【利物浦對熱刺】聯賽盃是後備們的好消息

利永遠不會毒行 於 27/10/2016 發表 收藏文章
尋晚聯賽盃利物浦對熱刺,都係俾下後備出,同埋試下用新人。
打簡單波,要讚既係一眾利物浦球員都好集中。一般英超勁隊去到踢聯賽盃都唔會點俾心機打、或者全隊副選。都明白既,同唔想打國際賽一樣,驚傷同消耗體力。但利物浦今次出既都有平時係正選會見到既球員,好似史杜列治、Origi、米奴列(佢地曾經都做過正選呀今季!另外多謝讀者提返小妹,仲有wijnaldum)等等。打簡單戰術,主要都係猜下波做下波為主,幾腳波就做到進攻,唔會太花巧。呢個明顯唔係高普一直用開既高位迫搶戰術,但對住今場既熱刺,又的確有用喎。

利申:今場熱刺係hea踢,走漏人、行多過跑。

主角一定係史杜列治,9分鐘入波,不過可惜係聯賽盃,唔係英超呀。古積橫傳, 史毒快龍門一步掂到個波撞個波入網,個衝力大到入完波自己都碌埋網。 下半場再單刀入多球2:0。 史毒呢…其實小妹都講過好多次架啦,佢個人技術係無容置而,但要有隊友拉開對手,分散防守球員既注意力先發揮到囉。今場有Origi同佢拍住上,就好似以前有蘇亞雷斯咁,等等…呢個係傳說中既4-4-2陣式 !?講講下,又好似有啲熟悉既感覺喎。入左兩球係威既…

之不過呢,如果睇返成場波,佢如果能夠把握所有機會(okay人無完美,大部分啦咁),又點止入得兩球咁少呢?講開Origi,佢今場表現超班,佢一啲都唔貪功,唔獨食,製造左好多機會俾史毒同埋其他球員,值得一提既係59分鐘佢係禁區外射左球好靚既波,只係對方個龍又救得靚,雖則佢今場無入波,但都贏得唔少掌聲。

小妹想講下Lucas輸果球12碼,睇返慢鏡,又唔似真係踢到腳。但佢動作咁核突,「liu」完一下就算啦,仲要有第二、三下,個球證好難唔吹架喎。但我地睇返下圖,本身卡拉雲都企左係度唔俾佢轉身,而Lucas亦企左係另外一邊想偷波(但偷唔到),眼見呢個情況,唔計想設計越位陷井既球員(藍圈),係附近其實仲有有兩位利物浦球員食緊花生(黃圈),如果佢地肯去幫幫手,相信呢個十二碼係可以避免(好似係)。
中場傳波準確度有待改善,上半場都唔少傳失,但以副陣黎講都尚可理解,但有兩位球員真係…小妹都唔識講啦,開名啦-摩蘭奴同Lucas,係佢地有做到波,但同時醫院波既數量都唔可以忽視。小妹今場留意到後場卡拉雲都幾稱職,但係佢同Lucas都好似唔多信米奴列咁,有幾球明明可姒簡單回傳俾米仔但佢地都無咁做,對方球員迫住都選擇自己清。而且Lucas同卡拉雲唔知係語言不通定點啦(舉個例,雖然小妹同上司都係講廣東話,但唔知點解小妹都唔明佢講緊咩,如果有個廣東話翻釋員就好啦)…見到有個位Lucas都嘈左卡拉雲幾句。

都係果句啦,聯賽盃都係盃,用黎試下陣、操下人腳咪幾好囉,後備球員係呢個舞台上一定會盡力去impress高普,分分鐘有新奇有趣同驚喜既發現呀!


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Carson Chan
    Carson Chan 於 27/10/2016 評論 NO. 1

    史獨對住班青年軍梗係大超班
    廣東話翻譯員😂

  • Angus Cheng
    Angus Cheng 於 27/10/2016 評論 NO. 2

    不過個女小篇跟波都唔係好足:
    基本上係必然正選既荷蘭中場雲拿杜母佢睇唔見,反而覺得已經唔再係正選既米奴列、史獨,同埋從來唔係正選既奧列治呢三個人係正選.... 😆😆😅😅

  • Kai Pong Lee
    Kai Pong Lee 於 27/10/2016 評論 NO. 3

    唔回傳俾米勞梗係怕佢玩波啦,以熱刺既高壓逼,大腳亂清上前場都好過回傳門將俾人逼,而目前面中有 o 仔同古積兩支大杉拎高波

  • Hoi Yiu Yang
    Hoi Yiu Yang 於 28/10/2016 評論 NO. 4

    睇一睇今場利個陣,有好多熟悉名字但原來已經全部唔係正選,睇黎利既板凳深度問題終於解決

  • William Ma
    William Ma 於 28/10/2016 評論 NO. 5

    不容置疑/無庸置疑<---

快捷鍵:←
快捷鍵:→