【世界級PR】張伯倫以「愚蠢」回應亨利之評論

利永遠不會毒行 於 06/03/2018 發表 收藏文章
前阿仙奴球員/名宿亨利曾係訪問中批判利物浦球員、2012年前阿仙奴隊友張伯倫,話雖然同佢共事過一個月、又睇咗佢踢咁多年波,但到而家都唔知佢勁啲咩。而張伯倫曾經都好在意呢啲負評,特別係由曾經同隊過嘅人講出黎,佢認為亨利嘅說法係愚蠢。喂大佬你一齊踢過波,又話睇左我好耐,無理由你咁都唔知我做緊咩喎?

不過而家張伯倫學識唔好理人哋講咩,俗言有云,你要成為自己嘅頭號粉絲,唔好因為外界嘅說話/意見影響自己表現。佢更指出最重要係佢而家係利物浦得到高普嘅信任,令到佢都有自信心,人哋講咩咪由佢囉,佢係踢波唔係黎結交仇人。

講到尾都可以兜返去讚利物浦,真利呀~
表現不嬲都贏於一切,計埋係星期六對紐卡素賽事中,助攻沙拿入第一球之後,張伯倫係利物浦已經有六個助攻。而BT Sports更挑選佢成為該場賽事嘅MAN OF THE MATCH!係賽後,佢係訪問中有以下嘅回應:

「賓尼迪斯帶領嘅紐卡素係一隊好有組織嘅球隊。」

「我哋整個星期去準備如何去突破紐卡素嘅組織,亦都因為今場波定咗幾個plan。」

「上半場真係都幾沮喪,我認為我哋都踢得幾好呀,但係對方都做表現唔錯,經常成功阻止到利物浦嘅攻勢。」

「係最後(上半場39鐘)我搵到少少空位傳波俾沙拿,簡單完成入波。」

呢場波亦係連續第七場沙拿有入球,而呢個紀錄保持者就係受傷患困擾嘅大師兄史杜列治係2014年達成過。而有睇過當年張伯倫點樣為古天奴護航嘅朋友,相信都知道佢係一個世界級PR,唔知關唔關佢係英人事,話晒主場佢母語嘛,睇下佢今次又點樣係訪問中加分先~

「沙拿成季都上晒身咁,但唔單只係沙拿,文尼同埋費明奴都係場上做咗好多優秀嘅工作。當沙拿一場入兩,三球波時,可能大家無咩點留意到佢哋嘅努力。」

「係後場,大家都將防守做得好好,令到我哋可以Keep住推前條前鋒線。」

而佢亦承傳阿仙奴嘅傳統,非常活躍於社交媒體,極少見到IG Story無佢份,而且,佢亦樂於係隊友嘅相片上面留言,無論對外定對內都落足心機~
呢名24歲英格蘭嘅中場,由一開始去利物浦表現受到質疑,到而家間唔中都有幾腳靚波,都真係進步唔少。雖然佢都仲係會有失誤,但相信佢賣口乖應該收買到唔少球迷嘅心。但相信係呢個時候佢最需要就係得到英格蘭國家隊領隊修夫基個心,鑑於英格蘭世界盃大軍一日未定,張伯倫可唔可以為國上陣都仲係一個謎。

睇返係英格蘭名單上,其實都幾多有力入選二十三人大軍嘅利物浦球員,除咗張伯倫之外,仲有隊長軒達臣,拉蘭拿,如果佳尼趕得切有態,入選都唔係無機會架;而曾入選青年軍嘅阿諾以及祖高美斯都隨時候命啦!

teamtalkthisisanfield

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→