【抽中死亡之組】利物浦驚現魔鬼賽程

利永遠不會毒行 於 31/08/2018 發表 收藏文章
尋晚一共進行左英格蘭聯賽盃同埋歐洲冠軍盃既抽籤,另外歐洲足協亦都公佈左多項獎項,最令利物浦球迷留意的應該係拉莫斯,雖然佢過去幾個賽季都有入選歐洲足協最佳陣容,不過今次最佳後衛既頭銜就落左係呢位西班牙人身上。仲記得上季歐冠盃決賽拉莫斯對沙拿既犯規引起唔少爭議,但係佢防守能力的確唔錯,仲有入波,上季佢只係因為一場停賽同一次受傷缺席左歐盃盃兩場既比賽。
講返正題,利物浦係英格蘭聯賽盃第三圈賽事就已經需要面對車路士,呢個可以話係對於球隊既一大考驗,因為始終第三圈仲有咁多支參賽球隊,都好難預計得到咁快要對主要競爭對手,而曼聯﹑阿仙奴同埋曼城既運氣就唔錯,佢地抽到既都係低級別聯賽既球隊。你可能會覺得聯賽盃唔太重要,高普亦都好大機會會選擇用輪換既陣容應戰,但係咁早就面對車路士無疑係令到球隊減低了一個爭標機會。
至於歐冠盃方面,作為上季亞軍但係被安排係第三組別球隊進行抽籤,最終紅軍得出既結果都令人唔太滿意。利物浦最後去左C組,同組既有巴黎聖日耳門﹑拿玻里同埋巴爾格萊德紅星,呢組都可以稱得上係死亡之組。但係利物浦領隊高普就認為咁既結果尚可以接受,佢話:「老實講,呢個分組當然唔係我希望見到既,但我地都一早預料到我地既情況唔樂觀,PSG係一隊好強大既對手,佢地今季應該會希望衝擊歐冠盃,所以同佢地交手應該幾有意思。至於拿玻里,我地係季前熱身賽贏過佢地,但好明顯係歐冠盃賽場上面,氣氛會自然變得唔一樣。我執教多蒙特個陣就作客過拿玻里,我知道呢場比賽都唔會容易。至於紅星隊,我有睇佢地尋日既比賽,最終佢地成功晉級,所以我認為作客挑戰佢地都會好困難。上季既事情已經過去,我地宜家開始就要準備之後落黎既比賽,我地既首要目標就係係小組出線。」雖然利物浦被安排係死亡之組,但係相信其他三支球隊都唔希望對陣利物浦,始終今季紅軍增兵同踢出黎既結果都有目共睹,所以C組既賽事應該都好刺激。
經過左呢兩個抽籤之後,利物浦由9月中到10月初都雖然面對一連串既挑戰,9月15號開始紅軍就要首先對熱刺,之後9月19就要對PSG踢歐聯既比賽,之後9月22對修咸頓可以話係一個休一休息既機會。接著落黎9月26同30,利物浦都需要係英超聯賽同埋聯賽盃上對陣車路士。至於10月4號,利物浦就要對拿玻里踢歐冠盃既比賽,幾日之後10月7號,紅軍就要係聯賽對曼城。一連串既死亡賽程,高普應該點揀?雖然話就話增左兵,但係輪換陣容又夠唔夠深度去贏比賽呢?呢半個月利物浦球迷都係帶定個平安鐘跟身穩陣D啦。

如果喜歡我們的文章,請即分享到︰

標籤: 利物浦  抽籤  歐冠盃  聯賽盃  魔鬼賽程  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→