【利好消息】利物浦贏波,謝拉特都贏波

利永遠不會毒行 於 09/07/2018 發表 收藏文章
世界盃嘅比賽一路踢緊,而利物浦已經開始咗季前嘅熱身賽,雖然有部份球員仍然未歸隊,但係紅軍未有大打折扣,相信大家仍然記得上季利物浦喺歐聯賽場上嘅經歷,對於佢地嚟講上季係大嘅進步,但今個賽季紅軍需要繼續提升,先有希望衝擊聯賽冠軍。今個賽季嘅第一場熱身賽,係對陣英格蘭第六級別球會切斯特,最終利物浦成功作客以7:0大勝對手,呢場比賽入面新加盟嘅球員亦有亮相,而另一方面剛剛執起教鞭嘅神奇隊長謝拉特亦都取得佢成為主教練之後第一場勝仗。
今場季前熱身賽,高普上下半場基本上用咗兩隊波嚟踢,由於軒達臣﹑阿諾﹑洛夫雲﹑米勞列﹑沙拿﹑文尼同費明奴有參加世界盃嘅比賽,以上嘅球員係世界盃結束之後先會休假,所以高普今場喺有限嘅資源之下對呢隊切斯特,但係級數上明顯有好大嘅分別,因此呢場波利物浦都贏得好輕鬆。今場波高普上半場派出嘅陣容係卡利奧斯﹑佳尼﹑高美斯﹑菲臘斯﹑鍾斯﹑法賓奴﹑活特本﹑威爾遜﹑蘇蘭基同埋奧歷治。你無睇錯到,高普係決定仍然相信卡利奧斯俾佢踢正選,呢位德國門將喺歐聯決賽上面嘅演出受到唔少批評,但係紅軍暫時仍然未有買入新門將。比賽去到上半場37分鐘,利物浦首先由小將威爾遜破門,之後44分鐘佢仲梅開二度。
而下半場高普輪換咗成隊波,當中大家比較熟嘅占士米拿﹑丹尼京斯同埋史杜列治都有上陣機會,而值得留意嘅係身穿8號波衫嘅新球員拿比基達。呢場比賽拿比基達亦有交出一個助攻,而接應得分嘅正正係史度列治,其後京斯都有入波,去到88分鐘,史度列治禁區外遠射,最終利物浦大勝7:0。呢場比賽入波的確都算多,但係考慮到對手嘅差距,利物浦贏波都好正常,但係史度列治同奧歷治呢D球員開季之後仲有無機會踢就真係好難講,大家更應該喺呢D熱身賽睇多啲佢地嘅表現啦,如果佢地搵返比賽狀態,相信高普都好樂意俾機會佢地。
同樣係8號,曾經嘅8號球衣主人謝拉特亦都迎來自己執教格拉斯哥流浪嘅第一場比賽,佢地嘅對手係有香港球員戴偉浚喺隊中嘅貝利,呢隊球隊亦喺呢個賽季跌落英乙。呢場比賽係格拉斯哥流浪喺踢歐霸盃資格賽之前嘅熱身賽,最終謝拉特帶領格拉斯哥流浪大勝6:0,值得一提嘅係呢場比賽同巴西對比利時嘅世界盃比賽撞咗時間踢,但係都吸引到超過41000人入場睇呢場比賽,可見得謝拉特嘅吸引力相當大。加盟格拉斯哥流浪之前,謝拉特一直擔任利物浦青訓隊教練,而當時佢都拎到唔錯成績,呢場比賽無疑為呢位神奇隊長打下一支強心針,而佢地亦都好快會開始新賽季嘅比賽,小編就喺到祝願謝拉特可以有一個成功嘅賽季啦。同時間眼見利物浦宜家有著唔錯嘅狀態,希望喺踢左世界盃嘅球員返嚟一齊備戰之後,利物浦可以磨合得更順利,下個球季可以踢得更成功。


標籤: 利物浦  謝拉特  季前熱身賽  

留言


請按此登錄後留言。未成為會員? 立即註冊
    快捷鍵:←
    快捷鍵:→