【無懼每個對手招式多誇張】熱刺對利物浦賽前分析

利永遠不會毒行 於 25/08/2016 發表 收藏文章
賽前分析

熱刺對利物浦 星期六早場1930


要贏人地,首先要了解自己既弱點。

高普本身就唔擅長對抗鐵桶陣,所謂鐵桶陣即係將前中後三條線合成一條堅挺既防守,認為防守就係最成功既進攻,所以人地一讓出控球權就唔知點應付。有啲事實既野可以提下既,係多蒙特時期同埋利物浦,高普都係擅長打強隊,但只要對方打穩陣波高普既足球哲學就威力減半。

好啦,講返場波,熱刺應該會同利物浦鬥快。熱刺既快就係要控球權去做波;相反利物浦既快就係緊迫焗你犯錯再快速反擊。打個比喻,高普既快係獵豹見血封喉,而熱刺既快係狼群瘋狂攻擊。係呢個情況下,對熱刺會比鐵桶相對容易去應對,而今場特別要小心熱刺既前鋒, 雲遜贊臣係上場對水晶宮既表現優秀,制造機會既能力同變化都不容忽視。另外,要留意返呢個後生仔係「無限氣」!


史杜烈治同費明奴同埋奧歷基都係前幾日對住Burton Albion都有入球,史毒仲係二十分鐘入左兩球,個前線信心應該返哂黎啦。呢場高普應該會出古天奴,因為佢快過小明,只係好睇佢有無埋門靈機一觸果下。對住上季最佳防守球隊既熱刺, 要突破熱刺速度力量兼備雙閘,文尼既復出會有一定既作用,第一佢跑得快,第二佢跑得好快,第三佢真係好鬼死快。文尼既快有助佢係單對單過人既時候做得更加厲落,戴亞你要小心啦!小妹預測呢,今場會出法明奴單前迫搶解放偏攻擊型拉蘭拿俾佢踢返中間, 而左右兩邊就用古仔同埋文尼。

不過防守失暈既問題仍然存在,中場神軒果日對般尼真係無咩料到,4-3-3或者4-2-3-1本身就係偏向攻擊, 單靠神軒無咩攔截能力,占士米拿要再勤力啲去保住軒達臣既甩漏, 路夫雲卡拉雲要安安份份咁留係後場防守頂住熱刺四大前場-Kane、阿里、艾歷臣、拉美拿。


講左咁多,等小妹黎個總結啦。高普同普捷天奴既主張都係天下武功唯快不破,配合高位防守既高壓迫搶!但佢地相似既足球哲學又分別演化出兩種唔同派系喎。普捷天奴師承瘋子比爾沙,佢本人亦曾經係西班牙浸左一段時間,所以佢既弟子唔單只繼承左高壓迫搶,而且青出於藍,進攻就相對仲有章法得多。令人眼花撩亂既短傳加上要善用球場空間,跑死防守球員,觀賞性加分(笑)。熱刺係今個轉會市場無太大既動作,主力班底雖然候生左啲,但都夾左一段唔短既時間,默契不成問題,當然上年季尾都驗證左呢班年青球員踢得唔錯,之不過都係避唔過年青人既通病-抗壓一般。

而於高普高Daddy!作為德國人既佢,足球哲學某程度展現返傳統德國人既風格 – EFFICENCY效率!佢既弟子同樣最重視係高位防守同高壓迫搶。但進攻方面高普既風格就偏向簡單直接,唔會有太多既movement,好多時由搶截到反擊入波都只係短短幾秒幾腳波既事。留意返,利物浦今季都有幾多新球員加盟,新舊球員係要啲時間消化呢個咁高深既哲學。不過唔驚,我地有熱血高普帶領,相信紅軍弟子會係高daddy既帶領下奏出高式搖滾反轉白鹿徑!!

小妹係時候唱返句「繼續上,全力上,無懼每個對手招式多誇張」,遇強越強,輕鬆!


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Yin.C
    Yin.C 於 29/08/2016 評論 NO. 1


    。,,,、.

    :*: :


    ,s , zero, z', xv xv'xv .,., …' MN

快捷鍵:←
快捷鍵:→