極具野心的黃色潛艇,來年搶四不是夢?!

黃足坑 於 27/08/2020 發表 收藏文章
西甲一直都俾人有強弱懸殊嘅感覺,自13/14球季後,西甲冠軍就由巴塞同皇馬爭奪,只有馬體會有能力威脅呢兩支西甲霸主,但佢咃近年都無法奪冠。由此,西甲二線球隊會視爭四丶奪得歐聯資格為一個較易達成同理性嘅目標。呢幾年,前四球隊除咗上面嘅西甲三雄之外,就只有華倫西亞同西維爾。至於今日同大家講嘅維拉利爾,近四年有三次排第五,來季睇嚟好有野心爭四。

首先講下轉會,暫時黃潛已經簽入三位球員:柏利祖(Dani Parejo)丶高基連(Francis Coquelin)同久保健英(Takefusa Kubo)。但係卡蘇拿同安古沙就離隊。據了解,今夏約滿嘅拿玻里翼鋒荷西卡利祖(José Callejon)亦有望加入黃潛,筆者當呢單嘢將會成事先。呢幾位新兵唔單止可以填補離隊球員空缺,更加係加強正選球員嘅質素。但係我覺得佢哋最有野心嘅收購並唔係呢班球員,而係領隊艾馬利。要知道上任領隊卡利查執教球隊三年,除咗第二年失準排14外,其餘兩年都保住五哥席位,表現唔算失禮。排第五都要被炒,就知黃潛高層嘅野心。今年搵咗艾馬利返嚟,雖然上季被阿仙奴落鑊,但係我又覺得佢執教能力唔算太差。返到去熟悉嘅西甲相信會有更好表現。甚至我覺得呢隊維拉利爾會同艾馬利一拍即合。

睇返艾馬利喺阿仙奴時嘅戰術,唔難發現佢好著重兩閘助攻。上18/19球季入面,高拿仙歷同比爾連都錄得5個助攻,並列阿仙奴助攻榜第四名。艾馬利要求兩閘同兩翼/前鋒配合,制造同對方閘位2打1嘅機會。另一方面,佢希望一至兩名防守中場留喺較後位置,協助後場組織。防守時,艾馬利希望進攻球員向邊路壓逼,以壓縮對方後防空間。維拉利爾陣容絕對適合呢套打法。


進攻方面,維拉利爾左右兩閘,分別係沙維昆迪拿(Xavi Quintella)同魯賓彭拿(Ruben Pena),上季都有多次傳中同上前參與助攻嘅數據。兩位球員每90分鐘分別有4.46同3.77次傳中,每90分鐘亦有超過18次喺Final Third觸球,同隊中射手謝拉特摩蘭奴一樣,反映佢哋助攻頻率之多,而荷西卡里祖亦習慣落底出波,同艾馬利嘅戰術相當適合,相信同魯賓彭拿可以造成好大威脅。墜後中場方面,新加盟嘅柏利祖亦可以勝任呢個位置,而且佢長傳能力了得,可以令黃潛嘅組織更方便,雖然安古沙走咗,但柏利祖+ 依保拉 / 高基連嘅組合都可以建立一道理想嘅中場屏障。至於防守方面,相信艾馬利喺阿仙奴嘅防守問題係來自中堅質素。梅斯達菲搭柏柏度普路士,對唔住阿迷都要講句,呢個組合比唔到人信心。至於維拉利爾中堅有艾比奧爾同柏奧托利斯(Pau Torres)。前者係具經驗老將,後者係自家青訓,成功入選最近一次大國腳。上季都係佢哋正選,但聯賽失咗48球,只係排西甲11。喺後衛人腳暫時不變下,防守可能係佢哋來季問題所在,惟有睇下艾馬利有冇辨法。
依筆者估計,黃潛來季可能會排出4-2-3-1或4-4-2陣式,陣容如下:

睇返資料,黃潛對上一次踢歐聯已經係11/12球季。當時G.羅斯同尼爾馬仍在陣中。但下一季就因為不勝多線作戰嘅負荷而降班。近幾年佢哋都只係「接近」歐聯賽事。今年黃潛喺轉會市場動作多多,實在令筆者覺得佢哋已經有衝四計劃。假如成功衝四,佢哋將會獲得21/22年歐聯參賽資格。你哋又覺得佢哋可唔可以喺十年後重返歐洲最大舞台呢?

如果喜歡我們的文章,請即分享到︰

標籤: 西甲  維拉利爾  艾馬利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→