【士砵亭星散】利物浦有意謝遜馬田斯

利永遠不會毒行 於 21/06/2018 發表 收藏文章
尋晚葡萄牙同摩洛哥既B組賽事唔知咁多位有無睇呢?雖然呢場比賽最終以C朗一開波攻入既頭槌作為完結,但係呢場比賽摩洛哥整體踢得好過葡萄牙多多聲,相信都帶左唔少驚喜俾球迷。可能你地會問葡萄牙呢場波同利物浦有D咩關係呀,答案就等小編話俾你地知,事緣就係呢場比賽後備入替既葡萄牙小將謝遜馬田斯成為左利物浦近期既目標,呢位球員相信如果大家有打FIFA都知佢既速度奇高,而且仲有唔錯既突破技術,所以相信佢既打法都好適合利物浦,佢呢D特點同沙尼或者文尼都好相似,當然佢仲需要成長先有望成為文尼咁既級數既球星啦。
消息就話,除左利物浦之外呢,阿仙奴﹑熱刺同愛華頓都有意收購呢位葡萄牙人,因此利物浦如果想佔先機買人,相信都有靠下誠意啦。呢位謝遜馬田斯今季亦都係世界盃上面值得留意既一位新星,除左佢年輕有速度同腳下功夫之外,佢現時仲係一個自由人,你無聽錯呀,因為早前士砵亭發生左球迷襲擊球員既事件,唔少士砵亭既球員都決定同球會解約,當中仲包括左跟隨葡萄牙國家隊參與世界盃賽事既四位球員,而謝遜馬田斯就正正係其中一位。另外個三位呢就係尋日救左個靚波既門將柏捷斯奧﹑仲有就係防守中場既威廉卡華奴同物般奴費南迪斯。所以除左馬田斯之外,另外呢三位葡萄牙現役國腳都好搶手,真係有價有市。
由於無同任何球會有合約,財大氣粗未必一定係談判之中可以佔到優勢,雖然工資都係其中一樣重要既元素,但係呢俾球員知道球會既計劃同佢地既將來相信會更加吸引到球員加盟。馬田斯上季代表士砵亭上陣52場比賽攻入左13個入球,佢主要踢既位置係右翼或者右中場,而踢法就偏向中意打短傳走位多,相信亦係呢一點吸引左利物浦既興趣,始終紅軍都希望前場既三個箭頭可以做多D配合再製造更多既攻勢。阿仙奴方面近日簽入左德國門將尼奴,相信如果要爭馬田斯佢地亦都未必會佔到優勢,而再論級數黎講,愛華頓利物浦一直都係死敵既關係,但顯然近年利物浦既成績比較好,而熱刺都有一定既吸引程度,相信呢位葡萄牙小將都需要係世界盃之後好好考慮一下自己既未來。當然小編就緊係想佢黎利物浦啦,值得一提既係外國媒體對於馬田斯既估價為5200萬英鎊,今次唔洗轉會費就可以買到一個超新星,相信對於唔少球隊黎講呢一點都可謂超級吸引。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→