【細心的領隊】如果高普係女人，一定唔會有婆媳糾紛 精選

高普呢排都真係多新聞，先有人懷疑佢岩唔岩教利物浦，再有巴神經理人鬧佢唔公平，a piece of 屎。對於以上既指控，小妹覺得係抹黑，一定係，除非唔係。

巴神既新聞大家都睇到厭相信, 今次想講下高普。

一講高普，相信大家都會話佢熱血，好親民。無錯，熱血既形象好容易觸動球迷既心。但身為一個領隊，剩係得到球迷既支持係唔夠架，老細既認同都好重要。英超呢個聯賽對金錢既睇重，加上利物浦班主係美國人，美國人出名係咩？講錢唔講心呀。
不過啦，班美國佬都好信任高普既，點解？因為佢知慳識儉囉。高普係岩岩既轉會市場，係買人同賣人同借人之後，仍然賺到一千七百五十萬英鎊既利潤。而我地睇返佢買返既人，小妹認為大部分表現都唔錯－文尼呀、馬迪普、卡拉雲等等，除左韋拿度姆因為要轉型所以暫時未交出符合佢身價既表現（俾啲時間佢），咁就足以證明高普既眼光唔錯。
高普係一個著重發展既領隊，佢好重視每一個球員無論係心理或者生理上面。岩岩就有國際賽，高普會要求每一位球員踢完國家隊之後send個whatsapp或者send個message話佢知佢地感覺如何。如果輸波，會唔會唔開心或者唔甘心？如果嬴波，會唔會太過亢奮呢？留意返，佢地係直接send俾高普，咁小妹有兩個睇法啦，好果方面就係可以直接溝通，個親切感大啲；而唔好果方面呢就係，如果球員要講啲唔岩高普聽既野，直接對話可能會有負擔，不過應該前者機會大好多。 除左高普之外，球員亦都要向軍醫講返佢地每場波之後既身體狀況。

因為打國家隊無可否認會消左啲體力，同時有受傷既機會。有啲球員會為左球會聯賽既狀態而hea踢國家隊；相反，亦有一啲球員，好似尼馬，為左巴西，為左個金牌，佢係奧運係有出力去踢架，而踢完奧運再去國際賽！遲左9日先歸隊，咁樣無疑係會對球會有一定既影響。
一個好既領隊要平均球員去國際賽前後既心理，一個好既領隊要平衡球員出席國際賽前後既心理，舉個例如果佢好想國家隊贏，就會放100％力去踢，高普係要知道呢啲資料先夠數據去計算國際賽後果場比賽既陣容。利物浦正選岩岩去左踢國際賽既有：文尼，拉蘭拿，軒達臣，史杜列治，韋拿度姆，奧力治，古天奴。
文尼係代表塞內加爾既比賽當中懷疑傷到舊膝患，不過有驚無險，好彩經過檢查之後無咩大礙。嗯，咁下場對李斯特城，係要計下數既。

雖然，好多人都唔認同高普既德式－密集而又intense，簡稱chur既訓練，覺得呢個係導致利記傷兵既主要問題。但從高普對球員既細心，可以見到佢係有評估球員既狀態同受傷風險先作出排陣。俾多啲時間高普啦，我地會見到成果。而家利記係係一個重建階段，球迷要有耐性。
打完成篇野，點解小妹覺得高普好似係一個奶奶同老公同小朋友都好鐘意既老婆／新抱／媽媽。因為佢持家有道，老公（即係老細）最鐘意，而且佢又錫又照顧啲細路（即係球員），而球迷（即係奶奶）又好鐘意佢熱血，咁完美既人係邊度搵呀，利物浦要好好珍惜了。