《十個喜歡利物浦的理由》

利永遠不會毒行 於 05/11/2016 發表 收藏文章
而家好興咩十個咩咩的理由,咁小妹又試下寫啦。

利申:含有抽水成份,唔好太認真。


1.有靚仔
係呀,人就係咁膚淺。講下小妹睇波初期有列納、再有奧雲仔(唔好再講曼聯名宿)、托里斯、仲有謝拉特、艾加、路夫蘭等等。
2.熱血
係高普既領導下,利物浦既球員都積極左去踢波。逆景波係最難打,而一直以黎, 球員們面對壓力既處理都係麻麻。老老竇竇,男人既熱血小妹識條鐵咩,但係而家我地見到既利物浦係「輸左球波都一定要贏」既心態去睇失波緊既事實。打高壓迫搶,面對體力的消耗,熱情同熱血係keep住呢種打法既重要因素,呢樣野係由領隊、隊長一齊去develop既。

3.多英藉球員
話到明英超,緊係要有英人去踢架啦。而香港人情義結係鐘意英格蘭國家隊,咁利物浦以前有奧雲、謝仔、希斯基、加歷查、而家有史杜列治、拉蘭拿、軒達臣、Clyne、占士米拿等英格蘭(前)正選球員。
4.訓練球迷心臟
利物浦有一樣野係非常出名既,由crown高巴拿(小妹唔多識佢其實)、占士到而家米奴列、Karius,就係龍門都有牛油手、出迎錯時間或者同後衛溝通不足既問題,但係又間唔中又有神救喎,正所謂「有神救、有甩漏」。而後防解圍失誤醫院波都會間歇性出現,所以一般利迷既心臟都被訓練得比較強壯,呢樣野好有用架,而家日日睇新聞,心臟少啲負苛都唔得。

5.有目標
其實,小妹同利物浦一樣,都會有一個未達成到既目標。小妹目標就係儲夠錢就去冰島睇極光;而利物浦就係英超冠軍。呢26年多黎,利物浦都係向住同一個目標進發,從來都無放棄過奪標呢個夢。呢份堅持,真係感動唔少球迷呀。
6.有愛心
俗語有云,若要生活好,咪買利物浦。因為利物浦最鐘意劫富濟貧,呢個係有愛心既表現。而睇返最近利物浦個勢…佢地好似少左「愛心」。不過都配合返現時社會氣氛既…
7.高普式領導
每次有入波,高普興奮既程度都唔會比入波果位球員低,而高普式既抱抱都更加深入民心。高普對球員既愛錫亦都唔可以忽視,佢關心既唔單止係球場上既表現,球員家庭、心理等等都會顧及到(好似路夫蘭囡囡要做手術佢都放佢返家鄉)。當然,球員係訪問都係多謝高普多(除左巴神啦)。
8.屋企人影響
呢樣野真係好奇怪,特別係出自於利物浦球迷身上。跟據小妹朋友間非官方非正式統計,十個有九個都係因為老豆撐開所以自己都撐利物浦。好事黎既,一家人一齊睇波,不知幾溫馨呀。(利申:毒_朋友唔多)

9.有組織
大家都應該睇到利物浦組織係唔錯。由龍門球開始去做一個攻勢,去到中場再由古天奴軒達臣分波,又或者由兩邊閘爆到落底出波。而文尼古天奴費明奴呢三位默契好好,一個傳波一個出波一個從後入zip,唔差啦。互相不停走位,拉空對方球員,快上快落,幾咁精采。


10.應洗得洗 唔係土豪
有啲球隊係土豪,下下用錢買入已成名既球星,有時甚至個價同個市係唔成正比。利物浦係今季轉會市場係賺錢架,最貴都係買左文尼,但係抵買啦下話。利物浦會買一啲岩自己踢法既球員,而唔係買一啲星返黎再就佢去改變球隊既打法。



其實,講咁多野有咩用,就好似問你鐘意個心儀車迷啲咩一樣,答唔出架嘛… 我地又唔係勝利球迷,輸波、贏波都會照撐利物浦,咁小妹既意思唔係盲撐,有球員踢得差,要鬧;抱住百_成才既心態都繼續支持愛隊。睇完利物浦啲波會嬲,會挑剔有咩做得好、做得唔好會係因為鐘意隊波,先會有感情係入面,想佢做得更好。

講到尾,小妹真係好鐘意睇波,好鐘意利物浦架。
就好似小妹都好愛香港,所以先會咁唔開心、唔甘心、咁憤怒。唉…





留言


請按此登錄後留言。未成為會員? 立即註冊
  • Johnsonchan0725 於 05/11/2016 評論 NO. 1

    Good ! 好一句救命鐘講出利迷心聲!

  • Lee Tsz Ho 於 05/11/2016 評論 NO. 2

    洛夫雲叫靚仔?

  • joesiu 於 06/11/2016 評論 NO. 3

    阿妹,留意下:
    逆「境」、英「籍」、入「楔」
    文章寫得不錯,繼續努力

  • kinfung 於 06/11/2016 評論 NO. 4

    Lee Tsz Ho,洛夫雲都吾靚仔?你究竟知吾知邊個洛夫雲

快捷鍵:←
快捷鍵:→