【下下場對手】從車路士身上認識修咸頓

利永遠不會毒行 於 31/10/2016 發表 收藏文章
澄清:車迷尚未成功,小妹亦需努力。

小妹尋晚好返小小,緊係睇下修咸頓對車仔啦,但唔好誤會,小妹永遠都係YNWA既利迷,今次睇係因為利物浦下下場將會對修咸頓咋。

修咸頓一開波就俾夏薩特入波,失左球,對佢地信心黎講,應該會係一個大打擊。但係佢地反而無怯,迫得好緊,心理質素好好。修咸頓係一隊好有耐性既波,今場對住高壓迫搶都可以車路士前場猜波,keep住控球在腳在腳。 防守球員都好搏,特別係自己後場,三個去夾一個。之不過呢,小妹亦都發現佢地回防比較慢,快既反擊有著數。
但睇返佢平時都係控球指數高,但係組織麻麻,sell身位硬淨,即係水晶宮既進化版,但修咸頓組織就無水晶宮咁。靠硬碰硬就一定死緊,但留意返,修咸頓唔係快架,摩西斯都有幾球快攻爆左上去而修咸頓係唔夠跑既。相比下利物浦中場既靈活度同速度都會比修咸頓高, 都預計到修咸頓會條防線會縮到好後,排得好密,就好似下半場對住車仔咁。 如果利物浦對修咸頓,要留意返Austin。針對返利物浦對高空波既弱點,相信修咸頓都會俾多啲高波去禁區等Austin去頂,而上場路夫蘭既失誤絕對唔可以再發生,不過相信兩星期後占士米拿感冒點都好返,加上Matip,有人拉空下補下位,無事既。而角球罰球攻勢都唔好睇少Fonte呀Dijk都要睇實啲,如果唔係都幾麻煩。

你都知啦,利物浦不嬲防守死球都麻麻地,上場對水晶宮都比對手頂入左一個角球。偏偏呢個又係修咸頓既強項,諗起都幾頭痕。 好啦,講返車路士對修咸頓場波先,比賽去到第五十五分鐘,Costa係禁區外射入左球世界波,當時修咸頓其實已經全隊回防,大部分人都企係禁區入面睇波。睇黎佢地驚左車路士既組織入滲,個個縮哂後面反而比左位Costa起腳。利物浦不嬲都有唔少遠射好手,所以如果利記可以猜波猜到對手縮到咁後既話,古天奴、軒達臣分分鐘又有機會射返球世界波出黎。

最後車路士就贏左兩粒啦,留意返個控球比率,修咸頓有成56%控球率,其實仲多過車仔。當然,車仔係比賽早段入左波都令到佢地放棄左控球權,修咸頓空有控球,但生波又做唔到咩攻勢。結論就係到利物浦對住修咸頓既時候只要少返啲無謂既前場犯規,Karius醒醒定定唔好甩手,兩位中堅唔好走漏Austin 泰迪等前場球員,都應該幾大機會全取三分,零封對手不是夢,好似係。

我#%^&%*&()*_)*&^$$,一打完呢篇野,小妹個老細又打電話黎講埋哂啲呀媽係女人既野,老細,我放左工啦!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Gor SK
    Gor SK 於 01/11/2016 評論 NO. 1

    你地對住修頓真係有啲易俾佢硬食高波,佢地都搓得兩腳,風格係穩陣;老闆不嬲咁pk xd

  • Gor SK
    Gor SK 於 01/11/2016 評論 NO. 2

    你地對住修頓真係有啲易俾佢硬食高波,佢地都搓得兩腳,風格係穩陣;老闆不嬲咁pk xd

  • Charles Lee
    Charles Lee 於 02/11/2016 評論 NO. 3

    唉😧公器私用,小妹兩篇都用嚟放閃既

  • Carlos Lau
    Carlos Lau 於 02/11/2016 評論 NO. 4

    呢度有無女車迷小編?

  • Samson Lau
    Samson Lau 於 02/11/2016 評論 NO. 5

    除左大腳斬比柯士甸,修頓成場波都無乜點滲得到入去3閘線。岩岩開波果10兩廿分鐘,修頓條後防線淋過豆腐
    Ps車迷
    Pps等緊女小編轉會

快捷鍵:←
快捷鍵:→