【今晚歐冠盃抽籤】利物浦只係可以作為第三組別球隊

利永遠不會毒行 於 30/08/2018 發表 收藏文章
今個星期嘅英超比賽仲未開始,但係歐冠盃嘅附加賽已經係尋晚全部踢完,今季嘅歐冠盃32強球隊亦全部誕生。英超方面,利物浦嘅形勢大好,宜家暫時排係英超榜首。高普今年夏天嘅收購令到傳媒認為紅軍今季有望衝擊聯賽冠軍,除左呢一點之外,上季係歐冠盃殺入決賽亦令人刮目相看。雖然今晚先會進行抽籤,但係外界一致認為利物浦今年無咁好運,因為紅軍被安排係第三組別球隊。值得一提,成功爭取重返歐冠盃嘅國際米蘭就排係第四組別。
根據國際足協嘅規則,上季嘅歐冠盃冠軍皇家馬德里同埋歐霸盃冠軍馬德里體育會都會一齊進入第一組別,另外歐洲足協積分前六聯事嘅冠軍就會成為第一組別其餘嘅參賽球隊。換言之,第一組別入面有皇馬﹑馬體會﹑拜仁﹑巴塞﹑祖記﹑巴黎﹑曼城同埋莫斯科火車頭。而其他嘅球隊就會根據積分係數依次序分組,值得一提由於賓菲加最終成功淘汰左PAOK晉級,因此利物浦只可以被歸入第三組別。第二組別球隊就有多蒙特﹑波圖﹑曼聯﹑薩克達﹑賓菲加﹑拿玻里﹑熱刺同羅馬。而第三組別就有利物浦﹑史浩克04﹑里昂﹑摩納哥﹑阿積士﹑莫斯科中央陸軍﹑華倫西亞同埋燕豪芬。第四組別就有布魯日﹑加拉塔沙雷﹑年青人﹑國際米蘭﹑賀芬咸﹑柏辛域陀尼亞﹑紅星同埋AEK雅典。小組抽籤儀式就將會係香港時間8月31號凌晨零時舉行。
雖然利物浦係上季歐冠盃亞軍,但係由於宜家紅軍係第三組別球隊,佢地最有可能被抽入死亡之組。消息指出,利物浦最壞嘅情況會面對巴塞﹑多蒙特同埋國際米蘭,而呢幾支球隊都係各大聯賽中嘅強隊,佢地係歐冠盃賽場上亦都有唔錯嘅表現。如果好運一D,利物浦都有可能同皇馬﹑拿玻里同埋加拉塔沙雷同組,假如出現呢一組,就會有上季歐冠盃決賽嘅翻版對碰,相信唔少球迷都希望紅軍可以成功復仇,當中最為引人注意嘅就肯定係拉莫斯同沙拿會唔會最起衝突,當然啦呢一切都係FF,到抽籤結果出爐先知利物浦係好彩定唔好彩。
當然,紅軍都有可能抽到一支好籤,紅軍最理想嘅情況肯定就係抽到莫斯科火車頭﹑波圖同埋年青人一組,咁樣嘅結果就可以減輕利物浦嘅壓力。大家都知道英超比賽都已經好激烈,雖然宜家利物浦係榜首領先,但係當歐冠盃比賽開始左之後,高普要點樣取捨每場比賽亦都好值得留意,雖然紅軍好有可能陷入死亡之組,但係今季增兵之後利物浦攻擊力十足,相信面對任何球隊,紅軍都有實力一戰。大家可以集集氣,為利物浦求枝好籤啦,出左分組名單小編會盡快更新,大家記得留意啦。

如果喜歡我們的文章,請即分享到︰

標籤: 利物浦  歐冠盃  抽籤  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→