利物浦和狼隊的雙方交易有做數嫌疑

亂噏廿四 XYZ 於 19/09/2020 發表 收藏文章
利物浦的 Hoever 同狼隊的 Jota 互換東家,後衞 Hoever 以 £13M 被收購到狼隊,而利物浦則同時以£45M 收購前鋒 Jota。由傳聞到完成,只係短至一日,可謂極速亦極為成功,但在財務上可謂極之有做數嫌疑。

1. 財務上,球員買賣係同買賣資產一樣,以買賣價入賬,然後喺合約期內分攤。

2. 例如,某球員買入價係£10M,合約期為5年,咁係賬上球員嘅價值就會以每年 £2M 遞減,直至第5年尾就會變成零。每年遞減嗰 £2M 就會變成往後五年每年成本/虧損 £2M。

3. 賣球員方面,如果球員以 £10M 賣出,而賬上價值為 £6M,咁相差嗰 £4M 就會即時變成盈利。相反,如果球員只以 £5M 賣出,咁相差嗰 £1M 就會即時變成虧損。

4. 你會發現球員不同嘅買價係只會影響往後年份嘅盈虧,不會帶來即時影響,但球員嘅賣價會即時影響當年嘅盈虧。

5. 假設有兩間球會互相買賣球員,而同時提高賣價,咁會有咩後果?

6. 就係兩間買賣球員嘅球會可以即時提高當年嘅盈利表現,代價係往後每年嘅攤分會增加

7. 簡單黎講,就係增加未來嘅成本/虧損換黎即時嘅盈利入賬

8. 當 Hoever 傳聞以 £10M 賣出,全城嘩然。連網友亦以 FIFA 2020 為參考,價錢不足為 £1M。當然 FIFA 2020 不足為信,但我地可以睇睇其他。

9. 以 TransferMarket 的數據,Hoever 只值 £3M 左右,最高亦只係 £3.5M 左右。
https://www.transfermarkt.com/ki-jana-hoever/profil/spieler/485583

10. 可見 Hoever 嘅賣價有極高水分。最新傳聞價錢為 £13.5M,足足比參考價高 £10M!Hoever 的賣價有水分,那麼 Jota 呢?

11. 以 TransferMarket 的數據,Jota 只值 £25M 左右,最高亦只係 £32.5M 左右,FotMob 亦顯示 Jota 現時只值 £29M 左右。
https://www.transfermarkt.com/diogo-jota/profil/spieler/340950

12. 可見 Jota 嘅賣價亦有極高水分。最新傳聞價錢為 £45M,足足比參考價高 £12/13M

13. 上述數字顯示,兩位球員嘅賣價都有同時提價嘅嫌疑,尤其係 Hoever 可說是未上一隊,而 Jota 之前亦沒有其他球隊追求嘅傳聞 (先戴頭盔,係本人未聽過),所以突然間嘅身價爆升實在相當有可疑。

14. 咁點解要咁做?當然事出必有因。一來雙方球隊有實際上嘅需要,二來可能其中一隊或兩隊都有財務上嘅需要。呢度唔講實際需要,因為好多網友比本人更善長,呢度只講財務上。

15. 因為疫情下收入大減,預計好多球隊都會出現虧損,但喺 UEFA FFP 下,球會對呈報年度虧損變得敏感,亦有可能因為各項借貸條款令球會不可呈報年度虧損。由於大多數都估計疫情只會影響短期嘅財務表現,令本年嘅財務表現對比未來數年嘅變得更為重要,所以才會有可能使出呢招以時間換取空間嘅做法。
16. 咁做法有冇犯法或者會唔會比 Auditor challenge?單單以上述資料難以定奪,主要原因係球員合約唔係流動資產,估價上的空間可以好大,比如值 £5M 嘅球員,估價上隨時可以係由 £0M - £10M 或以上,只視乎理據是否成立。而且 Auditor 雖然係專業人士,但始㚵唔係行內人,好多時都會俾行內人舞龍咁舞,令球會就算有嫌疑都有辦法脫身。

17. 咁對球迷黎講有咩影響?就係學識以上知識後,當球會以勁賺價賣球員或勁蝕價買球員時,唔好咁高興住,好有可能唔係主事人談判技巧高超/低能,而係佢嘅財務技巧超一流。
18. 以上所有只屬猜測,即係亂噏廿四。

後記:
18+1. 原來好多人唔明白 18 係想講咩。其實就係睇戲嗰啲 "如有雷同,實屬巧合",係一句免得被人告嘅免責聲明咁囉


留言


請按此登錄後留言。未成為會員? 立即註冊
    快捷鍵:←
    快捷鍵:→