【超市開張】利物浦清貨,奧歷治﹑恩斯等人有機會離隊

利永遠不會毒行 於 24/07/2018 發表 收藏文章
今個轉會窗,相信利物浦球迷都幾驚喜,因為紅軍今年轉會工作做得十分爽手,法賓奴﹑上年買嘅基達﹑艾利臣同加上沙基利,其實宜家隊波都已經開始齊腳,當然仲需要時間去訓練同磨合啦,小編唯一比較擔心嘅係張伯倫嘅受傷,呢個球員宜家正係處於黃金年齡,係呢個情況下受傷亦係十分可惜,再加上新加盟嘅基達同法賓奴,張伯倫想係復出之後搵返個正選位亦都並唔容易,而更擔心嘅係高普會唔會再係中場買人以彌補返今季張伯倫踢唔到嘅空缺。今季利物浦係轉會市場上面其實已經用左1億7000萬英鎊,而宜家紅軍就計劃用淨低嘅時間去做大清洗,希望收返大約1億英鎊。
而利物浦就希望清洗七名球員,第一個首當其衝嘅係比利時小將奧歷治,呢位比利時球員上季被外借到禾夫斯堡,而今季返左黎之後係熱身賽一直未有好嘅表現,而紅軍亦都唔介意將佢出售,利物浦希望係奧歷治身上面收返2700萬英鎊(3000萬歐元),西甲球會華倫西亞就有意引入此子,相信係前鋒線人滿為患既情況之下,高普都會同意呢單交易。另外,丹尼恩斯﹑奧祖﹑馬高域﹑米勞列﹑古積同埋小將Chirivella都有望係今個轉會窗關閉之前離開利物浦。丹尼恩斯今次無跟隨利物浦前往美國參與季前熱身賽,呢位英格蘭人亦都希望搵一支可以踢到正選既球隊,紅軍希望係佢身上面收返2000萬英鎊,而一眾英超球隊,例如水晶宮﹑修咸頓﹑李斯特城同埋紐卡素都有意引入呢位前般尼前鋒。高普本人其實就唔希望見到丹尼恩斯離隊,不過亦都理解到佢希望離開嘅原因,小編只可以感慨一句丹尼恩斯加盟得唔合時。
另外中場嘅古積就仍然未決定自己係唔係應該繼續留隊,意甲球會拉素就希望買入呢位塞爾維亞小將,利物浦為佢身上標價2000萬英鎊先會考慮放人,紅軍更傾向同呢位22歲球員簽份新約,繼而再外借到卡迪夫城。另一位小將奧祖,上季被外借到富咸效力,紅軍為佢標價1500萬英鎊,如果無人出手的話,相信利物浦會再次外借呢位小將。而翼鋒位嘅馬高域就已經吸引左安德列治同基達菲等球會嘅興趣,呢位球員其實速度幾高,但係表現一般,而佢嘅身價大約係700萬英鎊。另外丹尼禾特已經被紅軍賣到李斯特城,紅軍係佢身上收返1250萬英鎊轉會費,相信米勞列都會以差唔多嘅價錢被賣。富咸有意亦有問過米勞列嘅價格,但係轉會費方面好似嚇怕左富咸,如果紅軍決定放人,相信利物浦都會願意讓步以更低價錢賣走比利時人。而最後一位小將Chirivella亦已經吸引左諾定咸森林同埋史雲斯嘅興趣,佢嘅身價大約係500萬英鎊左右,呢位小將離開利物浦嘅機會都相當大。今次利物浦超市開張,相信紅軍都志在清人,所以轉會費方面應該仲有得商議,但係轉會市場得返兩個星期多D,紅軍要清人就要快手啦。

如果喜歡我們的文章,請即分享到︰

標籤: 清貨  利物浦  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→