【高普嬲呀】聯賽盃賽後大鬧沙基利

利永遠不會毒行 於 27/09/2018 發表 收藏文章
英格蘭聯賽盃第三圈既比賽利物浦最終被車路士反勝,換言之紅軍之後將會少一條戰線,雖然聯賽盃相比起足總盃同英超聯賽冠軍的確係無咁重要,但係高普都好唔滿意球隊最後輸左場波。呢場比賽結束之後,高普更加被媒體影到佢係球場上面大鬧沙基利,最終利物浦領隊亦有解釋自己點解會咁鬧球員。今次高普既舉動就有球迷支持有球迷反對,有人認為為沙基利今季加盟利物浦之後表現得幾對版,因此佢地就唔滿意高普公然鬧呢位瑞士國腳。但亦有球迷理解高著係表露左佢既真性情,但大家又點睇呢?
未講沙基利點解俾高普鬧之前,先講一下高普係賽後記者會所講既野先。高普就話佢認為艾馬臣攻入追平個球有越位,佢表示:「我認為車路士既第一個入波有越位,球證當時根本睇唔到佢地越位,因為球證無VAR裝備。我睇落去佢地起碼有三個人越位,相信所有人都睇到佢地越左位,就連巴克利當時都係越位位。既然球證當時無判越位,咁我地都要接受呢個賽果。」另外車路士既第一個入波間接係來自一個自由球,而呢個自由球係因為基達當時被球證吹罰犯規而出現既。高普亦都認為基達當時個動作係中波唔中腳,所以唔應該被球證吹罰。同時高普亦都承認左自己球隊既中場線做既工作並唔理想,因此車路士中場得到好多空間去做波同傳送。小編就覺得高普都講得幾岩,呢場比賽高普派出既中場的確係同聯賽所派出既唔一樣,相信高普會係週末既聯賽再一次調整正選陣容去應付車路士。
講返正題,點解高普會係場上直接鬧沙基利呢?媒體認為高普係唔滿意沙基利當時唔去處理一個自由球,而最終呢個自由球就被隊長軒達臣浪費左。當時軒達臣最終選擇傳波俾洛夫蘭,呢個唔係高普想見到既野,高普當時希望沙基利可以將個波傳去俾尾柱既沙拿。高普就話:「我同沙基利講緊當時個自由球,我想佢傳去俾尾柱既沙拿,當時全部人都係係禁區入面,而沙拿當時既位置就有更多既空間,如果當時傳到個波,可能結果又會變得唔一樣。我淨係同佢講左呢D野。」小編都明既,高普緊係未到最後一刻都唔想放棄,而沙基利無去處理呢個自由球亦有D奇怪。
雖然聯賽盃出左局,但係週末既英超聯賽亦都可以係一次唔錯既復仇機會,今次高普好有可能會出FULL TEAM迎戰,始終紅軍連勝既紀錄被車路士打斷左,而聯賽的確係比聯賽盃更重要。下場比賽中場線應該會再進一步去做壓迫,咁樣車路士就無空間去踢佢地風格既足球,今季薩利入主車路士之後明顯希望球隊做更多既傳送同保持控球,高普應該會要求球員做更多既迫搶去令到車路士犯錯,從而把握機會拎走寶貴既3分。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→