FM遊戲中嘅萬金油 現實係唔係十項全能?

黃足坑 於 21/12/2020 發表 收藏文章
足球世界入面,萬金油意指可以打多個位置嘅球員。現今足球著重整體,前丶中丶後三線球員都要求多功能。例如前鋒要回後同逼搶丶兩閘又要識走位助攻。所以功能單一嘅球員,好似傳統十號仔,開始被新時代嘅足球戰術淘汰(即使係咁,我都係認為阿仙奴應該要用奧斯爾嘅)。反之,越全能,打得越多位嘅球員就更加受歡迎,現實如是,打機如是。

講到萬能,必定要提到德國球員哥斯基奧斯(Kevin Großkreutz)。呢位球員除咗龍門同中堅,基本上咩位都踢得,2014年世盃有份入選,可見佢對球隊有一定作用,儘管期間冇落過場,哥斯基奧斯名義上都做係德國世盃功臣之一。不過佢而家已經冇為任何球隊效力,所以我就唔喺度講佢喇。今日想介紹嘅球員叫Henry Lawrence,暫時譯做亨利羅倫士先,係一個車路士青年軍球員,現年19歲。

上面張圖嚟自我自己FM嘅save,如果冇打個FM唔緊要,張圖主要想表達球員嘅能力同位置。喺FM世界入面,佢同哥斯基奧斯一樣,佢可以勝任球場多個位置,除咗龍門同前鋒之外,其他位置都踢得。能力值唔係好亮眼,但係佢嘅多面性自然成為佢嘅賣點之一。究竟佢喺現實中係咪一樣十項全能呢?

雖然未曾為藍軍一隊上陣,但係上季復賽期間,亨利羅倫士一路有喺一隊跟操,可見教練團對佢嘅重視。而事實上,上季歐聯對拜仁嘅比賽中,車仔傷兵滿營,林伯特都有俾佢坐後備。當然,佢嘅表演舞台暫時仲係車仔預備組:十一場比賽入面有十場踢足,單係今季,佢已經出任過左中場丶左閘丶右閘丶防中同中堅,可見佢喺遊戲世界嘅嘅全能性同現實相符。喺現實世界入面,亨利羅倫士左右腳都熟練,而且體能好好,打閘嘅話經常見到佢疊瓦助攻。想睇佢嘅球皇片可能嚟呢度:

https://www.youtube.com/watch?v=i8UOhRdiZ1o

即使仲未正式上一隊,林伯特已經好賞識呢位球員,佢曾經喺訪問入面提到,自己並唔認識所有預備組球員,但係有留意當中表現突出嘅幾位,亨利羅倫士就係其中之一,佢知道亨利羅倫士喺訓練表現好好,值得一個上位機會,而車路士暫時嘅策略,都係希望可以提拔青年軍成員多過直接買人。至於喺國家隊方面,佢今年十月就為英格蘭U21上陣過一場,成為小國腳,睇落佢嘅發展都一切順利,所以希望亨利羅倫士遲啲有機會上位啦!

如果喜歡我們的文章,請即分享到︰

標籤: 車路士  FM  

留言


請按此登錄後留言。未成為會員? 立即註冊
    快捷鍵:←
    快捷鍵:→