【沒有沙高的日子】 介紹返 利物浦中堅馬迪普

利永遠不會毒行 於 29/08/2016 發表 收藏文章
沒有沙高,仲有馬迪普(Joël Matip)。

沙高無論走又好,定留係利物浦,佢都係無得出架啦。紀律差係一隊波入面係死罪,高普,身為領隊,係有充份理由同埋被付予權力先咁做,唔似得某啲主任…好啦,無左個中堅,總要有個人頂替佢個位既。係尋日對熱刺果場,小妹留意到一個今季第一次出正選既後場-32號仔Joël Matip。

講下Matip既小資料先,高普一早睇中左係史浩克04既佢,而佢就係今年情人節之後果日以自由身同利物浦簽左四年約(諗起都浪漫),係7月正式轉會到利物浦。呢個25歲既來自喀麥隆既球員來頭唔細架,話說佢踢過2屆世界杯,上季德甲其中一個最佳中堅,攔截既成功率最高,數量係數一數二。係呢個時間,點都要提下卡拉雲既,佢係利物浦既表現都唔差,正選多數都有佢係度,而呢位球員就係上季排係Matip之後,都係德甲最佳中堅之一。


老老豆豆,講紀律講性格,一定係呢位32號聽話好多。但係如果論技術既話,Matip同沙高邊個好啲呢?我地首先用一個客觀既評分去比較下兩位球員,係fifa2016 沙高同Matip個平均分係一樣既,都係81。細個都有教,同分就要睇break down,我地重點睇返防守,沙高既評分係82,而Matip係84(睇返佢係史浩克04個防守分都係>84)。

尋日場波,Matip對住熱刺危險人物Kane 綽綽有餘。佢有三個優點:有速度,跑得快同埋唔會慢…講笑姐,佢係快,而且動作好靈活。又高又瘦,身位可輸蝕啲,但勝在制空能力高。有一球角球佢都差頂入可惜中柱。最緊要係佢會用個腦去踢波,夠哂冷靜,呢一點好重要。同路夫雲夾得好好,條防線好硬淨。熱刺四大中場出左名難搞,如果唔係Matip (同埋其他後防,波唔係一人運動)嚴密既防守,相信大家個平安鐘應該都已經㩒爆左。再提一提,睇返數據,Matip係攔截長傳都有一手,今場熱刺比較少玩呢樣野,所以我地暫未有機會欣賞到佢係呢方面既技術。

戴返個頭盔先,以下講既野係小妹雞蛋裡挑骨頭。我知,人無完美,甩碌都係平常事…

講返對熱刺果陣,Matip有好幾次都想推返前個波去進攻,本身都無咩問題,小妹仲覺得佢個sense比軒達臣更好,但唔知係狀態問題定係未慣英超啦,個波係佢腳下都唔係好穩。 好啦,Matip一推個波上前場,有幾球仲去到熱刺禁區做成威脅,本身值得一讚,但好多時完左個進攻佢都返唔切去防守,結果空左個位出黎俾人反擊,呢樣野要留意返。

總括而言,小妹都幾buy佢既。 再睇返球迷既反應,大多數都對Matip好受落,特別係因為佢係自由身轉會黎,名正言順平靚正。所以大家可以對佢持樂觀既態度,用佢黎取替沙高應該無咩問題。高普既德式教波方法相信佢都接受到,只係岩岩傷癒復出,可能要更多既時間去同球隊磨合。 小妹相信,有潛質既人,就算曾經受傷患擾,佢既光茫都唔會被遮蓋!小妹期待佢下一場既表現~



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Alan Yu
    Alan Yu 於 29/08/2016 評論 NO. 1

  • 廢托變費托
    廢托變費托 於 29/08/2016 評論 NO. 2

    一個BPD帶波攻上去 後面防守唔夠人 應該注意嘅係兩位防中有冇補位

  • Toby Chu
    Toby Chu 於 29/08/2016 評論 NO. 3

    唔係呀嘛, FIFA rating 都叫客觀方法? 你睇肥朗仲有86都知咩事...

  • Anakin Cheung
    Anakin Cheung 於 29/08/2016 評論 NO. 4

    如果睇fifa rating 既話,雲膠唔駛年年爭第4。

  • Jeffrey Wong Cham Tung
    Jeffrey Wong Cham Tung 於 29/08/2016 評論 NO. 5

    從前嘅FM妖人

快捷鍵:←
快捷鍵:→