被FUT遺忘的幾位球員

黃足坑 於 02/01/2021 發表 收藏文章
相信FIFA係最多人玩嘅足球遊戲,當中Ultimate Team(FUT)係其中一個最受歡迎嘅模式,除咗可以同其他玩家較技之外,仲可以用自己最鍾意嘅球員,甚至已退役嘅球星組隊丶收藏。即使遊戲收錄大部份主流聯賽嘅球員,但竟然有一小部份係冇球員卡,好似被FUT遺忘一樣。呢篇文章就想列舉好幾位應該出現,但唔喺遊戲入面嘅球員。

1. 卡雲尼
上圖:Reddit網民設計圖片
卡雲尼喺對上幾年FIFA評分都好高,今季亦有好多出場機會,所以佢喺呢個名單之中可謂千古奇冤。還記得佢對修咸頓一場比賽取得兩入球一助攻,一般嚟講,佢已經獲得Team of the Week特別卡一張,但係到2021年,佢連普通金卡都未有。坊間普遍認為FIFA推出之時,卡雲尼仲係自由身球員,未簽約曼聯,所以FIFA就未能及時整張卡俾佢。唔知大家接唔接受呢個解釋呢?

2. R威廉斯
利物浦今季傷兵問題嚴重,尤其係後防位置,因此今季紅軍後防多咗好多新面孔,R威廉斯就係其中之一。雖然佢今季已經為利物浦一隊上陣十場,但可能因為佢上季只係踢第六級聯賽,連FIFA都冇諗過佢會咁快上位,所以連卡都唔出俾佢。至於另一位中堅尼敦菲臘斯,FIFA數值有68分。

3.法比奧干查奧
遊戲入面,因為佢助攻力強,打機好使好用;至於遊戲外,皇馬球迷對佢應該好有印象。2010年世界盃新星之一,葡萄牙左閘干查奧係勁起上嚟可以同馬些路爭正選。可惜佢喺頂級聯賽表演嘅時間唔多,2014年世盃受傷之後,佢嘅表現一直浮浮沉沉,返到皇馬亦開始外借生涯。上季佢轉會到葡超球會里奧艾維,曾經宣佈退役,但係今季仍然有喺里奧艾維註冊,不過暫時只係踢過一場比賽。即使係咁,干查奧仍然係里奧艾維一員,所以值得叫FIFA俾張卡佢,相信遊戲入面嘅佢會令唔少球迷玩家帶嚟回憶。

4. 古亞連
另一位打機好好用嘅球員。好記得喺FIFA14入面,當時踢國際米蘭嘅佢以全能見稱,係意甲隊入面不可或缺嘅成員。現實中佢曾經傳過加盟利物浦等球會,但最終為錢轉會到上海申花,之後又去到巴甲效力。喺新一年(2021年),34歲嘅佢會去哥倫比亞球會Millonarios踢波。由於FIFA有收錄哥倫比亞聯賽,所以大家理應會喺FUT再見到佢。不過FIFA連卡雲尼都遲遲未出,再用古亞連打機機會恐怕都冇。同干查奧一樣,古亞連喺遊戲世界入面為我哋帶嚟唔少回憶,所以希望FIFA會出返張卡俾我哋懷念一下啦。

5.陳俊樂
冇咩嘅!樂仔作為唯一香港人代表,點都要提下佢!如果FIFA喺今集出到樂仔嘅卡,我一定會買十張返嚟儲。

如果喜歡我們的文章,請即分享到︰

標籤: FIFA  

留言


請按此登錄後留言。未成為會員? 立即註冊
    快捷鍵:←
    快捷鍵:→