【唔會爭入波】古治:我好欣賞費明奴

利永遠不會毒行 於 18/04/2018 發表 收藏文章
大家仲記唔記得古治係上個月老鬼表演賽上嘅表現呢?同以前一樣,佢係球場都係十分之勤力,仲係咁搏!最近,佢就係訪問當中發表下對現役利物浦球員費明奴嘅意見啦~
古治大讚費明奴!古治非常欣賞費明奴係球場上嘅態度。首先,佢認為呢位巴西球員唔獨食,唔自私,係球場上佢諗住嘅野就係想球隊贏波,會助攻;佢唔係果種剩係諗住自己要入波嘅球員。

「費明奴嘅入波的確係有質素,但係佢嘅助攻都非常出色。在我而言,一個全面嘅球員就係呢一種,有佢在陣,對利物浦絕對係一件好事。」

「我認為佢係一個好勤力嘅球員。我差唔多睇晒咁多場比賽,我睇得出佢係為球隊付出緊自己嘅所有。」

「就算有時候佢無入波,亦無助攻。但最重要係佢會盡力去踢每一場波。」
其實小妹好認同古治咁講,記得由季初到而家,沙拿漸露光芒到今日有機會成為英超神射手,大家嘅焦點都落係呢個新加盟球員身上時,佢就一直密密地地努力,唔會因為想突出自己而獨食,有時睇到文尼都會忍唔住想去爭返啲「曝光率」,都有啲...。

其實又到季尾啦,不如又講下曾經有傳下季會係利物浦出現嘅球員。

一個就係前利物浦青年軍,果陣係U23表現相當出色,而家外借咗去侯城嘅哈利衞奕信(Harry Wilson)同埋之前有傳利物浦有意買入嘅羅馬門將艾利臣。

哈利衞奕信(Harry Wilson)

呢位借咗去侯城嘅利物浦青年軍,已經為侯城係11場比賽入面入咗5球波以及4個助攻。呢個咁出色嘅表現令到侯城領隊想留住/買斷呢名威爾斯球員。

侯城領隊艾堅斯就話啦,

「如果我係Wilson,我就會係完咗借約之後繼續留係侯城。」

「最主要因為我哋會俾機會呢個後生仔去發展,而侯城係過往喺協助球員進步上都有好好嘅紀錄。」

艾利臣
而傳咗好耐利物浦會買歐聯對手﹑羅馬龍門艾利臣,睇怕今次都凍過水啦。因為羅馬方面已經講過無意出售呢位巴西藉門將。羅馬會長柏路達就好堅決咁講:

「我相信有啲人對艾利臣仍然有興趣,係未來會出價俾我哋,但係我哋係完全無意去賣走呢名咁出色嘅守門員。」

不過又咁睇,利物浦門將卡里奧斯代替米奴列後,睇得出佢表現慢慢有進步。後而米仔正值當打年齡,屈居做後備就有啲…雖然高普有講過話兩個龍同樣重要 ,但事實話俾我哋聽,高Daddy都唔係太信任米仔。如果高普有心捧model,買個勁龍返黎擺佢係後備又唔太「高普style」。

英超未完啦,但係冠軍係邊個就已經塵埃落定啦。循例都要講下,今季冠軍係曼城。


Source: this is anfield

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→