【我們都受傷】唔係吓話，佳尼與文尼？ 精選

利物浦係黎緊35日將會有十場賽事，這個冬天真係忙呀…但同時，傷患亦係利物浦一個要面對嘅大問題。

利物浦26歲右閘佳尼係上季季尾果陣開始受背傷影響，自七月對燦美爾（Tranmere）後就無見過佢係正式比賽出現，去到而家都抖咗好耐啦。係佢傷出嘅呢段時間，高普就調動青年軍祖高美斯以及阿歷山大阿諾去頂替佢個位，但呢兩位畢竟都算係後生，係經驗同技術上都未夠成熟，要佢哋立即上位又真係有難度嘅。
佳尼一直係高普愛將，係上季38場英超賽事入面，佳尼踢足37 場。係上星期，高普就對於佳尼嘅傷勢作出咗以下回應：

「佢嘅傷患康復並唔係預期中咁好－即係好咗一排，之後又無咩進展咁。我哋明白，背傷就係咁。」

「背部係人體一個好脆弱嘅位置，我哋要確保佳尼係100%準備好先回歸。」

「我哋將佳尼呢個case咨詢過世界各地嘅專家，佢嘅傷絕對唔係一個大問題，只係需要時間去康復，就係咁簡單。」
佳尼係星期一就做咗矯正小手術 (minor corrective surgery)，換句話講，即係最快要出年二月，佢先可以為利物浦上陣。

佳尼嘅傷令到係之前兩年從未踢過一隊正規賽嘅祖高美斯成為一隊嘅正選右閘球員，亦成為高普手下第四位中堅人選。（對熱刺果場路夫蘭被換出後，祖高美斯被調到打中堅）雖然祖高美斯就無得同佳尼比架啦，亦都有唔少甩漏，但係都足夠令修夫基揀佢入傷兵多到傻嘅英格蘭國家隊。

另外值得一提，除左球會外，係出年2018俄羅斯世界盃，佳尼能唔能夠為英格蘭國家隊上陣都成一個問題。除咗傷患之外，修夫基最近都鐘意用熱刺嘅捷比亞，加上二月好返後亦需要時間去操返個態返黎，今次真係唔多樂觀啦。
受腿筋受傷(hamstring injury) 而缺陣利物浦五場賽事嘅文尼係對上星期對韋斯咸嘅賽事復出，同沙拿張伯倫嘅跑步場面更成為大家嘅話題！但係佢呢就係疑係國際賽再受腿筋受傷(hamstring injury)影響，早前獲塞內加爾國家隊批准提早回利物浦，高普表示，要等到文尼返咗去英國先可以為佢進行評估，但利物浦會好小心咁處理呢個問題，希望文尼可以盡快好返為利物浦踢跟住落黎嘅賽事。

「今次又係腿筋受傷(hamstring injury)，呢個真係會令人擔憂。」

「我哋好尊重以及明白文尼對塞內加爾國家隊有幾重要，而文尼自己非常之榮幸可以當表到國家隊上陣。」

相信一切都有待文尼歸隊先再有定案，但亦都有好消息嘅，拉蘭拿嘅大腿受傷（thigh injury）亦好返好多，星期二開始跟返操；京斯亦都係，係利物浦官方instagram見到多咗好多佢嘅相，相信大家同小妹一樣都好期待佢嘅復出；而古天奴亦表示自己好返晒，有望係聽日凌晨為國家隊上陣。


source: timesofindia, dailymail, theguardian