【錢作怪】古積留喺利物浦嘅原因?!

利永遠不會毒行 於 17/08/2018 發表 收藏文章
上季外借卡迪夫城,世界盃入選塞爾維亞國家隊嘅古積就歸咗隊啦!大家係咪好耐無見過佢著利物浦波衫呢?而利物浦最近就拒絕咗拖連奴對古積嘅問價喎,有傳拖連奴想以借一季後,下季再用£9m買斷呢位塞爾維亞藉球員。
跟據利物浦迴聲報報導,利物浦開價£20m嘅古蹟,如果要以外借方式離隊,球會希望可以先同佢續新約,點解?因為早喺2016年1月同利物浦簽咗五年約,換句話即係佢而家同利物浦仲有兩年半嘅合約,如果借完一季再買,得返一年約個cost自然會低咗,利物浦相對賺少咗嘛(FSG出名睇錢架嘛);而剩低合約期短呢樣野亦係令到歐洲嘅各大球會對古積有興趣嘅原因。

高普就指22歲仔嘅古積有巨大嘅潛質,未來好有機會成其中一名利物浦主力球員;無錯,係未來呀,而家嘅古積喺利物浦都未搵到一個固定嘅上陣機會;佢本身上季季初開波果陣就應該被外借,但因為受傷患困擾,拖到夏季轉會市場後先外借卡迪夫城。係卡迪夫城佢差唔多場場都有上陣機會,更喺十四場比賽入面射入一球波。呢名中場球員都有入選到國家隊,更有隨隊去俄羅斯踢世界盃,但就並未有機會上陣。
除咗拒絕拖連奴之外,有報導指出古積亦將會拒絕卡迪夫城績借以及米杜士堡嘅問價。意大利聯賽嘅轉會市場將會喺本周五完結,唔知之前曾經傳過對古積有興趣嘅AC米蘭以及拉素會唔會趕尾班車完成交易呢?外媒express.co.uk就估計古積就算走,都唔會離開英格蘭聯賽架啦;題外話啦,英超轉會市場8月9日條死線嘅只係適用於買人,而借人嘅deadline係8月31日;所以,一切仲有變數架。

如果高普留古積喺利物浦,估計佢都唔會有太多一隊上陣機會,點解?因為利物浦今季仲買埋拿比基達同埋法賓奴,論級數同埋經驗,古積真係...所以,如果可以借走佢,俾佢係其他球隊以一隊正選身份上陣爭取經驗,一季後歸隊再回饋利物浦,應該會係win win,雙贏嘅情況;而且而家想借佢嘅都係英超/英格蘭球會,喺適應當地比賽節奏上應該問題不大;所以跟據以上種種因素,絕對係有跡像顯示係錢作怪。
留意返,古積當年由Red Star以£5.1m加盟利物浦,係高普前副手Buvac石內卜話要買而促成,而家高普大腦石內卜都離隊了,古積個定位應該點樣呢?擺佢踢一隊定主力踢質素低啲嘅U23?喺球會財政層面上,續約定借走,高普又打算點樣做?只要條數計岩之後,相信好快就會有定案...好似係。

source:express.co.uk, Transfermarkt



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→