【入波後…】我有特別的慶祝技巧

利永遠不會毒行 於 30/09/2016 發表 收藏文章
是咁的,利物浦最近就連贏4場(英超加聯賽盃),入左總共14球!平均每場都有3.5球,呢個數字好值得鼓舞,但大家記住,呢個只係階段勝利,唔係唱下歌仔影張相呃下like就夠, 利物浦要繼續努力去操練、去研究戰術,先可以有進步同keep住贏。

好啦講返開心野,入波緊係要慶祝架啦,但小妹要講既唔係開香檳、燒炮仗,而係球員入波後慶祝既動作。其實入球慶祝既方法都有好多種既,等小妹揀幾種同大家講解下啦。其實有分intentional同non-intentional 既。留意返呀,跟據FIFA Law 12,“While it is permissible for a player to demonstrate his joy when a goal has been scored, the celebration must not be excessive.” 即係球員唔可以有「過量」既慶祝,當然過唔過量係由球證決定啦!

講下啲即興既表現先:(有啲片可能要自己較返時間,小妹其實係條link set左時間但好似唔多work,唔好意思呀咁多位大大)

1.雜技式表現
好似打筋斗,側手翻等等
係領隊最唔鐘意既慶祝方法-一個唔小心傷左點算?但呢種方式既好處係收視率好好、觀眾好鐘意睇。

例子:前利物浦球員羅比堅尼 (2:08")

2.跪地膝頭跣行
被譽為高傲但優雅既動作
係拍攝角度黎講一流。 因為佢有開始(入波)、經過(跑)、同結果(跣行),但呢個動作要留意既地方係草地既condition,特別係草地既濕度。

例子:古天奴 (1:10")

3.衝去觀眾席/除衫掟去觀眾席
小妹明白,球員會好想同球迷分享佢地既喜悅;而球迷都唔介意欣賞球員既肌肉。不過有時要保持理智,開心過頭衝去觀眾席/除衫掟去觀眾席唔係唔得,不過換黎既會係一面黃牌。

例子:古天奴(大家睇到佢隊友都推返佢入球場)

4.高普專有-球員跑去高普度

呢個咁熱血既表現…係高普既球員專用既慶祝方法。
睇多個啦

有預謀既有:

1.著定帶有字句既底衫,係入波之後展示出黎。
例子:前利物浦球員巴神係曼城果陣

2.一早設計好既動作 – 包括舞蹈、話劇等等
例子:前利物浦球員比那美打golf (1:15")

係利物浦近代入面最出名緊係史杜列治,連係FIFA用佢入波都有佢signature wave。球迷對佢隻招牌舞一定見怪不怪,就連高普都要學下佢。史毒曾經係訪問中透露,呢隻舞本身係佢同佢表兄弟自己跳黎搞笑,但又發現好適合用黎慶祝,又夠個人特色,咁咪用囉。佢亦都教過摩蘭奴去跳,所以小妹會話呢個慶祝係intentional。有片有真相,有練過架!

而佢呢隻「舞」有人受落,當然都有人會覺得難頂、恥笑佢既動作啦。有球迷就覺得佢似一個飲左過多興奮劑既12歲小朋友,亦有人批評佢呢隻唔可以用「Dance」呢個字形容,最多話係wave ,仲話佢係最無跳舞天份既黑人喎。(利申,小妹非種族歧視)

點解佢要跳呢隻舞?其實佢曾經向傳媒講過,最好既慶祝入球方法一定係除一半件衫去蓋住塊面。只不過而家呢種慶祝方法係犯規, 唔係唔可以做,只係一張黃牌既代價姐。

講到呢度,緊係去片先啦!(無人理佢佢都會照跳)


最後再講下一啲出名但又唔係利物浦球員既慶祝方法先。

B.Gomis
佢係史雲斯扮豹既一幕相信大家記憶猶新。佢呢個動作其實分做兩部份,第一部份真係即興,但相信第二部份扮豹係有意既。首先,豹係最勁/兇狠既貓科類動物,咁代表佢自己係球場上面係食物鏈既最上層;而另外一個原因就緊係想上體育版啦,多啲傳媒報導自己啦。(你睇下到左今時今日小妹仲講緊佢就知啦!)



普巴

Dabbing!普巴最出名既慶祝方法。大家睇睇教學先:
睇完我地再睇Pogba既表現:
Dabbing係源於美國,本身係Hip-Hop入面既一個動作,而dab呢個動作有“cool”同埋曬命既意思,連希拉莉都做過。岩啦,入波都唔曬,幾時曬先?大家跟小妹一齊做~1,2,3!

不過點都好啦,入到波係開心既,最緊要唔好樂極生悲,同埋要尊重對手,唔好主動挑釁對方球員,如果唔係得不償失就唔好啦。



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Michael Kam
    Michael Kam 於 01/10/2016 評論 NO. 1

    男車迷覆反女小編未啊

  • Rap Chan
    Rap Chan 於 01/10/2016 評論 NO. 2

    以為你會數法明奴扮除衫

快捷鍵:←
快捷鍵:→