未算大器但總算晚成：卡普圖 精選 推薦

意大利國家隊近年淪落為褪色勁旅，相信不少球迷都有同感。前鋒選擇唔再係迪比亞路同恩沙基。呢支「四星」球隊甚至連2018年世盃都無緣參賽。難聽講句，而家嘅意大利國家隊充斥住一班二線球員。但係喺芸芸意大利人中，可以脫穎而出，為國效力嘅，都算係一個成就。而呢篇文要講嘅，就係33歲先首次入選嘅薩斯索羅前鋒卡普圖(Francesco Caputo)。

卡普圖自2010/11球季為巴里效力後，已經離開頂級聯賽多年。去到18/19球季先帶領安玻里升班，先再次踢意甲。上個球季只係佢第三個意甲球季，但佢一共攻入21球，喺意甲射手榜排第四，只係比恩莫比利丶C朗同盧卡古少。

喺領隊迪施比陣下，卡普圖主要踢4-2-3-1陣式下嘅前鋒。配合保加(Jeremie Boga)同比拉迪(Domenico Berardi)攻堅。卡普圖踢法簡單，但唔限於企喺最前等食。佢經常落到對方中場同後衛之間嘅空位攞波，現位，令中後場球員可以直接俾波佢，再做一個支點分邊，藉此打穿對方中場防線。
https://i.imgur.com/HqZFjue.gif
必須一提嘅，係卡普圖護球能力。作為支點，對方後衛一定會對佢施以壓力，同卡普圖搶第一點，卡普圖唔係特別高大，但係經常可以保護個波。全季失去控球次數只有38次，同意甲其他前鋒比較，比洛迪80次，盧卡古69次，恩莫比利54次，迪斯高40次。卡普圖喺作為支點方面私確有優勝之處。
https://i.imgur.com/zJrK1tn.gif
作為前鋒，最重要都係埋門一腳。頭先講到卡普圖意甲入21球，原來佢預期入波只有15.6次，即實際比預期多超過五次，反映佢嘅射手觸角。下面張圖解釋佢每次射門嘅位置同入波機會。圓圈越大代表入波機會越大；綠色代表入波。卡普圖其他顏色大圓圈較少。反映佢應該要入嘅波都入好多，唔會浪費。我覺得卡普圖勝在夠冷靜，往往可以喺最好嘅時機起腳，令佢入球如麻。

另一方面，卡普圖走位方面亦有一定功夫，無論回身現位，定係走身後等長傳，佢都成日搵到空位。
https://i.imgur.com/zJrK1tn.gif

當然，如果卡普圖咁完美，就唔會而家先入國家隊。雖然身高一米八，身型不過不失，但係卡普圖高波方面較為薄弱。唔單止爭頂成功率少，連爭頂次數都少。論爭頂次數，卡普圖全季只得55次，頂贏16次。至於身型相若，甚至更細粒嘅前鋒呢？恩莫比利爭頂92次，贏24次；馬天尼斯爭頂88次，贏26次；比洛迪爭頂214次，贏100次。數據證明，卡普圖唔習慣，而且唔擅於頂波。薩斯索羅踢法亦經常以地波推進，唔清楚係教練嘅意思，定係要特登遷就卡普圖喇！
另外，卡普圖防守意識較差，不過未去到好似美斯散步咁樣。一般單箭頭下，除非真係死守，前鋒都會逼兩名中堅，阻止佢哋睇定嚟傳。卡普圖係有逼搶動作，但反應較慢，唔會個波一到中堅腳下就搶。始終佢都33歲喇，有時跑動少啲都可以理解。
https://i.imgur.com/o5Aq93P.gif

總結雖然對卡普圖有讚有彈，但事實係卡普圖的確係意甲第二本土射手，亦成功吸引文仙尼召佢入國家隊。可見佢上季表現受到肯定。不過意大利今次總共召咗37位球員，比洛迪同恩莫比利都係佢嘅競爭對手，文仙尼都係主張用4-3-3陣式，反映三個中鋒只能出一個。要做到大器晚成，真係要喺國際舞台交到表現先得。