個利物浦既青訓出品既球員，六歲就入左利物浦足球學校，做過利物浦青年軍U16同U18既隊長， 而家大個仔啦，係尋日場波，即係做完吉祥物七年後，再次參與對戰列斯聯，今次係以球員身份出場（有得出樣架）仲要有助功添，個故事幾勵志呀！
其實今場仲有一隊既韋拿度姆、安尼簡同埋文尼。但係風頭都係後生仔搶左 ，岩既，青訓真係好重要，點樣係正式賽事去訓練呢班球員都係一門學問，睇到高普同青年軍教練都有共識、計劃點樣將佢地升上一隊，係好事黎既。