續命狂魔運高矣 拉舒褔特顯功架 (曼聯 3:2 阿仙奴 賽後分析)

曼聯主場迎戰阿仙奴,曼聯啱啱踢完歐霸,主場以5:1大勝米迪蘭特,氣勢如虹,但受到傷兵問題困擾,差唔多一隊主力都傷,方丈被迫起用大量青年軍,上場歐霸入兩球嘅Rashford,Lingard,Varela繼續獲得機會。




阿仙奴雖然剛在周中歐聯主場落敗,但輸比巴塞敗不足辱,雖然都有幾個傷兵(韋舒亞,卡蘇拿,張伯倫),但雲加仍能排出幾乎full team陣容,山齊士,奧斯爾均在陣,牌面上睇,取勝似乎易如反掌 ......



先唔講呢場比賽住,曼聯今季聯賽爭四極其困難,未打阿仙奴之前,落後緊曼城6分,同時比早一日踢嘅韋斯咸搶去第五位,爭四形勢不容樂觀,歐霸抽中利物浦,或許是救命稻草,但呢場仙魔大戰,雲高爾非勝不可,因為早前已有相關消息人士傳出,在作客輸比米迪蘭特之後,曼聯董事局向雲高爾下最後警告,假若作客梳士貝利,主場對陣米迪蘭特的歐霸次回合,以及主場對陣阿仙奴,三場有一場稍有閃失,雲高爾將人頭落地,由傑斯作為看守領隊,帶到季尾,方丈已經過左兩關,都要過埋第三關先安全。


相比之下,雲加作為阿仙奴二十多年來嘅領隊,根本沒有可能被下台,因此沒有甚麼壓力,唯一的壓力可能就是要再拎英超冠軍。


好啦,我都知自己講左好多廢話,入正題,迪基亞傷癒復出,把守曼聯大門,後防線,左閘,上場後備上陣嘅洛荷,卡域克同白蘭特合組雙中堅,右閘係喺華倫西亞,楊格都傷左嘅情況下,最近有唔少機會嘅Varela。
曼聯中場,由舒拉達連出任防中,靴里拉喺佢隔離,就做box to box角色,走上走落,助攻助守。 馬達近幾場已被重新推上進攻中場。 左翼係上場歐霸技驚四座嘅迪比,右翼就係今季開始喺一隊站穩陣腳嘅連加特。

正前鋒,由於朗尼,馬斯亞,Will Keane,費蘭尼全部傷哂,方丈大膽起用上場入兩球嘅Rashford對阿仙奴擔正 (我真係覺得方丈好夠畺,換轉其他領隊,我相信會寧願比迪比/贊奴沙踢正前,都唔會用Rashford)

當你睇下後備席,你會嘩得仲大聲,除左羅美路,其他6個都係青年軍(贊奴沙,彭利拿,James Weir,Riley,Mcnair,Timothny Fosu-Mensah)


曼聯傷兵: 梳爾,鍾斯,馬斯亞,朗尼,楊格,華倫西亞,費蘭尼,小豬,達美安,Borthwick-Jackson,Will Keane



阿仙奴方面,守門員當然係施治,後防線方面,雲加起用蒙利爾,基比爾,哥斯尼,比利連,雲加因應曼聯用新仔,速度應該較之前快,冇用梅迪薩卡亦都合理。

中場,高基連同藍斯組雙防中,奧斯爾攻中,山齊士左翼,反而唔係好明點解要比禾確特踢正前,而比韋碧克踢右翼? 呢個排陣搞到禾仔直到被換走果陣都係隱形 ......


雲加喺後備席亦留左基奧特,祖爾甘保,Iwobi等進攻兵力可供調用,其實都冇咩問題,問題係換人嘅時機,同換邊個人 ......


