為咗睇波,你可以去到幾盡?

黃足坑 於 29/09/2020 發表 收藏文章
雖然新一季五大聯賽已經悉數開始,但係香港嘅足球比賽仍然停留喺2019/20球季,如無意外,要去到10月11日先會正式完季。大約由呢兩星期開始,港超比賽重新以閉門作賽方式進行。

筆者喺一個月前同大家分享過,外國嘅死忠球迷點樣喺閉門下,留下兩眼見愛隊一面,例如有波圖球迷爬上球場頂部觀戰(https://football.fanpiece.com/wongchukhang/c1382973.html)。香港球迷人數雖然冇人哋咁多,不過對愛隊嘅熱情係不變嘅。

閉門後,大部份嘅港超比賽都係喺將軍澳運動場舉行,多隊球迷都會走上附近嘅小山波,或者爬上球場外嘅圍欄觀戰。亦有少數比賽喺小西灣運動場進行,亦見到有球迷從附近行人天橋睇波。球迷同球員之間保持住一段好遠嘅距離,所以唔會影響到身處隔離泡泡嘅球員。至於球迷之間距離雖近,大家都有戴口罩。
圖片來源:蘋果日報

去到昨日(9月28日),一場東方龍獅對富力嘅足總盃嘅香港大球場進行。如果大家有去過大球場,都會知道大球場為處山上,要從東院道搵位偷睇球場幾乎係冇可能。筆者曾聞說以前,當大球場坐無虛席,球迷會爬上看台後嘅山上睇波。冇諗過時至今日,呢個景象會因為疫情而再現。人數雖少,不過東方眾將仍然聽到佢哋嘅打氣聲,呢班球迷值得我哋專重。
圖片來源:體路

自從港中大戰後,香港足球開始吸引一批球迷支持,佢哋有啲會創立唔同嘅球迷組織,為港隊同各自愛隊打氣。經過呢次疫情後,筆者更加相信香港有一班好球迷。其實香港都有一班好球員,佢哋可以喺亞洲賽入波,可以守和巴林,可以外流世界各地…… 加上香港球迷都唔係要求港隊要有絕佳成績,只係希望撐自己人。香港冇嘅係資源同埋支持體育活動嘅政府。又好似今次疫情咁樣,政府好少顧及運動員嘅訓練同收入,好多人因為疫情被逼停工,即使超聯復賽都要拖到最近先可以落實。如果香港有一個好嘅政府,我絕對相信香港足球有得搞。好可惜,冇。

標籤: 港超  東方  東方龍獅  

留言


請按此登錄後留言。未成為會員? 立即註冊
    快捷鍵:←
    快捷鍵:→