FM遊戲與現實足球— Inverted Wing Back

黃足坑 於 13/12/2020 發表 收藏文章
因為一啲原因,早排忙到七彩,有一段時間冇喺度同大家分享,希望大家多多體諒。不過,雖然冇發表拙作,但我同好多足球狂迷一樣,都係有打機嘅。FM21出咗一個月,係我最近玩得最多嘅遊戲。遊戲入面有好多細節,例如球員位置丶訓練等,可能會令人感到陌生。筆者發覺網絡上用中文解釋呢啲術語嘅人唔多,所以希望盡我小小能力,同大家介紹一下呢啲術語,以及喺現實比賽入面嘅例子。

第一篇文章想同大家介紹嘅係Inverted Wing Back。呢個角色可以喺左右兩閘同翼衛搵到。一般閘位球員嘅職責係防守兩側(Full Back),踢法較進取嘅會要求兩閘壓前助攻(Wing Back),甚至好似阿歷山大阿諾丶羅拔臣丶馬些路等,攻多過守。而Inverted Wing Back同佢哋最大分別之處,係佢哋會企喺一個較為中間嘅位置,支援中場;較少落底,反而會從Half Space位置進攻,遊戲入面,好多逆足嘅閘位球員都可以勝任呢個角色,而且喺今集FM入面都好好用。

日前嘅曼市打吡入面,曼城嘅簡些路正正就係飾演呢個角色。右腳嘅佢近期經常被安排到左閘位置,有別於其他左閘,簡些路未必會下下壓前助攻,而會移入中路,令中場增加一個人手。呢個角度可以見到,曼城一次反擊機會,有四位球員進攻,包括攻中迪布尼。而簡些路拉入中間,同洛迪丶費蘭甸奴一齊鎮守中場中。而鏡頭後面仲有三位曼城防守球員。
試諗下,如果曼聯將個波踢走,曼城中場又得返兩個球員嘅話,面對住三位曼聯球員,曼城係唔能夠確保可以攞返控球,而如果曼城需要回後再組織嘅話,兩人中場亦會令到傳波選擇比較少。相反,簡些路喺呢個位置,令到中場形成三角形,係哥迪奧拿戰術下傳波丶組織嘅基礎,更加有利佢哋嘅發揮。

事實上,曼城上季開始都輸唔少反擊波,正正係因為兩閘經常壓前,而佢哋陣中又冇雲迪克呢種可以一打二嘅中堅,令到佢哋失波,甚至失分。哥帥開始改變戰術:同之前一樣,右閘獲加會較多上前助攻,但左閘簡些路會較多留後,令到曼城中後場保持有五位球員。從呢個角度所見,簡些路企位較似一個中場,而獲加就企得好前,甚至位於畫面以外。

而當需要上前助攻,簡些路嘅踢法會同一般閘位球員有少少分別。因為簡些路係左腳打右閘,唔太擅長左腳落底出波,所以,佢哋會較常喺K角位附近斬內彎波,甚至直接殺入Half Space位置,呢個都不失為一個助攻嘅方法。

其實哥帥都唔係第一次用上Inverted wing Back,早喺執教拜仁期間,哥帥已經試過安排拿姆打左閘,做出類似嘅效果,而去到曼城,曾經有一段時間係由德夫客串左閘,而佢實際打法都係Inverted Wing Back,較多參與中場工作。而除咗哥迪奧拿嘅球員,車路士嘅艾斯比列古達,同埋狼隊嘅莊尼都有唔少打左閘嘅演出,角色同作用都係同上述幾位大同小異。不過每個角色都係有利有弊,在我而言,呢個係一個高風險嘅踢法,對閘位球員嘅位置感要求好高,如果只顧企喺中路,當對手喺邊路突破,就好容易做成缺口。簡些路對曼聯一戰都試過失位,好彩最後冇事。

希望呢篇文章會令大家對Inverted Wing Back呢個角色有更深認識,同埋令各位FM玩家更加有熟悉感!如果呢篇文反應熱烈,我會繼續同大家介紹球場上唔同位置嘅唔同角色!

如果喜歡我們的文章,請即分享到︰

標籤: 曼城  簡些路  哥迪奧拿  

留言


請按此登錄後留言。未成為會員? 立即註冊
    快捷鍵:←
    快捷鍵:→