【under klopp】Clyne話自己踢到好似翼咁喎 精選

小妹今次想講下Clyne。

第一樣要講既係佢廣東話譯音：佳尼定係基連？其實小妹都唔知…所以都係用返英文啦。

Clyne入行果陣係踢水晶宮既，踢左四季（唔係陳奕迅果首呀）之後，係2012年轉會去左修咸頓，三季之後2015年俾利物浦睇中左，以一千二百五十萬鎊買佢返黎。
基本上，係高普領導下，佢都必然係正選架啦。而高普對佢既期望都唔低架，亦要求佢打一個同前球隊唔同既職責－除左防守之外，更加要上前幫手進攻。而Clyne自己亦都話佢變左右翼咁。 高普鐘意一個進攻係由龍門開波開始，但同時條防線要穩陣，唔好人地一個反擊後防會返唔切無人。咁當然啦，如果前場球員可以不斷控球在腳，keep住個波係前半場，佢地既工作都相對都輕鬆好多。但呢個打法其實係有問題， 無左lalala就少左one two同交叉走位引人走，變相古天奴費明奴文尼成個組合都好似打麻雀三缺一咁（咁公平啲講，費明奴間唔中都有做拉空既）。

Clyne原本既打法就係比較傳統既閘，即係會先做好防守，有機會就幫手進攻上去前場出波，無可否應，呢幾個月，我地都睇到佢做多左野，疊瓦出波之外仲多左斜推去中間/後上射門，同隊友做撞牆配合，甚至有幾次仲撈埋遠射添。
現代足球其實都曚糊左傳統既足球位置概念，閘好多時都要上去進攻，而翼又要補防，高普手下第一條防線直頭係費明奴添。Clyne因為多左好多進攻責任，所以韋拿度姆、安尼簡、拉蘭拿同埋軒達臣佢地打中場但都要包返Clyne個閘位，去俾佢有空位上去進攻。
係國家隊黎講，佢都唔係必然正選，Clyne既競爭對手就係熱刺既Walker。之不過佢兩個踢法啲唔同，Walker就係更偏向進攻型既閘，簡稱比較狠；而Clyne就穩陣，而佢其中一個優點應該係體能同埋防守意識，呢個就係點解佢in terms of 身體質素同Walker差成皮但都夠料去爭英軍正選既原因。對強隊果陣多數會出Clyne，相反對弱隊就會出Walker。好似對西班牙友賽果陣就出左Clyne，但世界盃外圍賽對蘇格蘭就用左Walker。
留意返岩岩對修咸頓同新特蘭果場，利物浦條防線唔差架，雖然間唔中都有甩漏，但整體黎講都收貨呀。成日都話要一條穩健強壯既後防線，太空泛，簡單啲講就即係高普落既order就係唔俾對方有任何起腳機會，而平日佢係Melwood既訓練就係要嘗試阻止古天奴、費明奴同埋文尼既攻勢。

講到呢度，係時候去片～
https://www.youtube.com/watch?v=BXnwljf-Fws