【再戰修咸頓前】高普說:「輸1:0同0:0分別不大」

利永遠不會毒行 於 25/01/2017 發表 收藏文章
最近,球迷應該都唔太滿意利物浦嘅戰蹟,身為領隊嘅高普當然都會唔開心啦。而佢係訪問中,透露係球隊輸左俾史雲斯後,自己同球員開左個很長的會議。

高普就話其實球員們都唔太好過,特別係聖誕快車同新年後,佢地應付嘅唔只係英超,仲有足總盃、聯賽盃,密集嘅賽程令到球員都身心疲累。不過再難過都過左啦,係對史雲斯之前,高普以為所有野都回復正常,但現實總係事與願遺。無計,球員表示唔享受緊自己做嘅野,聽得出士氣非常低落。正所謂傷心的人別聽慢歌,高普今次開會主要都係想激勵下班球員,希望when you walk through a storm hold your head upside and don't be afraid of the dark.
係開會嘅agenda中,當然唔少得大家都關注嘅防守問題,高普同大家嘅諗法一樣,就係入到兩球,其實夠贏,但…係囉,後防方面要進步囉。另外,高普亦認為係2017年,差唔多球球佢地俾人入嘅波都係輸同一個問題,問題係咩,佢就無提及。但小妹嘅分析就係兩個,高空波引致嘅後防混亂同埋後防誤會走甩對方球員。後防最近頻頻出錯,高普否認問題出現係因為馬迪普缺陣;佢話利物浦係一個大球會,係唔容許你講「缺少」左一個球員。而且足球係_ _ _ _(聽到熟啦,自行填詞),總會有一個人犯錯嘅時候,但更多嘅情況係一個防守組織,大家都做左唔同嘅野去促成一個失誤。而家利物浦嘅防守信心係負面嘅,但高普亦都知道,令球員去返正面係佢嘅工作,所以佢係個會度都落左好多口水係呢個topic。
係最近七場比賽,利物浦只係贏得兩場波 -1月1日英超贏曼城同埋1月12日足總贏普利茅夫 ,其餘嘅賽果…真係「我再沒勇氣向你講舊時」。而今個星期,利物浦將會係聯賽盃再戰修咸頓。係上一回合輸左一球修咸頓俾修咸頓嘅利物浦,今回合返到主場踢就好有信心,高普就咁話-1:0 同 0:0分別其實不大,場波都係咁踢;你話輸到3:0就另一回事姐…真係輸三球個戰術運用就真係要變變佢啦。不過小妹心諗,仲有得變咩…而利物浦如果係星期三晚(即星期四凌晨)贏到修咸頓出線,就會進入聯賽盃決賽。高普唔會話盃仔就唔重視,相反,佢認為球員對修咸頓時要更加集中,而呢場亦會係高普決定足總盃對狼隊點出嘅參考,最後啦喎,緊係計下點樣留力對車路士啦!

有人講過,習慣就好。相信高普已經習慣左緊湊嘅賽程。26/1踢完就28/1、28/1踢完再1/2踢。係人都知chur啦,但可以點?高普都有提到佢唔會輕視任何一場比賽,但同時佢知道唔係個個都會好似佢咁諗。但聽佢口吻,應該都係會留力狼隊,係對聯賽盃四強賽同埋英超對車路士度發力。
七日踢三場本身都係壞消息,但有咩野慘得過一個壞消息?就係兩個!高普證實隊長軒達臣腳踭傷仲未完全好返,不過呢,佢都係有望會係對修咸頓上陣。會唔會好似上年咁歷史重現,隊長要抖三個月?高普就話今年唔會啦,歷史嘅意義就係叫我地唔好重蹈覆轍,係而家呢個階段,出名訓練好chur嘅高普就話比賽前佢唔會要求軒達臣參與太多操練,如果其他球員練緊跑,佢咪踩單車跟住囉,無事嘅。

唉,今次真係「對未來沒信心 怎張開眼睛」…

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 皮野
    皮野 於 25/01/2017 評論 NO. 1

    大巴等住你(利)😂

  • Alan Leung
    Alan Leung 於 25/01/2017 評論 NO. 2

    無野既,踢多場6-1出黎咪得

  • Wing Wai Chan
    Wing Wai Chan 於 25/01/2017 評論 NO. 3

    其實他是想說不會連續食兩餐海鮮,對修咸頓食好,還是留返對狼隊時食,狼隊時應該出2隊唔計數,還是等到對車仔時食罷,咦,唔得,聯賽積分已經相差太遠🤔,咁好啦,就對修咸頓時食啦😪

  • Jason Lap Hei Leung
    Jason Lap Hei Leung 於 25/01/2017 評論 NO. 4

    買哂修咸頓d人囉

  • Theseus Yiu
    Theseus Yiu 於 25/01/2017 評論 NO. 5

    唔好話輸0:1,事實上呢場就算輸0:100,同0:0分別都唔大

  • 數據就是事實
    數據就是事實 於 25/01/2017 評論 NO. 6

    事實上前6其他隊多有埋歐洲賽,而依然只同利分數相若,這就是數據就是事實啦!!要是利有埋歐洲賽,必然比其他隊更低分(前7-9?),如果不把在前6中的最高失球數字之一,當一回事,那麼,這個比前6別隊更輕鬆的"生活",而成績不振,就可以說明利物浦的問題了吧!!

  • Tidus K W Chan
    Tidus K W Chan 於 26/01/2017 評論 NO. 7

    若要生活好

快捷鍵:←
快捷鍵:→