【車迷代筆】 利物浦平安鐘價格急升 精選

由於利記小妹尋晚㩒爆左平安鐘，今日病左，所以今次由車迷我跟據利記小妹同我講咩，再加我既個人見解，為大家講下呢場波。講到明先呀，業餘架咋，大家唔好咁高求呀。至於點解我會出現，你地自己問返利記小妹啦。

作客水晶宮，利物浦個陣同平時差唔多， 不過占士米拿感冒無得出。

留意返，水晶宮既體能同體形都幾健碩，同利物浦比…利物浦的確係輸蝕，有個shot見到摩蘭奴同沙夏一齊出現，真係好似見到小矮人同呀雪一齊（雪？我話白雪公主咋）。一開場見到路夫蘭加摩蘭奴，已經有一種不祥既預感突然出現。
學返利記小妹style，講下入波先（已經知道點入既可以skip左呢part）。

16分鐘，呀Can入波，摩蘭奴岩岩好無越位出左個波俾Can，Can左腳輕鬆入波，1：0。
18分鐘，2分鐘唔夠即刻輸返球，路夫蘭解圍撻Q俾水晶宮頂入。呢個波路夫蘭可以頂俾Karius，等佢用手接嘛…1：1。
21分鐘，再過多180秒，即係3分鐘，路夫蘭將功補過。古天奴開個角球，路夫蘭頂入，1：2，留意返佢已經靠頭鎚係英超入左兩球啦。
33分鐘， 水晶宮角球搶點成功，頭鎚入波，2：2，乜又係失你呀路夫蘭生！
44分鐘，角球again，古天奴開出again，水晶宮後防睇漏左馬迪普，佢好大力既頭鎚頂入網，2：3。71分鐘，利物浦一個簡單組織，水晶宮兩個中堅拉開左，軒達臣中場一腳波俾費明奴冷靜處理，2：4。

講到呢度，係咪覺得今場波有啲亂。無錯，今場就咁睇就係一場高空戰。6球入面4球係頭鎚入波，而利物浦既入球其中兩球係來自角球，睇返數據，利物浦入場共有三個角球。但實際上利物浦好多地波組織，都幾靚架，只係未入到波姐，而水晶宮亦針對利物浦弱點，唔俾地波你，下半場換哂啲翼出黎，送多啲高波俾你。
進攻方面，其實問題不大既，都係老毛病啦。今場萬能既古天奴，分下波做下中場指揮，角球又靚 而文尼，你今場做咩姐，finishing真係麻麻。 文尼係快，但今場腳風麻麻，判斷同傳射都失色左。 一次右邊拉蘭拿出波送到佢腳底下炒飛機；另一次就係古天奴直線佢爆甩左人地中堅省龍 ，如果佢有態，呢兩球入硬，贏6球不是夢。今場高普又用上高壓戰術, 但滲透仲未做得夠好，好多球都係拉蘭拿落到底線想出波但係禁區入面無人，咁suppose費明奴或者呀Can會入到去但係我睇唔到囉。

講防守啦好無？講起就激氣。無左占士米拿真係差左咁多？

路夫蘭，我知利記小妹都幾鐘意佢但我都要話！又係兩邊高空波不穩，又唔迎個波。路夫蘭失完第一球真係變左懦夫蘭，幾球都唔敢接寧願叫返Karius出黎接波，好彩水晶宮打901無特別迫利物浦後防，唔係好易出事。而佢上半場有一球爆左上前場，作為一個中堅咁做其實好危險，亦都唔太理智。58分鐘，利物浦禁區混戰，應唔應該有12碼果球呢…睇返慢鏡，佢剷人果下真係非常狠，又係利記小妹講過既慣性預判問題，岩既就無事，錯既咪成個人訓落去囉，唉，又再次曝露中堅制空能力弱。其實明知水晶宮有BTK，會唔會出可以硬硬淨淨既卡拉雲會唔會更好呢…而摩蘭奴攻多於守，比起之前穩定性係高左，而係前場出波時機都幾好，讚下啦。之不過呢，佢既傳失醫院波亦然係度，而且呢隊不過係水晶宮，同埋有一個比佢表現得更差既路夫蘭姐。
Karius，知你威威有高普撐做正選，但係可唔可以打好啲？唔係有呀爺撐就大哂，一有人迫佢有壓力就甩手、龍門球出界等等已經見怪不怪，出迎個時機仲未掌握得好，同後衛溝通仍然有待改善。喂大佬你有壓力我都有壓力呀，知唔知你咁樣做會整壞成千上萬計既平安鐘，令到平安鐘價格上升？
利物浦後防問題一日唔解決，一日都唔會可以零封到對手，前場入幾多後場輸返幾多，次次入得多波贏但計得失球黎講可能只係+1/2，唔掂架。一隊勁既球隊唔應該係咁。或者我同另外一個方式講，打LOL，初學者有victory就好開心，唔會理自己死左幾多次；而當你越打越高lv，死多幾次人地咪多啲錢。
完。