【一齊唱】 路夫蘭,十分勁 (!?)

利永遠不會毒行 於 07/10/2016 發表 收藏文章
羅渣士係 2014年以二千萬鎊英鎊帶左克羅地亞球員路夫蘭加盟左利物浦,而呢位27歲中堅亦都受到高普既重用。
路夫蘭加盟果陣就係艾加BB走果陣,而路夫蘭係果段時期又頻頻有失誤,係有對比既情況下,佢好容易就會中箭,所以俾球迷鬧、嫌棄都係人之常情。有關輸波心理學請參閱小妹另一篇文。而係高普執教左利物浦之後慢慢幫佢重拾信心,慢慢再變做後防既中心人物。

而路夫蘭都好欣賞高普對待球員既態度。話說係二月作客對Augsburg果陣,佢囡囡就因病入左醫院,仲要做手術!有人話過,囡囡係老豆既前世情人,做老豆既唔擔心先奇。就係呢個時候,高普就同路夫蘭講,叫佢返去克羅地亞睇下囡囡先。要知道俾一個球員離隊,無事由自可,有事既話領隊要負責任架!

講下路夫蘭踢法先,佢欄截都係出色既,小妹會形容以前既佢為一個賭博型防守既後衛。點解?因為佢有理無理拍左埋去先,拍唔中就回身落腳,佢黎到利物浦既初期因為多致命失誤所以落多左腳。 而家就係鐘意預判防守,將危險係萌芽階段就解決左先既球員。佢欄截都比較大膽落腳,佢預判你個波會去一個方向,就會好狠咁落腳,唔俾機會你掂波;防守走位可能又會偏向估你下一步推去邊,估中咪閘哂,估唔中就係咁先又要落腳。呢種玩法,係食腦既。
https://www.youtube.com/watch?v=h_Xq6M9OK9I
高壓迫搶係高普Style,所以高普重用佢唔係無理由既,但要有人包位。而最近呢幾場就由Matip包左個位。留意返,佢性格火爆,踢左五場英超就已經攞左兩面黃牌。由於而家踢左只有五場,好多時候都係利物浦都禁住人黎打,或者應該話個波多數係人地前半場,暫時係比較少防守精華去參考既。

而佢場外性格都係幾…funny既。話說佢就同古積同埋Markovic一齊拍片打電話去玩古天奴,但係講講下呢位負責揸車既路夫蘭竟然雙手離開軚盤,呢個舉動好明顯危險駕駛黎。俗語都有話寜願俾人知都唔好俾人見呀嘛,鏡頭出街受管制架!今次衰左俾人投訴,警察就要做野啦。應該無事既,想當年香城舞王「這樣開車要慢一點」都無事啦。

https://www.youtube.com/watch?v=aGIizc2PoX0
不過呢,呢位後衛係對史雲斯場比賽之後受左傷!軍醫話佢行都行得好辛苦(can barely walk),因此,佢將會因傷缺席代表克羅地亞上陣既國際賽。但又不幸中既大幸,呢個星期因為國際賽,佢可以有時間去養傷,高普亦都表示佢係10月17號對曼聯果場可以出到場,期待呀。

即係咁,小妹覺得佢幾靚仔呀,紋身又幾型,佬味正呀。



留言


請按此登錄後留言。未成為會員? 立即註冊
  • 廢托變費托 於 07/10/2016 評論 NO. 1

    外國條路都冇香港咁多車 雙手離開軚盤 唔覺係危險駕駛

快捷鍵:←
快捷鍵:→