阿仙奴傷兵: 張伯倫,路斯基,卡蘇拿,韋舒亞。



一開波,阿仙奴攻勢如狼似虎,曼聯右路嘅Varela欠缺經驗,結果冇跟一次,被蒙利爾喺左路入楔射門,迪基亞企位冇問題撲出,其後蒙利爾不斷喺左路上前,終於迫到Varela拉人,9'就拎左黃牌。

雲加似乎集中火力喺曼聯右路身上,上半場阿仙奴都喺左路組織多次攻勢,而且頗有威脅,迫到卡域克喺禁區前絆人犯規,拎黃牌,雖然阿仙奴攻勢一浪接一浪,但始終無法打破僵局,反而被曼聯兩次反擊得手,喺3分鐘內連失兩球。

29' Rashford First Goal (Varela Assist)

華利拿傳中,連加特跳起避開個波,比Rashford足夠空位射門,勁射破門,收死施治。

32' Rashford Second Goal (Lingard Assist)

連加特傳中,Rashford頂入。

迪比同連加特嘅不斷回防,令阿仙奴地面推進難上加難,迪比令比利連唔敢輕率上前助攻,而禾仔又隱形,山齊士就被Varela守住左,阿仙奴進攻係不斷攻緊,但一路都無咩黃金機會。

而呢兩球都係曼聯嘅反擊,只係用左兩三腳波已經到左人地後場組織攻勢,而阿仙奴並沒有特別逼搶曼聯中場,曼聯中場(馬達,靴里拉,舒拉達連)可以cool到波,傳波成功率大增,組織攻勢嘅次數都不斷提升。

失左兩球之後,阿仙奴狂攻,韋碧克幫阿仙奴追番一球。

40' Welbeck Goal (Ozil Assist)

呢球洛荷無緊貼韋碧克,要負上一定責任。

半場諗住雲加會換基奧特,屈頭槌,結果無換到。
而拉舒褔特上半場嘅表現,相信已經令曼聯球迷留下深刻印象,兩次機會佢都把握到,可以喺阿仙奴幾乎full team下,3分鐘內攻入兩球真係難度爆燈 ......


下半場,阿仙奴希望追平比數,雲加㩒制,攻勢排山倒海,洛荷亦因防守時受傷退下火線,方丈換入Timothy Fosu-Mensah,呢位荷蘭小將出任左閘,睇佢踢左廿分鐘左右,佢嘅踢法都唔似一個新人,好有經驗,佢亦有上前助攻,有球佢直傳比迪比,迪比同Rashford做配合,Rashford差d可以帽子戲法。 63' 雲加終於換入基奧特,但係阿仙奴踢法仍然堅持地面組織,有咩用? 結果曼聯又把握一次反擊機會,Rashford自己帶到對方後場,再傳比後上嘅靴里拉撞射,曼聯 3:1 領先

63' Ander Herrera Goal (Rashford Assist)

雲加見失波,用艾蘭尼換走左高基連,坦白講,我唔知呢個調動有咩作用 ......

之後奧斯爾幫阿仙奴追番球。

69' Ozil Goal

80' 方丈見領先緊,大局已定,就用贊奴沙換走Rashford,喺呢十分鐘入面,阿仙奴再次猛攻,雲加用Iwobi換入韋碧克(其實換Camebell會唔會仲好d?) 但曼聯後防撐過了,最後曼聯以 3:2 險勝。


Man of the Match: Rashford


曼聯:
今場洛荷,Varela發揮出超水準,加上迪比,連加特的回防,阿仙奴兩邊攻勢都造成唔到威脅,禾仔,山齊士都好沉,雖然中堅起用白蘭特同卡域克,但除了一次不留神,被奧斯爾把握機會外,基本上都無咩甩拖,阿仙奴又冇諗過用高空轟炸,所以造成唔到太大威脅。 兩球失波都唔係迪基亞責任,一球係洛荷,一球係中堅清波無望人,傳比人攻。


