【調查進行中】利物浦有機會被DQ聯賽盃 ?!?!?!

利永遠不會毒行 於 30/09/2019 發表 收藏文章
利物浦有機會被DQ Carabao Cup(即 聯賽盃)資格!?
事源係咁嘅,EFL(主辦單位)懷疑利物浦喺對MK Dons果場聯賽盃入面有不合資格嘅球員上陣喎。
報導指出,利物浦陣中西班牙藉球員,68號仔Pedro Chirivella於下半場66分鐘換入,呢位22歲嘅中場球員2015年7月加盟利物浦,當年以19歲之齡踢過3場FA Cup,1場歐霸以及1場英超;及後佢就被外借荷蘭球會Go Ahead Eagles以及Willem II。而佢於2018/19嘅下半季就被外借至西班牙乙組球隊Extremadura。
計計數,即係自2016年5月後,佢第一次為利物浦一隊上陣。今季返翻去晏菲路,佢需要重新於轉會市場登記先可以正式回歸母會。而據知利物浦方面,其實早喺7月已經為Chirivella提出申請,但由於呢個程序需要足總介入先會完成到,所以未知係咪涉及一啲行政上嘅問題。
現階段EFL已經就事件作出回應,更在聲明中指出利物浦賽事上有未合資格球員上陣一事表示「正關注事件中(currently considering the matter)」 。

當然,如果事件屬實,利物浦將會受到EFL嘅懲罰,輕則罰錢,重則就會被DQ。

而利物浦方面亦作出聲明,指球會意識到與一名球員有潛在嘅行政問題。相關嘅同事已經同唔同嘅部門合作,希望可以查出真相。而現階段唔會再俾任何意見。
睇返過往嘅案例先,2014年新特蘭球員池東源被指不附合資格為球會上陣,而當時佢已經踢咗4場英超以及一場聯賽盃。經過調查後,最後發現原來係局方出錯,所以新特蘭無須受罰。當然,EFL有絕對嘅權力同能力於聯賽盃DQ利物浦,但跟據The Telegraph記者Chris Bascombe嘅說法,今次利物浦呢件事好大機會都係足總(FA)於行政上出錯,而佢認為就算真係利物浦方面有疏忽,呢類型嘅懲罰多都係罰錢了事。

雖然當局未有成立獨立調查委員會,但相信EFL會公正公平去調查處理事件嘅!

source:
cnntelegraphthe guardianthe sun

留言


請按此登錄後留言。未成為會員? 立即註冊
    快捷鍵:←
    快捷鍵:→