【今次認真學術討論了】脫歐對英超影響(二)

利永遠不會毒行 於 20/08/2016 發表 收藏文章
首先,多謝大家會咁入黎睇(二)先啦,小妹都知上一篇講事實既野會悶啲。


咁啦,脫歐程序應該會係兩年內開始。

而家大概有百多位幾位歐洲球員係英超踢緊波,跟據英國報章The Guardian調查,脫歐後大概會有過100位既球員都未有達到符合現今拎到工作簽證既要求。咁少左歐洲球員會有咩問題呢?



講下短期內既問題先。

首先,好多歐洲球員既技術都係首屈一指,少左呢啲球員明顯會減低左英超既質素。另外,英超其中一個收入來源就係轉播費,少左歐洲球員既話,對歐洲、甚至世界各地球迷黎講英超既可觀性會相對減少,間接影響到球會既收入。因為而家英超轉播費太高,所以好多中下游球隊都組織豪華軍團,一旦轉播費跌佢地收支平衡唔倒就大鑊,列斯就係其中一個好例子。

但係對於本土主義黎講,俾多啲機會自己人去踢返聯賽,對國家隊長遠黎講都係好事既…只不過短期內負面影響會多啲。有樣野好明顯既,有啲球隊係靠「外援」去增強,大部份英超球隊既主力成員其實都係由歐盟大軍組成, 以英國本土球員班底組軍既球隊並唔多,小妹擔心短時期內因為無哂歐洲高質外援令英超球隊實力下降,歐戰可能會byebye。

好似經濟學咁講,小妹假設現役既高水準英藉球員係一個定數(fix quantity),如果需求(demand)突然増加,只會令佢地既身價上升。訓練年輕球員需要既係時間同經驗,所以有經驗既英藉球員功應唔會增加,個供應(supply)會變得好inelastic,從而球員既身價都會有通脹既危機。令到無論係球會定英超自身發展都唔健康。英超球員一直都被指身價過高,學術討論上呢,脫歐應該會進一步加劇呢個問題。最壞既情況會點?簡單例子:好似香城既樓價越炒越貴,到最後年青人呢世都置唔到業,而有物業有家底既就越賺越多然後再用賺返黎既購入更多資產。同樣道理,較有賺錢能力既傳統強隊有能力收購更多高質英藉球員,而中下遊隊伍又唔可以收購價廉物美既外援有助平衡各隊既實力,唉,貧者愈貧……,英超有可能又會返左去之前幾隊獨大既情況。

之不過,長遠黎講,

係現今係歐盟制度下,每隊球隊既歐盟外援係無上限既(因為nationality discrimination),好似小妹前一篇講,足總其實想控制外援質素同埋「保護」英藉球員下,收緊左非歐盟外援簽證既條件。係歐盟歧視條例下,英國足總無得立例限制歐盟球員既加入,相反只有規定球隊二十五人名單內必須有最少八個係英藉球員。係脫歐既情況下,簽證問題好似可以幫到足總喎。

小妹認為只要青訓做得好,同唔同國家既球隊踢多啲友賽,係少左外援既情況下可以令更多本土球員成為球星。點解咁講呢,首先要講既係資源分配,當球會知道外援成本高左好多,就會集中去發掘本土有潛質既球員。而本土既球員就會有更多機會去上位,去表現自己。少左外援既同隊技術交流,就去友賽去學習對方打法。要知道青訓做得好係好重要,參考返德國足球,曾幾何時德甲都頹過,之但係跟住佢搞好個青訓,而家都可以超越英超成為世界第二既聯賽。

再者,國家隊都唔會無人好揀,教練唔洗含淚去揀個入選名單。到左果陣,少左國際觀眾呢個問題就更加唔洗擔心,當波踢得好、又精采既時候,就會有人睇。同睇戲一樣,點解法國戲、日本戲、韓國戲有人睇?就係因為好睇嘛!


總結啦,脫歐呢家野兩面睇,有好有唔好。而家咩都未傾,小妹都只係睇住新聞再加上小小拋書包去講。相信英國議會向歐盟會為英國、或者英國足球去爭取對體育工業最好既條件。我地等住食花生啦~~~


標籤: brexit  epl  

留言


請按此登錄後留言。未成為會員? 立即註冊
    快捷鍵:←
    快捷鍵:→