【零封殺手】利物浦後防的夜與霧

利永遠不會毒行 於 29/09/2016 發表 收藏文章
最近Matip認為利物浦需要有「零封殺手」,(新聞link),對於今季係英超未試過零封對手既利物浦,咁的確係一個目標黎既。既然呢位被球迷話係平靚正既後衛都咁講,我地又分析下利物浦既防守。

所謂既零封,即係n:0對手。

如果要一個後衛緊密地mark實對手,佢需要既係-
體能(無限氣)動作(反應要夠快)預測能力(即係捉到路)
好多時候,利物浦對中下游球隊果陣,一有優勢成班球員就攻哂上去,人地一打快反擊,好多時留後果個後衛就要同進攻既球員1on 1,呢個時候蝕底既唔洗問呀貴都知係防守既一隊,如果1on1果位後衛甩左或者漏左,就會變成單刀。如果做聯防既就唔同啦,第一個失左位,後面都有人補位。但利物浦既問題防守唔會迫人,睇返對般尼果場,人地一個counter attack你就算有哂人係後半場咁又點,禁區外無人去做欄截,一直俾人推推推推推推推推推推推推推推再起腳。
高普行高位防守,由進攻區開始迫搶,衰啲講犯規都無所謂。但到返自己後半場個陣地就有待觀察、個勢唔同哂。即係咁,唔係話無陣地防守,反而係失位既情況較多 。講到要由進攻區開始迫搶,睇返對般尼果場,第一球失波就reveal哂利物浦後防既問題。卡拉雲俾人迫到要轉邊,但唔到位,Clyne無乜位傳夾硬俾拉蘭拿但唔夠力俾人截,再跟住俾人counter attack。 呢球波軒達臣都有責任,佢返後幫波但傳球選擇好差,龍門球要完波之後踩正人地個trap交俾卡拉雲,但其實佢要完波果下應該要留意倒卡拉雲個位好易俾人迫死。而另外贏果幾場既輸波,睇落都係同一個問題,無溝通、無默契。四五個人去追一個波,但最慘係睇漏人喎。

雖然我地都睇到軒達臣既進步,包括佢對車仔果場既球世界波,但軒達臣既死穴仲係存在係度,成日交完波之後都企定定唔識走位幫波。佢同沙比既分別就係-防中位既軒達臣就剩係識追波唔識封位。而佢亦無咩幫隊友解圍既意識,佢唔主動要波既時候好難交俾佢。
呢個情況好明顯睇到利物浦陣地防守是成日都有唔集中既情況。後場總要有一個指輝,而利物浦無一個明確既後防指揮。通常呢,呢啲位多數一係由龍門做;一係就中堅做。 要改善呢個情況,就一定要有個總指揮,而呢個位,小妹覺得係現有既選擇中可以由占士米拿擔任。點解呢,因為佢有英超經驗,又算係穩穩陣陣。米奴列最唔掂既其中一點就係指揮後防,而新仔Karius暫時未夠班去做呢個位;Matip係有前途但太年輕,你知啦,候生仔做錯野俾人鬧既機會係十倍架啦(社會既錯)。卡拉雲路夫雲唔係唔好,有經驗但始終係英超唔耐。老老竇竇而家身位左閘既占士米拿係咪一個好領袖呢?未必,佢防守意識唔算話一流但勝在勤力,配合球隊迫搶戰術特色搭救。
總結啦,雖然話進攻就係最好既防守,而球隊最近水銀瀉地既進攻又極具觀賞價值,高普既執教功力絕對值得嘉許。不過話分兩頭,歷史話俾我地知,華麗既進攻並唔能夠為球隊帶黎錦標,球隊既成績要突破就必須要配合穩健既防守。否則前場入再多波都唔夠。

要知道高額英超轉播費收入大大拉近左20隊球隊之間既差距,而中下游既球隊為左保住一席亦唔會有手鬆既情況出現,球隊表現只要回落少少就好難保証唔會失分。加上文尼遲下又要去踢非洲盃,前場既進攻到時定必受到一定既影響。呀!都未計聖誕節一周兩戰既地獄賽程,理性地睇,我地總唔可以太貪心要求場場入3,4,5,6球(雖然小妹好想)。而且全場迫搶需要既體能未必個個都能夠應付, 特別係聖誕地獄賽程,仲有傷患既問題(球隊都幾多專業既文職足球員員坐陣)。

所以用高位迫搶配合穩健既陣地防守做到零封對手不但可以幫助球隊先穩住一分再寄望全取三分,同時又可以一定程度上保留球員體力唔駛佢地場場扯到盡
作為球迷我地當然想球隊場場大勝啦。但有時。如果想球隊有更好既成績, 醜陋地嬴可能是個唔錯既選擇…

也不問贏得慘淡 輸得燦爛 向世界挑戰~~

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Hok Kam Yau
    Hok Kam Yau 於 29/09/2016 評論 NO. 1

    需要馬體會d後防

  • ガリレオ トレイズ
    ガリレオ トレイズ 於 29/09/2016 評論 NO. 2

    真心好難,馬體都要幾年先成功

  • Des Mondo
    Des Mondo 於 29/09/2016 評論 NO. 3

    而家其實好似去返以前spice boys 時代,有前無後,打死罷就

  • KaHo Gor SK
    KaHo Gor SK 於 29/09/2016 評論 NO. 4

    都要一套防守套路同提場

  • Cliff Chan Kuanfai
    Cliff Chan Kuanfai 於 29/09/2016 評論 NO. 5

    唔想赢得凄淡,输得灿烂...我要赢得有风度,输都有态度....保持咁嘅势就得!永不独行

  • Kenneth Lai
    Kenneth Lai 於 29/09/2016 評論 NO. 6

    如果留返托尼係度
    雖然佢未必夠力打足全場
    但起碼可以做統籌防線
    不過人都走咗
    要花多啲時間執

  • Frankie Yip
    Frankie Yip 於 29/09/2016 評論 NO. 7

    其實有路飛/盧神喺中堅位個防線組織同補位會做得好好多,只係咁岩佢地出場既時候都會真係有尐波輸左孤寒/真係人地入得靚姐...
    路飛個正選位無傷無病都係走唔甩架啦

  • Chong Min
    Chong Min 於 29/09/2016 評論 NO. 8

    利记打法体能要求很高,德甲有冬季休息,英超反而3天2赛。

  • Lancelot Leung
    Lancelot Leung 於 29/09/2016 評論 NO. 9

    唔係講左好幾年
    係已經講左好幾代....

快捷鍵:←
快捷鍵:→