[賽後分析] 雲高爾調動奇怪 朗尼已成隊中毒瘤

抱歉,隔左咁耐先出史雲斯 vs 曼聯的分析,因為我都諗左一段時間,曼聯連續被史雲斯三殺,問題出在哪裏?

隊長 朗尼

相信當晚唔少曼聯迷鬧佢鬧得好勁,佢自己也背負沉重壓力,雖然岩岩打破858分鐘入球荒,但係只係對住級數低一層的布魯日,英超開季至今仍然未取得入球,但雲高爾就對佢極之信任,繼續比佢打正選(真係救命),對住布魯日,就話可以逞強,依家係對住英超有質素的球隊,即刻見真章! (射門冇力,傳波唔準,打單箭頭當自己打防中,進攻組織果陣爭波踢,要數可以數到好多)

(朗尼在 vs布魯日的表現可參考我地對果場的賽後分析: (http://s.fanpiece.com/CJfXglo)

荷蘭C朗 迪比

從近幾場來睇,雲高爾比左無限開火權佢,不過我覺得佢咁獨食,應傳唔傳,應射唔射,只會害左佢......(之後先認真鬧佢地兩件廢物)

講左咁多廢話,入正題,曼聯呢場繼續有雲高爾引以自豪的控球優勢,開波早段,史雲斯的高位防守,令到曼聯無辦法組織到攻勢,話雖如此,馬達,靴里拉的控球能力還是可以的,他們在史雲斯高位防守下,仍然製造到幾個唔錯的攻勢,但是朗尼完全唔想接應,跑都費時,甚至有時傳到比佢都控失,又做左進攻終結者......

曼聯球員在沒法取得任何進攻效果後越踢越燥,38分鐘,舒拉達連在近底線犯規,被罰黃牌兼輸罰球,3分鐘後,迪比因被攔截而拉對手跌低,同樣領黃,43分鐘,史雲斯的魯迪治被罰黃牌,如果大家有睇上半場,雖然曼聯冇失波,但係後防有好大問題,白蘭特因身高所限比高美斯食住,史摩寧整係睇波,梳爾因攻得太上,左路有好多空位比史雲斯打反擊,結果埋下輸波伏線......

下半場出番來冇耐,梳爾左路出波,朗尼中路漏哂,馬達伏兵遠柱射入,1:0

48' 馬達入球 (梳爾 助攻) (1:0)

在領先1:0後,我不明白雲高爾點解唔係先求穩陣,保住3分先,反而爭取更多入球,結果反而全失3分......
史雲斯在58分鐘換入寄誠庸,形勢慢慢有利於史雲斯,61分鐘,曼聯取得反擊機會,因為打緊反擊,梳爾同達美安都攻上去,可以理解,但係你唔會諗到朗尼竟然咁容易傳失波...... 朗尼傳失波,兩閘返唔切,白蘭特同史摩寧一對中堅又因為要補位拉散左,結果新加盟的阿休輕鬆頂入,追平1:1......

61' 阿休入球 (魯迪治 助攻) (1:1)

65分鐘,史雲斯一個簡單直接的攻勢KO左曼聯防線,羅美路責無旁貸,近柱波竟然唔封位......

65' 高美斯入球 (阿休 助攻) (1:2)

本身落後左都唔緊要,起碼要有心追番先,但雲高爾d調動真係世界級...... 70分鐘,換走曼聯全場表現最好之一的馬達同舒尼,雲高爾咁快下定決心呢場冇3分落袋? 迪比呢場同樣一無是處,楊格換迪比可以比楊格踢番左翼位,生好多,但係就是為左契仔,置球隊利益於不顧,盲的都知楊格踢右廢一半武功啦,唉......

跟住換卡仔我都有d疑問, 點解唔試下比小豆出? 舒尼的體力其實無必要換走,反而依家你都輸緊球,緊係全力反撲啦,偏偏就位換位,雲高爾枉稱戰術大師,其實根本唔識變通。

費蘭尼的調動,仲要係換靴里拉,你就係唔肯換朗尼? 你當年連世界足球先生李華度都夠膽雪,依家唔夠膽雪個死肥仔? 完全摸不著頭腦,在換走馬達,靴里拉後,曼聯已經再沒有可能靠組織進攻,只靠費蘭尼作支點,高空轟炸,但成效不彰 ,結果曼聯在史雲斯主場全失三分,聯賽榜跌至第五位(值得一提,二至四位都係中遊球隊)
--------------------------------------------------------------

在此場開賽前,迪比注意到馬達沒有在列隊果陣排在佢前面,就叫馬達快d企番前面,自己扮大佬,我覺得迪比真係要改下,雲高爾雖然銳意提升你在曼聯的地位,但係不代表你的實力能有此地位,單計呢場英超,佢表現肯定係水準之下,假若你能虛心學習,在曼聯進步,終有一日是有機會達到C朗在曼聯的地位的,但不是現在!

