相比法比奧斯華，佢可能更加適合狼隊 精選

狼隊最近熱話，必然係波圖新人法比奧施華(Fabio Silva)加盟。有留意狼隊人腳都知道，佢哋有大量葡萄牙兵，想必同葡藉球員經理人文迪斯(Jorge Mendes)有關，狼隊亦唔多唔少因為咁，未升班時已經招得魯賓尼維斯等人。近來，狼隊前鋒魯爾占美尼斯亦受大球會注意，不久將來被買下嘅機會都唔細，都係時候搵定替補，因此簽下法比奧施華不無道理。問題係佢嘅轉會費。

狼隊用上四千萬歐元簽入呢位18歲前鋒，呢個價錢對任何球隊嚟講都係重大收購，呢個亦都打破狼隊歷史上最高轉會費嘅紀錄。如果大家有打開Football Manager, 可能會知道佢係一個極具潛力嘅新星，呢篇文章亦唔係對法比奧施華嘅潛力作出質疑。只係，脫離遊戲，回到現實，法比奧斯華只係一個葡超上陣唔夠200分鐘嘅球員，而網上見到佢嘅球皇片，大多係喺預備組或青年軍比賽中節錄，比賽水平較低。
法比奧施華呢次轉會，令我諗起佢嘅同鄉連拿度山齊士：當年名氣極大，以三千幾萬轉會到拜仁，但係始終未能喺德國班霸上位，最終輾轉去到法甲里爾，雖然成為穩定正選，但對比芸芸球隊，佢只係水平一般。其實，佢轉會拜仁前嘅球皇片都有唔少來自賓菲加預備組同青年軍，但相比法比奧施華，連拿度山齊士總算真真正正喺葡超上陣一個球季。

對我嚟講，狼隊唔應該買一個幾年後先可能成材嘅球員，而係一個提供到即時作用，可以為魯爾占美尼斯分擔工作嘅前鋒。同法比奧斯華比較，我認為布拉加前鋒保連奴(João Paulo Dias Fernandes)更加適合狼隊。

保連奴同魯爾占美尼斯作用相似，大家都係高大前鋒，可以喺前場做支點。魯爾占美尼斯上季英超入17球6助攻，保連奴亦射入17球同7個助攻，但當中只有兩球十二碼，比魯爾占美尼斯少。保連奴頂上功夫了得，上季多次以頭搥破門，而佢場均失去控球次數亦較少，佢可以話係魯爾占美尼斯嘅替身。

大家有印象嘅話，可能會記得狼隊同布拉加曾經喺歐霸分組賽交手，兩回合計布拉加一勝一和，其中布拉加主場一戰，保連奴喺全場只得一次射門下，射入一球，可見佢唔係一個容易應付嘅球員。
https://i.imgur.com/6aGg3op.gif
至於法比奧斯華，佢只係喺葡超射入過一球，實在難以說服佢值四千萬。我認為法比奧斯華只有兩樣嘢比保連奴優勝：年紀同經理人影響力。

提到經理人，筆者唔排除四千萬元背後，係狼隊同文迪斯嘅金錢技倆。以方便日後兩方繼續合作，令狼隊更容易簽入其他球員。據指，文迪斯喺法比奧斯華嘅交易中，從波圖獲得六百多萬，佣金相當和味。不過，如果單純地諗，相比法比奧斯華，保連奴可能更加適合狼隊。