【賽前(無養份)分析】車路士對利物浦

利永遠不會毒行 於 16/09/2016 發表 收藏文章
講到車路士對利物浦,我諗好多人都會起一個字-slip。

係囉做咩講埋啲咁掃興、又係啲陳年舊事既野做咩姐,正所謂要忘記背後,努力面前,小妹都係想諗個開頭俾呢篇文姐。

好啦入返正題,今次想講既係今晚星期五(又即係17/9 0300)既英超比賽,利物浦作客車路士。

雖然利物浦係上場贏左上季冠軍李斯特城4:1,但係車仔都唔弱,係最近四場攞左10分,排積分榜第二。車仔同利物浦呢個星期都無歐聯歐霸,所以大家都無特別優勢或者劣勢。利物浦方面,之前隻眼腫左既路夫雲同呀Can都好返啦,但係由於呀Can本週初先可始跟操,狀態未必係最好。上場只係出左15分鐘既古天奴應該抖夠(上星期國際賽),如無意外正選都會有佢份。

而今場車仔David Luiz將會係一個亮點,呢場係佢從巴黎聖日耳門重返車路士既第一場英超。估計係因應泰利有傷,會sub左佢個位踢。其實車仔啲人腳都唔差,所以今場絕對係硬仗,係無錯,係打一場硬仗!
夏薩特,出左名以厲害的創造力、速度還有控球技術而聞名,他的爆發力和變速轉向落底線的能力相當突出,邊路有佢係度,對利物浦黎講實屬一個考驗。但係呢,佢就懶懶地唔鐘意回防。要應對佢,相信高普都會派出一個夠快、又要識把握機會進攻既人,小妹第一個諗起基連。之前前曼聯球員柏加都有讚佢係一個會用腦既球員-會先考慮防守之後再去諗進攻既後衛。
另一個要小心既當然係costa,點解呢?第一佢茅!佢粗魯!佢脾氣唔好!佢鐘意玩報復(小妹不嬲對佢有偏見)要守住佢真係唔易,話哂佢係跑動、企位、身位、頭槌制空能力同激嬲你方面都唔差,硬碰硬利物浦都係蝕低架啦。Costa多數都會中間但偏左去踢,咁即係要辛苦新仔matip同埋路夫雲啦(卡拉雲都有機會,上場後備),係呀出路夫雲都唔要lucas呀!

講完防守,講下點攻呀。

文尼呢位小明就必出架啦。但係面對艾斯派古達,又係另一個小明。再加上david luiz 同埋加利卡希爾,好明顯係想封死利物浦既快攻。對車仔最怕干地擺鐵筒陣(般尼對利果場咁),好似前兩季謝拉特slip左果場咁(不要再說了)。但留意返,David Luiz,卡希爾,Ivanovic 都唔係快,換句話講即係利物浦左路生性既話係有機,而卡希爾岩岩係對史雲斯既比賽當中係有唔少失誤,左如果佢keep住呢個失誤狀態,其實相信利物浦派出上場搶哂focus既費明奴同埋休息夠既古天奴,要突破呢條線又唔係話無可能喎。

波係圓既,係球場上咩都可以發生,但睇返呢場小妹最擔心既野就係利物浦球員會唔會被挑釁而做出唔係「和理非非」既行為而攞牌;第二樣就係擔心受傷問題,始終整體黎講,車仔係身位上都比利物浦優勝。可能你會話,痴線而家打交定踢波,但睇返上年costa自稱「無心」用腳鏟落Skrtel個心口、又試過球證走漏眼(嬲)…加上利物浦路夫雲脾氣都係燥底好驚佢忽然勇武上身。嗯,即係小妹覺得而家呢個世代咩都有可能發生。


由於小妹仲係好嬲,所以俾我貼左幾張skrtel俾costa侵犯既相!


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Gor SK
    Gor SK 於 16/09/2016 評論 NO. 1

    有偏見都正常,佢之前真係幾多小動作,不過而家俾人小過好啲,你唔挑佢機應該無事,小心簡迪限制你地前場發揮好過

  • Calvin Cheung
    Calvin Cheung 於 16/09/2016 評論 NO. 2

    比你估到仲叫_ _ _(自己填)

  • KaWing Wong
    KaWing Wong 於 16/09/2016 評論 NO. 3

    一定要出軒達臣對付哥斯達

  • Leung Kwan Kiu
    Leung Kwan Kiu 於 16/09/2016 評論 NO. 4

    Costa真係好慘

  • Aero Tong
    Aero Tong 於 17/09/2016 評論 NO. 5

    咩都好,我淨係想話譯名唔好又中文又英文,睇到眼盲都未掂。

快捷鍵:←
快捷鍵:→