【國際賽週】邊啲利物浦球員被徵召呢?

利永遠不會毒行 於 04/09/2017 發表 收藏文章
岩岩過咗國際賽週,多名利物浦球員被徵召代表自己所屬國家隊,而家黎個總結先(括弧內係數下有幾多個利物浦球員入選國家隊)。

先講下高普,佢就留返係利物浦同教練團隊研究戰術,要知道轉會窗完結前,利物浦買多咗個張柏倫(唔計基達,佢未到),而古天奴亦留返係度,要點樣令到現有陣容發揮得最好都係一個難題。

英格蘭
利物浦隊長軒達臣(1)繼續係國家隊擔任隊長角色,拍住西布朗嘅利華摩亞踢足90分鐘。而岩岩加盟利物浦嘅前阿仙奴球員張柏倫(2)亦係76分鐘被換出。英格蘭領隊修夫基隨後換入路斯福、華迪同埋韋碧克,所以史杜列治並無上場。最後英格蘭2-0馬爾他。

祖高美斯(3)同埋蘇蘭基(4)都有為英格蘭U21對荷蘭上陣,祖高美斯更被委任為隊長,踢足全場,而蘇蘭基踢到71分鐘就被換出。最後英格蘭以1-1荷蘭和氣收場。留意返,小妹最愛嘅阿歷山大阿諾(5)都有入選架,但未有上陣,全程都係坐後備席。

16歲嘅利物浦前鋒布斯達(6)就代表英格蘭U18國家隊出戰對巴西嘅友誼賽。上陣76分鐘嘅佢未能為英格蘭取得入球,最後0-0完場。

巴西
古天奴(7)係利物浦頭五場就因為背傷,所以並未係今季英超上過陣。可能岩岩醫返好啦,返到巴西國家隊中就回復一貫水準,接應捷西斯嘅傳波射入。而利物浦另一名巴西球員費明奴(8)並未被換入,最終巴西以2-0贏咗厄瓜多爾。

比利時
米奴列(9)同埋奧歷治(10)都入選比利時國家隊,但係都未有上陣。呢場波都幾多入波,但一面倒,比利時9-0大勝直布羅陀。

愛沙尼亞
愛沙尼亞隊長卡拉雲(11)就帶領球隊0-0打和希臘,呢名中堅打足90分鐘,但就拎咗一張黃牌。

蘇格蘭
新任老豆羅拔臣(12)係國家隊一球世界波,禁區外左腳一射,龍門左上角入波,協助球隊3:0立陶宛。


威爾斯
17歲嘅活特本(13)第一場代表國家隊上陣即刻有波入,亦身為威爾斯第二年輕入波嘅球員。佢係69分鐘入替羅倫斯,入場後五分鐘射入奠定勝局嘅一球。而利物浦第三龍門阿ward(14)就繼續做後備,並無上場。

埃及
沙拿(15)亦有為埃及上陣,踢足90分鐘,但最後0-1不敵烏干達。

塞內加爾
正所謂古埃及文明,又點少得文尼(16)。文尼係塞內加爾對布吉納法索嘅比賽上踢足全場,但遺憾未能帶領球隊贏波,最後0-0完場。

德國
有傳一月轉會市場將被祖雲達斯出價嘅安尼簡(17)亦有為德國國家隊係下半場尾段時間上陣,入替入球功臣維爾納。

克羅地亞
路夫蘭(18)被列入克羅地亞對科索沃嘅正選名單中,只可惜球賽進行咗21分鐘後因大雨關係就被腰斬,並擇日重賽。

荷蘭
韋拿度姆(19)係國際賽上同利物浦收購對象法國嘅湯馬士利馬同場,而利馬更梅開二度,最後法國大勝荷蘭4:0。

波蘭
有份黎香港嘅利物浦第四龍門Kamil Grabara(瓜巴拿)(20)亦入選波蘭U21國家隊,但後備嘅佢就並未有上陣。

幾內亞
2018先會見到佢嘅基達(21?)亦有為幾內亞對利亞嘅賽事上陣,更係開波7分鐘後立即入波建功,但可惜係72分鐘射失12碼,未能拉大差距,不過最後而最後幾內亞都贏3:2。

而5/9凌晨亦會有國際賽(德國對挪威;英格蘭對斯洛伐克;蘇格蘭對馬爾他;利比亞對幾內亞, 6/9凌晨就有巴西對哥倫比亞)而國際賽完結後,曼城、利物浦以及車路士嘅南美球員將會一齊乘搭私人飛機返英國。利物浦亦會於星期六晚上七時半作客曼城,希望球員們返到英國都唔會太攰啦。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→