【英格蘭對馬耳他】當你心儀既男仔係車迷…(3)

利永遠不會毒行 於 09/10/2016 發表 收藏文章
自從上次被藍剔後,小妹都未搵過車迷。其實都「囉囉攣」,想搵又唔知有咩借口搵佢,想打句「Hi」,但之後又唔知講咩好,唔通講話「你知唔知我好掛住你咩…」。

今個星期國際賽,英格蘭對馬耳他。

而係陣容上面,有利物浦既史杜列治同軒達臣加車仔既Cahill,其實佢地三個都有個共通點-英超既表現都係麻麻地,之不過呢個又係一個機會俾小妹去搵下車迷傾下波經(雙眼發亮)。而呢場對馬耳他,數據上實力真係無得比,馬耳他世界排名仲低過香港,咁你明啦。(FIFA排名:英格蘭12 馬耳他176 香港勁揪143)

今場由修夫基暫時教住先,都係出返隊長月巴,陣容同大Sam果陣相約。

老老竇竇,對得強隊,實力又差咁遠,馬耳他一定係著重防守多於攻,而係場波度都見到馬耳他踢901。呢個情況咁熟面口既?英格蘭係咪面對緊同利物浦一樣既問題,點樣對住啲只守唔攻既球隊呢?如果對方肯攻,後防起碼會有空位俾你counter attack呀,佢只係守,排巴士,你點入波呢?

係上半場中段,軒達臣傳中波落點幾靚,DeleAlli頂得唔錯不過中正個龍救到,但史毒執雞竟然同我炒機?okay呢球算數,但你一有波就死扭,又要個人表現,一人突破(點解要咁?英雄主義,威囉!我唔鐘意你,我可以唔傳波俾你…)利物浦上場拉蘭拿傷出換你入場又係咁,雖然高普都開聲話唔鐘意英超其間既國際賽,但小妹就咁諗,如果自己教唔掂既話,有時俾下外人教下都未必係壞事:0)。題外話,小妹發現左史毒用個頭頂波中龍個比率比用腳高喎。
鬧還鬧,史毒28分鐘為英格蘭先開紀錄,軒達臣出球靚波,彎度位岩岩好落正史毒個頭,做就佢頭鎚入波,1:0。要讚既係神軒幾球傳波都幾到位,37分鐘史東斯一個突破,神軒唔貪功,加上Dele Alli反應快,自己射中龍門再補中入波,2:0。
下半場,好悶呀。人地真係守得好緊密,一見你前場攞波就搵兩個人去迫你,禾確特直頭封死哂。馬耳其個龍門Hogg表現超哂班,後防指揮唔錯。就算輸兩球都唔可以怪佢。
最後想講下連加特第一場代表英格蘭上陣,唔怯場仲有射門,仲有幾次機會開齋,算係咁啦。而今場軒達臣同月巴都夾得幾好,分波都唔錯,傳波俾邊個判斷好好,真係會睇哂個場邊個有空位先落腳(部分原因係人地慢所以容許佢咁做),月巴踢得都不過不失架啦,只係係尾段好急想入波。而Cahill掂左幾多次波話?佢有間唔中上去攻下既,但由於對方無咩進攻所以佢既曝光率都比較低。

賽後軒達臣都話佢同朗尼part係“good”,而佢對係差唔多完場前錯失梅開二度機會既AlliDeli並無失去信心,更認為係往後既賽事係可以俾多啲波佢踢。修夫基第一場執教就贏波,係一個好開始;而AlliDeli係完場後都讚佢係一個好領隊,知道球員最岩踢邊個位。好事黎既,新領隊同球隊始終要時間去磨合,相信佢都睇到呢場英格蘭前場默契麻麻,走位就更差;好多時兩邊出左個波但原來中間無人,浪費左好多機會,修夫基睇黎俾啲功夫搞搞佢喎。

只不過呢,話哂蘇格蘭都贏到馬耳他5:1,有咩理由英格蘭…小妹知道有時啲野唔可以咁比較,時間地點風速等外在因素都唔同,但真係好失望囉。


睇完場波其實都悶到訓著架啦,但當小妹終於鼓起勇氣,send出左一句:「喂,你有無睇英格蘭呀?」

車迷:「無喎。做咩?」

早抖咁多位。



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Brian Lau
    Brian Lau 於 09/10/2016 評論 NO. 1

    英格蘭終於返來了.對住馬爾他呢D咁強既對手.都可以輕取兩球.真係犀利.

  • Carlos Lau
    Carlos Lau 於 09/10/2016 評論 NO. 2

    睇港隊好過睇英格蘭

  • 楊子謙
    楊子謙 於 09/10/2016 評論 NO. 3

    英軍真係一啲職業道德都冇……想撐你都唔知揾乜嘢藉口,我諗未來二十年都唔使旨意英格蘭攞到任何錦標…

  • Mankinwai Siu
    Mankinwai Siu 於 09/10/2016 評論 NO. 4

    英軍一向都係雷聲大雨點少,羸左都算有交代啦,唔係覺得大炒呀
    最後果句好笑,車迷秒殺左小編😂

  • Fung NG
    Fung NG 於 09/10/2016 評論 NO. 5

    點解要咁?英雄主義,威囉!我唔鐘意你,我可以唔傳波俾你…尼句好正😂👍🏽

  • Sunnybaby
    Sunnybaby 於 09/10/2016 評論 NO. 6

    車迷又點會因為 Cahill 而睇英格蘭呀?
    睇黎你都係比呢個車迷食硬~
    話時話你個車迷唔會睇你D 文架咩?

  • louis421
    louis421 於 10/10/2016 評論 NO. 7

    月巴都係想留力下場炒你隊猁姐

  • Cheng Chan
    Cheng Chan 於 10/10/2016 評論 NO. 8

    無乜興趣

  • KaHo Gor SK
    KaHo Gor SK 於 10/10/2016 評論 NO. 9

    如果有女仔心儀男車迷⋯⋯

快捷鍵:←
快捷鍵:→