舒拉達連繼續穩膽,佢令阿仙奴中場小組入滲沒有發揮作用。 靴里拉同馬達,今場順到飛起,前面Rashford,連加特,迪比都係快嘅,反擊好有效率,馬達今場無受到太大防守壓力,比波好輕鬆,所以造到唔少機會。靴里拉拍舒拉真係幾好,舒拉專注攔截,靴里拉創造力不及馬達,但佢嘅走動製造空位, 而今場亦有一次後上遠射,靚! 迪比今場已經係今季英超入面最好一場,對住比利連可以壓到人地唔敢上前助攻,不斷進步緊,希望佢唔好囂,虛心d。 連加特同Varela多左好多疊瓦,右路傳中好有威脅,製造左兩個入波。 最後Rashford,方丈比佢正選啦! 朗尼去中超啱哂! 2場已經攻入4球,當年馬捷達都係一場有表現姐,唔可以相提並論。


踢完今場,曼聯距離踢少一場嘅曼城3分,雖然爭四形勢都係差,不過起碼做好自己先,小弟就唔睇好曼聯拎歐霸嘅機會,對手始終係多蒙特,西維爾,對依家嘅曼聯來講好強。

阿仙奴:
小弟覺得阿仙奴一眾球員有多少輕敵,今場各位有眼睇,後防有波唔係短傳上前場,而是直接搵山齊士,禾仔,韋碧克,長傳成功率一定冇短傳咁多,而人地已經睇通你路嘅時候,都仲未轉踢法,雖然一次又一次造成威脅,但係無辦法造成黃金機會。


一對進攻核心,山齊士缺態,今場過人全場得一次咁大把,好多波去到山齊士腳下都傳失,雖然肯跑,肯追,有鬥心,但明顯睇到佢唔喺最佳狀態,一方面,人地右閘Varela今場表現出色,亦使山齊士發揮空間進一步縮小,希望下場山齊士番來啦! 奧斯爾其實做足本份,本身製造6次機會,但只有韋碧克把握到一次,把握力明顯喺曼聯之下,曼聯8射6中,阿仙奴13射只得5中。



換人方面,我認為有商確餘地。 半場的時候,應該換上基奧特? 換下高基連是否有必要? 如果換Campbell,而唔係Iwobi,會唔會更好?


阿仙奴喺輸左呢場之後,以51分,落後榜首的李斯特城5分,爭冠變得被動。

值得一提: 雲高爾今場與球證理論不果,好有火,扮暈倒地,相信睇直播嘅球迷應該笑左。


延伸閱讀: 曼聯希望與拉舒褔特續約,但他希望在季尾續約,先繼續證明自己有條件獲得更豐厚的新約。
http://www.mirror.co.uk/sport/football/news/marcus-rashford-offered-new-bumper-7467141

By Jones

如果覺得呢篇文還可以,希望你地可以比個Like我地,每個Like都係我地嘅動力!
World Football: https://www.facebook.com/worldfootball.com.hk/
MU4ever (曼聯 Fans Page) : https://www.facebook.com/MU4everHK/
阿仙奴 Forever Gunner: https://www.facebook.com/ForeverBeGunners/

其實我覺得方丈真係幾好彩,若果唔係受嚴重傷兵問題困擾,拉舒褔特至少要等一兩年才有機會上位,唔只前鋒,左閘嘅Borthwick-Jackson,右閘嘅Varela都成功上位,再計之前嘅彭利拿,連加特,其實方丈今季已經提升至五,六位小將,最近兩場方丈有難,拉舒褔特橫空出世救方丈一命,換作是其他領隊,恐怕過不了三關,但方丈在一眾小將的協助下成功了。

另一方面,呢幾場曼聯嘅進攻速度提升左唔少,朗尼同馬斯亞缺陣,方丈把心一橫放棄對曼聯冇用嘅控球,踢番d直接有效嘅反擊,已經同之前兩個世界,其實方丈肯變下,唔會冇生機嘅,唔好咁頑固啦!

如果喜歡我們的文章,請即分享到︰

標籤: 曼聯  阿仙奴  拉舒褔特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→