【賣定唔賣】傳聞點講盧卡斯、古天奴、沙高?

利永遠不會毒行 於 20/01/2017 發表 收藏文章
利物浦1:0普利茅夫,功臣一定係頂入波嘅盧卡斯。咁之前有傳利物浦會賣走佢,之後再有傳因為軒達臣傷得合時,所以唔會賣佢,再去到最近軒達臣都傷癒啦,高普都唔會賣佢喎。

有消息指出,盧卡斯將會拒絕返巴西踢明尼路嘅機會。30歲嘅佢其實都唔算後生啦,係利物浦都係未做到必然正選,但係佢依然想係歐洲踢多幾年波先。而早前佢都被AC米蘭睇中,但呢名防中就俾左檸檬人食,而高普亦都宣示主權,表示佢唔想盧卡斯走,希望「讓你留在我身邊」直到…至少今季完呀。
講完盧卡斯,再講古天奴,呢名巴西球員係對曼聯果場復出左,相信大家對佢嘅復元、表現都滿意。咁好野就一定有人爭,之前傳話想買古天奴嘅巴塞最緊又有新搞作,今次就係由前巴塞加巴西球員李華度出聲-佢話佢好有信心古天奴離開晏菲路而加盟魯營,因為巴塞吸引力大囉!而巴塞亦都需要呢位好outstanding嘅球員,就算巴塞已經有好多好有水準嘅球員,但古天奴嘅加盟一定會對球隊有好大嘅幫助。
而李華度所講嘅其中一個理由係-古天奴係一位出色嘅球員,而佢同尼馬又係好好嘅朋友。又係好朋友呢個point,小妹真係聽到悶聽到燥。可能小妹膚淺,但你會唔會係自己公司做得好地地,又唔係無朋友喎, 而因為另一個朋友而轉工呀?而家費明奴唔係佢好朋友?而家跨國藉嘅就唔可以係好朋友?好朋友好朋友好你個頭呀!
之後要提下嘅就係沙高,沙高因為之前私自離隊落高普面就被雪藏, 雖然今季佢一場都無出過,但係依然有球會對佢有興趣。傳聞中,身為修咸頓熟客仔嘅利物浦,不過今次調返轉,修咸頓想借用沙高喎呢單傳得最行。但利物浦就say no啦,唔借只賣呀,之後仲開開價二千萬鎊英鎊想賣佢…老實講,小妹都覺得唔抵。但正所謂千金難買心頭好,加上修咸頓隊長方迪好大機會離隊,所以…所以都係無嘅。因為修咸頓老細Claude Pael就用去“speculation” 去形容呢個傳聞,更加話佢識沙高,但無聽過呢單野。而方迪嘅離隊後嘅空位可以內部晉升,唔洗下下請外面人嘅。

Well,即係沙高嘅前程都不明。高普都想係仲佢有價值果陣賣斷佢嘅,要知道借用果陣有好表現就升值姐,但係如果踢得差就眨架啦喎!再提下小道消息指出贏左利物浦4:3嘅般尼茅夫都表示對沙高有興趣嘅,要知道佢地向車路士借用泰利不成功嘛;另外外媒亦有指西布朗同史雲斯、西甲西維爾,土超嘅加拉塔沙雷同埋俄超嘅莫斯科斯巴達,我地即管睇下呢單交易會有咩發展啦。

唔想賣就要有人買,想賣就搵唔岩買家…係咁架啦,小妹想買衫果陣都搵唔到岩價錢又岩款嘅,月尾無錢窮到燶果陣先會有心水貨…世事就係咁,一定係社會嘅錯,再唔係一定係土地問題!


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Fan Lau
    Fan Lau 於 20/01/2017 評論 NO. 1

    直頭係貧懸殊問題,不獨社會問題也是球會問題

  • joesiu
    joesiu 於 20/01/2017 評論 NO. 2

    阿妹打錯字…
    賣沙高換個錢買更好的係好
    但唔借又點畀人睇辦呢?
    盧卡斯一直都唔係後防材料
    但防中又冇立足之地
    睇怕第二個祖阿倫
    古天奴轉會煲水居多,唔使理

快捷鍵:←
快捷鍵:→