朗尼,我已經對他沒有期望,16歲已在英超上陣的人,29歲還保持好狀態非常難,C朗,美斯果類除外,他再努力,恐怕也不會有太大改變,只希望他能改變他的場上態度,跑多d,拉空位都好啊,但是佢就是做唔到,而且咁嘅表現拎30萬鎊周薪,真係嘔血,想幫佢講好說話都難la 。

希望曼聯能在明日凌晨一點前,英國轉會窗關閉前簽d中前場新援,唔係嘅話單靠朗尼,迪比,曼聯今季的前景......

By Jones

假如各位覺得呢篇ok嘅話,不妨以Like支持下列專頁:
世界足球 World Football:
https://m.facebook.com/eww.com.hk

如果喜歡我們的文章,請即分享到︰

標籤: 曼聯  

留言

會員
我要評論
請按此登錄後留言。未成為會員? 立即註冊
  • tinchi3721
    tinchi3721 於 01/09/2015 評論 NO. 1

    真希望朗尼再跳草群舞 到時就有籍口賣佢

  • 陳世捷
    陳世捷 於 01/09/2015 評論 NO. 2

    荷蘭西朗+法國新亨利已在陣中

  • 基奧特
    基奧特 於 01/09/2015 評論 NO. 3

    其實可唔可以迪比同肥尼調位呢

  • Black Hch
    Black Hch 於 01/09/2015 評論 NO. 4

    同意到不得了

  • Bruce Chi Ying Yiu
    Bruce Chi Ying Yiu 於 01/09/2015 評論 NO. 5

    都係果句,簡單黎講,v92問題

  • Alex Lan
    Alex Lan 於 01/09/2015 評論 NO. 6

    完全同意!
    PS 唔知大家有無同感,我覺得我捧咗廿幾年嘅曼聯,而家變得好陌生。唔關費sir事,而係成隊波已經無晒曼聯嘅傳統,反而我喺幾隊中游球隊見到昔日曼聯嘅影子

  • masi
    masi 於 01/09/2015 評論 NO. 7

    2年前我吾會同肥朗續約!

  • Kwok Ping Yim
    Kwok Ping Yim 於 01/09/2015 評論 NO. 8

    希望佢快D傷,我哋吾使場場踢少個😈

  • 李太陽
    李太陽 於 01/09/2015 評論 NO. 9

    30萬鎊週薪,用黎操女

  • L Lo Pang
    L Lo Pang 於 01/09/2015 評論 NO. 10

    有同感,兒家既曼聯已經吾係曼聯。吾出小豆係因為要賣,呢樣可以理解,吾換肥仔真係諗都諗吾明。其實果2個犯規都可以話技術性犯規,冇記錯迪比果個因後防番吾切,局拉。感覺上迪比真係算踢得吾錯,早段馬達同靴里拉既無球跑動做得好好,但傳球者反而回傳或橫傳。疊瓦時間差到冇得再差,完全拉吾開防線,由其左路直頭冇咩配合咁濟。最差真係肥仔,連跑都廢事,有幾球明明個波帶到去禁區頂都吾見佢走位拉防線,企到等波

  • 伊卡洛斯
    伊卡洛斯 於 01/09/2015 評論 NO. 11

    當日幾個要書曼聯專頁,九成九人都係鬧朗尼,但真心講,我會鬧迪比係廢物多啲。佢攞到波,多數都係回傳比Shaw,Shaw去到下半場都寧願自己爆上去好過比佢。仲有成日9斬,比後衛掂一掂就跌,回防on99唔知mark邊個,永無高速落底出波,浪射唔中龍,唔識走位配合隊友。。。。

  • upson
    upson 於 02/09/2015 評論 NO. 12

    換舒尼達連大概是他已領黃,驚佢再有咩冬瓜豆腐就兩黃一紅,所以先換。另外有個問題係馬達其實唔岩打右邊,同埋應該早啲換爆炸入黎。

  • ak58
    ak58 於 03/09/2015 評論 NO. 13

    @伊卡洛斯 聽講佢同早幾年楊格一樣得右腳,點高速落底出波呀?

  • 世界足球 World Football
    世界足球 World Football 於 07/09/2015 評論 NO. 14

    好心肥朗快D走啦,趁宜家有30M估價

快捷鍵:←
快捷鍵:→