【略有所聞】聖誕快車之魔咒 精選

今日放工，搭船過海，原來已經有聖誕燈飾。氣溫下跌，街上已經有人著羽絨，去到尖沙嘴，海港城既聖誕街已經唔知俾香港人定係遊客迫爆左，睇住住街裡愛人一對對，無眼睇。開個IG FACEBOOK SNAPCHAT睇，又係閃光彈，為免雙目失明，小妹唯有聽歌算。唉，都唔知係咪部電話都想恥笑小妹，Random播都可以播到《Lonely Christmas 》 ，Okay唔聽歌囉，但碼頭又有人busking緊《可惜沒如果》，小妹皮已收。

因為無咩野做，行左去海旁吹下風，撞岩8點鐘，嘩播埋哂啲新年歌咁，最後仲要先用普通話講個騷完左，小妹心諗，咩料，呀原來係做緊幻彩詠噹噹（唔記得叫咩名啦，反正呢啲光污染都唔係俾香港人睇）。既然呢度都無小妹既容身之處，咁唯有返屋企啦，聖誕節，睇波啦！
所以，小妹覺得英超真係好照顧到我呢啲毒毒既感覺。點解，因為《聖誕快車》上映囉，唔係講緊套戲，你地唔係以為呢啲大時大節買飛下話？小妹講緊既係英超係12月密集式咁打比賽！留係屋企睇波，好過出街眼冤，又可以陪下兩老做下孝女，最緊要係洗少啲錢，何樂而不為？

咁我地睇下利物浦既12月（聖誕）賽程先。
先有20日作客打比對愛華頓，再有27號主場對史篤城，31日仲不得了，有利物浦主場對曼城。劇本一早已經為小妹寫好！倒數你注定一人！
不如等小妹講下唔同既聖誕傳說呀！

講開聖誕快車，唔知大家又有無聽過The Curse of Christmas？聽講呢個又係一個魔咒黎，即聖誕節在英超聯賽榜底果隊球隊會係賽季結束既時候降班。咁曾經都有例外既，就係2004－05年西布朗、2013－14有新特蘭同埋2014－15既李斯特城。而想當年西布朗其實係球季最後一日既朝早都係排第尾，但係因為果日贏波加其他隊榜尾既失分，令到佢成功爭取留係英超，係英超歷史被稱為「the great escape」。睇下而家英超榜底先…史雲斯6分（仲要對熱刺曼城），新特蘭8分（仲要對利物浦車仔曼聯），侯城10分（仲要對熱刺）。咁當然啦，如果大家都失分既話，就要睇係12月入面榜底球隊既對賽成績係點啦，相信為左留係英超，佢地都會出盡十二分力去踢，場波，一定會好緊張精采！嗯，波係圓既，定又要唔知賭乜野去破解魔咒呀？
仲有一個呢，就係話說如果係12月25日，聖誕節正日果日係榜首既球隊會成為果季既英超冠軍。歷史話俾我地知，係最近七季有六次係咁樣…唔到你唔信呀！咁當然都有例外既，就係曼城2013/14冠軍果季，利物浦第二…不要再說了。睇返榜首真係咬得好緊，利物浦車路士曼城阿仙奴熱刺都係20分以上，但大家都知道，睇賽程表面上係對利物浦要係12月25日坐係榜首係有優勢，對既都算係中下游球隊（ 打比另計）－新特蘭、般尼矛夫、韋斯咸、米堡、愛華頓，唯一唔好既地方五場有三場作客姐。之不過高普都承認，對住踢901既球隊，利物浦應該點樣去面對既問題仍然存在，引人地反撃先反而有空位進攻呀定要點先好呢？高普認真要諗諗佢，因為相信得失球差都會係聖誕快車既位置關鍵點。

唔驚既，利物浦一定會係聖誕節果日係榜首，就當送俾球迷既聖誕禮物啦，好無？