【賽前分析】雙紅會會會會會會

利永遠不會毒行 於 16/10/2016 發表 收藏文章
期一凌晨三點鐘係英超第八周最後一輪既賽事,利物浦主場迎戰曼聯,亦係本輪最有睇頭既賽事。「雙紅會」一向都有一定既話題性,呢點我諗大家都同意。兩隊既恩怨講到踢完場波都未必講得完,遠既唔講就講近既-最近兩季利物浦就係因為俾曼聯雙殺而分別係今年同前年失去左歐霸同歐聯既資格,呢兩年兩隊排名接近,兩場都係6分波黎嫁大佬。

作為後生囡,小妹就唔打算同大家講自古以來既恩怨,大家理性啲,以波論波去睇今場大戰。

先講兩隊既打法,利物浦主帥高普既高壓迫搶就出晒名既1而摩佬最擅長既鐵桶陣偏偏就係高普最唔擅長應付既戰術。用欣賞球賽既角度呢場絕對係精彩既對決,究竟係高普以攻代守瘋狂迫搶會擊潰對手,定係摩連奴既鐵桶防守技勝一籌?

利物浦今年除左瘋狂迫搶出名之外,強橫既進攻能力亦係一個看點。今場雖然拉蘭拿有傷在身可能未能趕及出戰呢場雙紅會。不過唔駛擔心,我地仲有前場三寶-古天奴,法明奴同文尼。個個都速度技術兼備,配合最近榮升英軍隊長既神軒同埋好似趕得切復出既wijnaidum,小妹相信佢地絕對有能力撕破曼聯既鐵桶擊倒對手。
至於曼聯既中前場keyword亦都係三,三巴-前場既最強尖刀伊巴,中場世界第一「貴」既普巴,同後備席最高人工既月巴。先講伊巴,人稱呂布既伊巴進攻能力無容質疑(利物浦前場三寶大戰呂布,係咪即係三英戰呂布既劇目),頭頂腳踢樣樣皆能,仲要唔難入既波唔射,絕對係利物浦後防既心腹大患。加上前年後備上陣一個扭晒我地利物浦大半條防線既Martial,曼聯前線實力絕對不比利遜色。

中場方面,小妹對曼聯中場線既唯一形容詞就係豪華,剩係一個普巴都夠買起好多英超球隊,仲有技術型既西班牙孖寶Herrera、Mata。仲有曼聯青訓出品既連加特同拉舒福特,防守偏向既有舒拉達連,派牌又有卡域克,真係估唔倒摩佬點排。

如果拉蘭拿趕唔切復出,相信佢既位置會俾都係新近傷癒既呀Can取代。呀Can雖然分波同迫搶協防既意識都同拉蘭拿有一定差距,但佢勝左高頭大馬加上步大大雄、或者可以為球隊帶黎唔同既味道,聯同開始習慣高普戰術既wijnaidum同埋全英超跑得最多既球員之一隊長神軒組成一條實而不華既防線,相信有能力同曼聯既豪華陣容對抗。
至於防線,估計陣容應該係最勤力既兩閘clyne同副隊米拿;又有好高既馬迪普同好有佬味既路夫蘭。留意返,我地今年英超比賽入面係未試過零失球嫁,係未試過!係未試過!係未試過!(因為很重要所以要講三次)唔知今場又可唔可以作出零的突破定繼續俾人破左個零呢?

曼聯既防線就有經過多年訓練,用雪糕桶後衛作交換鍊成既最強龍門聖基亞,雙中堅應該會係史摩寧同拜利,兩閘盲佬同華倫西亞,牌面上都唔差。但今季表現麻麻,7場失左8球(靜雞雞講,我地7場失10球)。

總括而言,今季到而家計,暫時利物浦既狀態好似比曼聯好,以利既攻力,只要發揮水準,目標當然係要全取三分(相信有好多機會俾迪基亞表演)。當然波係圓既,作為球迷我地,只要球隊發揮得好就夠了!最緊要有信心!

題外話: 係小妹打緊文既同時,車仔嬴左三粒, 所以小好又要去R水吹啦(有追開既知咩事),拜拜你條尾~~~

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Estyip
    Estyip 於 16/10/2016 評論 NO. 1

    步大力雄

  • Kelvin Wong
    Kelvin Wong 於 16/10/2016 評論 NO. 2

    呢場曼聯凶多吉少,比較兩隊今季既踢法,利記踢得爽好多,加上佢地對傳統Big4特別勁,而曼聯今季好多時贏波都唔係好有說服力,好多時進攻組織好似唔知點做咁,所以呢場曼聯真係危危乎。利申:曼

  • Henry Cheah
    Henry Cheah 於 16/10/2016 評論 NO. 3

    yysiiussiiiāiāoiaiiiā龙
    q

    哦o si iso so o

  • Wanhang Chan
    Wanhang Chan 於 16/10/2016 評論 NO. 4

    曼究竟係強隊定弱隊呢

  • Pun Chan
    Pun Chan 於 16/10/2016 評論 NO. 5

    曼聯幾時變咗鐵桶陣?今季一啲都唔覺喎

  • Pun Chan
    Pun Chan 於 16/10/2016 評論 NO. 6

    利記最危險係全世界都睇好就.............

  • Chong Yu
    Chong Yu 於 16/10/2016 評論 NO. 7

    和波居多

  • Titan Chan
    Titan Chan 於 16/10/2016 評論 NO. 8

    當然係利記全取3分

  • Shaco Chau
    Shaco Chau 於 16/10/2016 評論 NO. 9

    希望利今晚可以濟下貧
    利申曼

  • Sio Fai Chang
    Sio Fai Chang 於 17/10/2016 評論 NO. 10

    星期二晚凌晨三點踢喎大佬,你寫星期一凌晨三點,嚇得我,以為踢左!專業啲啦

快捷鍵:←
快捷鍵:→