【左定右】如果命運能選擇,你會揀卡利奧斯定米勞列?

利永遠不會毒行 於 31/05/2018 發表 收藏文章
歐冠杯決賽相信係唔少利物浦球迷一個難忘嘅晚上,卡利奧斯呢一晚既表現相信好有可能成為佢之後職業生涯嘅陰影,今晚既兩個失球唔多唔少呢位利物浦門將都難辭其咎,小編見到第一個失球嘅時候已經覺得十分荒謬,呢球波卡利奧斯有可能成為賓斯馬處於越位位置先會作出一個短傳,又有邊個估到賓斯馬會係禁區入面出腳攔截。當然失波之後利物浦亦全力反撲,呢個時候文尼嘅入波其實成為關鍵,但可惜喺沙拿係上半場受傷離場之後,球隊就好似完全搵唔到進攻點;直到巴爾既世界波出現,呢一個入波完全打擊左成隊利物浦士氣,同之後紅軍失第三球亦有一定嘅關係。第三個入球巴爾完全只係完全搵唔到隊友幫波,先會自動起腳遠射,卡利奧斯處理呢個球亦有好大問題,雖然巴爾嘅射門曲墜十分強勁,但係卡利奧斯係咪應該寧願將個波打出底線而唔係冒險去接?呢一個絕對係佢判斷嘅問題。

講返今季英超,高普係門將位置上分別有用米勞列同卡利奧斯,38場英超比賽,佢地兩個一人踢左19場,小編都十分佩服高普可以作出到咁既決定,換句話講如果單睇英超方面,其實今季門將上面係無正選同後備之分。首先講一講高普揀左嘅卡利奧斯先,卡利奧斯現年只有24歲,除左19場英超比賽之外,今季利物浦歐冠杯13場既比賽都係由佢出戰。英超方面,卡利奧斯保持左10場清白之身,一共失左14球,亦成功救左1個12碼。救12碼方面,米勞奴同樣都係救得1個12碼。但比較之下,米勞列既數據明顯係更差。呢位比利時門將上陣19場,只係保持左7場不失球,但就失左24個波,更有2次失誤導致到對方球隊入波。所以係咁嘅數據上,高普揀卡利奧斯為利物浦把守歐冠杯決賽的大門亦係無可厚非。

今日最新既消息係除左利物浦簽入左摩納哥既法賓奴之外,利物浦有意收購羅馬門將艾利臣,值得一提嘅係艾利臣係今年世界杯巴西國家隊嘅一號門將。之前有消息傳過利物浦想買AC米蘭當奴隆馬,但係成事機會應該唔大,因為AC米蘭無咩可能會放走呢個明日之星。而羅馬方面,因為受到公平財政政策嘅限制,之前已經迫不得意賣走沙拿,而冬季轉會窗個時仲想將迪斯高套現,所以利物浦如果向羅馬招手,羅馬都有機會要求紅牌出高價,佢地先會肯放人,有消息指羅馬希望係巴西國門身上收返6000萬英鎊。宜家利物浦買人嘅情況同之前引入雲迪克嘅情況好相似,可能最終都要硬食羅馬嘅高價,又或者高普可能會轉向第二目標史篤城嘅畢特蘭出手。總之相信卡利奧斯呢一次嘅失誤令到佢自己係利物浦既將來打上左一個問號,雖然咁樣十分可惜,但係相信球迷甚至領隊都想要一個穩健嘅守門員,而唔再需要擔心呢啲低級錯誤再次出現。

標籤: 利物浦  紅軍  卡利奧斯  米勞列  

留言


請按此登錄後留言。未成為會員? 立即註冊
  • wombat 於 01/06/2018 評論 NO. 1

    卡利奧斯嘅數據係由雲迪克加盟咗之後做出嘅

    如果命運能選擇,大家都會揀上年夏天買過一個新龍

  • supar08 於 02/06/2018 評論 NO. 2

    http://football.fanpiece.com/aboutsoccerwhatiwanttosayis/%E9%97%9C%E6%96%BC%E7%B4%85%E8%BB%8D-%E7%95%A2%E7%89%B9%E8%98%AD-%E6%88%91%E5%BE%88%E6%A6%AE%E5%B9%B8%E8%83%BD%E8%88%87%E5%88%A9%E7%89%A9%E6%B5%A6%E6%89%AF%E4%B8%8A%E9%97%9C%E4%BF%82-c1207929.html

    2015年已想買butland
    呢個卻克蘭級數算吧啦

  • 4466hk 於 02/06/2018 評論 NO. 3

    同近年選港姐、又或者同香港選議員咁上下…,點揀都係死。

    超級同意樓上所講,如果命運有個揀,當日買龍時就買過第二個啦!

快捷鍵:←
快捷鍵:→