【兩邊領隊互笠高帽】利物浦對卡迪夫城,高普希望球隊可以繼續連勝

利永遠不會毒行 於 27/10/2018 發表 收藏文章
繼週中以4:0大勝紅星同埋上個禮拜贏哈德斯菲爾德之後,今晚利物浦將會對住卡迪夫城,相信呢場比賽嘅難度就唔算太大。另一邊同樣排係榜首嘅曼城今輪英超比賽就需要對熱刺,呢場比賽相信普捷天奴都會全力爭勝以進一步縮減積分榜嘅差距。面對著狀態同埋心理質素都咁好嘅利物浦,卡迪夫城上場英超比賽亦都拎到第一場首勝,佢地擊敗嘅對手正正係富咸。至於係賽前雙方領隊就互戴高帽,高普就話由於仲未對過禾諾克所以好期待同佢見面,而禾諾克就大讚利物浦嘅前場三叉戟係世界上最好嘅三名球員。
今晚利物浦就將會係主場出戰,現時紅軍陣中除左拿比基達同埋軒達臣之外就已經無其他傷兵,陣容都尚算完整。而卡迪夫城方面,梅菲同艾達趕唔趕得切踢呢場波仍然係未知之數,除左佢兩個之外,卡迪夫城仲有一大班傷兵同埋有球員停賽。所以紅軍今晚無論係球場﹑球員心理同埋陣容完整度方面明顯係佔優。講返拿比基達同埋軒達臣,佢兩個係週中都已經缺席左對陣紅星嘅比賽,而今晚都係仍然未能上場。高普係賽前發佈會亦都有談及呢兩位球員,高普話佢地都踢唔到今晚嘅比賽,佢地兩個嘅傷勢都唔算嚴重,但係仍然未準備好踢比賽。所以我決定俾佢地休息,呢場比賽除左張伯倫同Brewster之外,其他球員都可以踢。
岩岩就講到高普都俾左頂高帽禾諾克戴,咁其實高普講左D咩呢?高普就話自己聽過好多禾諾克嘅野,所以好期待同佢見面。仲話禾諾克係一個好好嘅領隊,仲話係場比賽之前或者之後都一定會同禾諾克見面傾下計。之後高普仲大讚禾諾克係世界上其中一個擁有最多經驗嘅領隊,而佢過去所取得嘅成功實在令人難以置信。上一季係英冠嘅賽事佢表現得十分出色,英冠都係一個十分困難嘅聯賽,而禾諾克帶領卡迪夫城表現得好輕鬆,最後佢地更成功攞到升班嘅資格。
今晚呢場波利物浦贏埋之後就會係英超連勝10場,小編就覺得呢場比賽都好關鍵,因為熱刺都會為曼城帶黎一定嘅難度,而利物浦就好可能可以把握著呢個機會再次Head返住曼城3分,當然啦波係圓嘅,今晚都要睇下利物浦可唔可以真係咁順利去贏波啦。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→