【實力派領隊】無論係國家隊定球會,都想挖角?

利永遠不會毒行 於 13/10/2019 發表 收藏文章
趁住國際週,不如講下國家隊啦。

但今次想講嘅唔係球員,而係利物浦領隊高普喎。
高普就被指係德國足總頭號對象,接替現任國家隊教練路維嘅職位,帶領德國隊參戰2022年世界盃。睇返利物浦同高普嘅合約於2022年暑假完結,而利物浦嘅老細們就喺贏咗歐聯之後都開到聲想佢續約,之不過高daddy就仲未落筆。
記者好嘅朋友應該記得,高普2017年12月就雲加將會離開阿仙奴一事回應時,曾經講過佢唔認為自己會留係球會多過7年,就算自己真係為球會拎到首個英超冠軍,佢都會離開。再睇睇另一篇報導,今年嘅8月,有記者問到高普會唔會同利物浦加簽長約,佢就話有機會完約要放鬆下,抖返一年先喎。我哋回顧一下高普教波嘅歷史,2001-2008年教Mainz05, 2008-2015教多蒙特,個magic year都係7年喎...
被傳媒問到執教德國國家隊嘅可能性,高普就話:

「我好難答你,我都唔知自己想唔想。」

「我亦唔可以100%咁講我係一個正確嘅人選(去教國家隊)」

「如果真係有呢個機會,我會考慮,但唔係而家。」

高普2015年開始執教利物浦,計計數...咦!?
拎完2019 FIFA 最佳領隊,岩岩又再獲選為英超9月最佳領隊。高普身為一個高質素嘅領隊,又點會得一隊波對佢有興趣呀...

舊東家﹑德甲球隊多蒙特主席Hans-Joachim Watzke最近於佢寫嘅書《Real Love – A life with Borussia Dortmund》中,承認喺2017/18呢個失望嘅球季後,希望請高普回歸多蒙特教波,幫手解決球隊嘅問題,雖然佢自己都心知無咩可能會成功,但都硬住頭皮去問高普有無興趣返去。
「我知高普會履行佢嘅職責直到同利物浦合約完結。」

「呢個就係高普。」

「但如果你想球隊有突破,如果你想多蒙特有多一條出路行,你知呢個人幫到手嘅,咁我至少都有問過佢。」

「如果當日我無問佢有無興趣重返多蒙特,我唔會原諒我自己。」
問返當時人高普啦,佢就有以下咁嘅回應喎:

原來當時高普正係搭緊飛機,突然電話響起,電話嘅另一邊就係Watzke,

「高普,你要返黎呀(多蒙特)!」

高普當時以為佢講笑,仲問佢係咪傻咗定飲大咗?點會無啦啦咁問,佢仲同Watzke表示自己同利物浦有幾年約。

「我好慶幸希呢個機會去幫忙球會,但我亦要承認,機會好微。」

好啦,故事亦都就咁完結咗。
講完想當年,講返而家啦,高普帶領嘅利物浦而家喺英超8戰全勝,以24分排榜首;而國際賽週後,利物浦將會於10月20日作客曼聯,上演英超第一回合嘅雙紅會。


Source: Mirror, Metro1, telegraph, metro2


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→