馬迪續約所傳遞的 "另類" 3個信息 (亂噏廿四 XYZ）

剛剛讀到一篇有關曼聯和 Matic 續約至2023年的分析文，覺得這次續約有 "另類" 的3個重要信息，希望在這裡和大家分享一下。緊記，專欄名稱已經說明以下只屬亂噏。


1) 曼聯冇錢買人

Matic 到八月就 32歲嘅防守中場，上季踢得 28場聯賽，今季到目前為止更只踢得 16場聯賽。雖然復賽後表現不俗 (FotMob: 7.3分，下同)，但復賽前每場平均得分不夠 7分。防中位置已經有 Pogba、Fred、McTominay，佢地加上 Matic 踢得好唔好就真係見人見智，但絕對可以話唔係世界級囉。如果曼聯可以好似買 Maguire 咁用一大嚿錢去買個真正世界防中返黎﹐咁中駛乜續簽個打後備嘅，可見曼聯係冇錢買人。

2) 曼聯只求前四不思進取

以現時嘅陣容，無論同利物浦或者曼城比，可以話上中下三線連門將都差人地一級甚至更多﹐連車路士都已經簽左 Werner 返黎，曼聯仲唔乘勢換血，仲繼續續簽舊將﹐可見下季目標唔係英超冠軍而係 The Fourth Trophy 囉。
3) 曼聯只重視老臣，拒絕給予年青球員上場機會

一隊裡面而家有 5個 CDM，Pogba (27)、Fred (27)、McTominay (23)，仲有個 18歲嘅青訓。有機會係咪應該俾啲機會俾其他人上場呢？停左賽咁耐，或者 Matic 仲有氣有力，但係下季呢？已經 32歲都唔會預佢可以場場踢啦。你會話而家爭緊前四/五，緊係要用個穩嘅陣容去踢，但續約係講緊未來。32歲嘅 Matic 可以喺未來為曼聯帶來幾大嘅內部競爭，我估大家心裡有數。原本仲有一年約，用 Matic 以老帶新，無論新血又好 Fred 同 McTominay 又好 (我諗球王 Pogba 應該唔鐘意俾人帶)，踢埋下季後正式交棒咪好囉。咁無限續約法，仲有幾多位俾啲後生仔上？跟住一定有人話利物浦咪又係續約 Milner，但係 Milner 可以踢左閘，而左閘可以話係 11個人內面差唔多最難搵嘅位置呢，有錢都唔易搵，更何況曼聯似係冇錢囉。
總結：無意踩曼聯，只想提出之前睇過嗰篇分析文所謂嘅3個信息同我上述嘅都係斷估無痛苦，我上述嘅理論上都成立架，不過都係亂噏廿四亂講一通而已。