【數字遊戲】贏四球輸一球（打四場輸七球） 精選

贏波係開心，但小妹想講下係呢場波比較「注目」既幾個球員。今場波同平時排陣都唔同既，正所謂FIFA病毒呢家野真係唔講得笑（去左踢國際賽既有：文尼，拉蘭拿，軒達臣，史杜列治，韋拿度姆，奧力治，古天奴），文尼呢場係好搶眼，但相比起之前既表現，今場明顯係慢熱左。而古天奴就出得十五分鐘，高普應該係擔心佢過份疲勞…

但係留意返，今場係上星期踢完英格蘭國家隊既球員表現都唔錯，可能有抗體。拉蘭拿做中轉分波既質素係幾好， 而打返中間啲史杜列治亦都好盡責，好多球都係佢拉走左李斯特城個中堅，俾空位文尼同法明奴插入去。至於軒達臣…都係佢一貫「水準」。
利物浦個後防線傷兵都唔少，本身無參與國家隊既卡拉雲膝傷，路夫雲隻眼腫左 ，而can因為傷患未能隨隊去國際賽。

今場焦點一定係：

盧卡斯，包位截波一流，可惜交波九流。原本想講佢打中堅好左，因為唔駛瞻前顧後同交波選擇唔多，咁理論上個腦諗點踢點判斷應該快左，但實際既果佢交波既質素都係無改善。但正所謂百＿成才，尋晚睇倒佢一流既防守能力正以為佢終於成才既時候，轉個頭⋯

可以睇返佢竟然可以係接應米奴列一個無難度既短傳，都可以俾人迫完之後亂交，如果係亂交俾隊友都算，但佢係直接將個波傳俾Vardy。當然，你可以話米奴列大腳清左個波咪算！但係龍門同後衛既默契就係咁微妙。其實， 平時佢出場果陣成日有類似既失誤，但中堅唔容許有咁低級既失誤所以直接死亡。

再要講下親愛既隊長軒達臣。小妹知道佢今場都有踢得好既時間－最少有兩球入波都係佢神來之筆沙比阿朗素上身既長傳間接助攻，啦！的確係可以為佢加返啲分。只不過控球，短傳同走位都好唔穩定，綜合咁多場睇，出佢打中中或者防中都好似打少個中場咁。即係咁，佢比較少接應隊友啦，另外短傳醫院波呢樣野唔只對球隊有唔好，對有心臟病既球迷都有影響。
Matip暫時都好穩無失誤，但始終無左卡拉雲（雖然佢都唔係正選多，但而家少左個choice嘛）同埋路夫雲呢兩位打後，今場睇到問題都哂黎，中後場好易俾人迫甩，身為一個中中走位意識好緊要，小妹好欣賞但今場無出既can短傳都唔好不過起碼肯走位幫波。

高普玩迫搶偷波，防守靠速度多過身位，可以話係賭博性防守 。而你睇返以前沙比打防中，中中既時候，係靠vision預判 ，至於再低級啲大部份英超隊就係靠中場絞肉機同肌肉截停你。李斯特城無左簡迪之後中場防守又真係差左好多。要讚既係費明奴，唔單只係因為佢入左兩球波，而係佢控球同把握機會既能力都好好，同文尼都夾得好好（除左有球文尼空哂都唔傳俾佢反而自己射之阱外），好fit，最型係你啦。

好，再一次講，贏波係開心既。